ಗಂಡ ರಣ್‌ವೀರ್‌ಗೆ ಬ್ಯಾಟ್‌ನಿಂದ ಹೊಡೆದ ದೀಪಿಕಾ: ಏನಿದು ಹೊಸ ಕಥೆ?

ಬಾಲಿವುಡ್ ತಾರಾ ಜೋಡಿ ದೀಪಿಕಾ ಪಡುಕೋಣೆ-ರಣ್‌ವೀರ್ ಸಿಂಗ್ ಜೋಡಿ ಇದೀಗ ಮತ್ತೊಮ್ಮೆ ಸುದ್ದಿಯಾಗಿದ್ದಾರೆ. ಸದ್ಯಕ್ಕೆ ನಟ ರಣ್‌ವೀರ್ ಸಿಂಗ್ ಅವರು ಮಾಜಿ ಕ್ರಿಕೆಟ್ ದಂತಕಥೆ ಕಪಿಲ್ ದೇವ್ ಅವರ ಜೀವನಚರಿತ್ರೆ ಆಧಾರಿತ '83' ಬಯೋಪಿಕ್‌ನಲ್ಲಿ ನಟಿಸುತ್ತಿದ್ದಾರೆ. ಈ ಚಿತ್ರದ ಹೋಮ್‌ವರ್ಕ್ ಎಂಬಂತೆ ನಟ ರಣ್‌ವೀರ್ ಸಿಂಗ್ ಅವರು ಕಪಿಲ್ ದೇವ್ ಅವರ ಮನೆಯಲ್ಲಿ ಇದ್ದು ಸ್ವತಃ ಅವರಿಂದಲೇ ತರಬೇತಿ ಪಡೆದಿದ್ದಾರೆ. ಸಾಕಷ್ಟು ಪೂರ್ವ ಸಿದ್ಧತೆ ಮಾಡಿಕೊಂಡೇ ನಟ ರಣ್‌ವೀರ್ ಸಿಂಗ್ ಅವರು ಕಪಿಲ್ ದೇವ್ ಬಯೋಪಿಕ್ ಚಿತ್ರೀಕರಣಕ್ಕೆ ಸಜ್ಜಾಗಿದ್ದಾರೆ.

ಇನ್ನು ನಟಿ ದೀಪಿಕಾ ಪಡುಕೋಣೆ ಅವರು ಈ ಚಿತ್ರದಲ್ಲಿ ನಾಯಕ ರಣ್‌ವೀರ್ ಸಿಂಗ್ ಪತ್ನಿಯ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಕಪಿಲ್ ದೇವ್ ಪತ್ನಿ ರೋಮಿ ದೇವ್ ಪಾತ್ರದಲ್ಲಿ ದೀಪಿಕಾ ಪಡುಕೋಣೆ ಮಿಂಚಲಿದ್ದಾರೆ. ಇತ್ತೀಚೆಗೆ ನಟ ರಣ್‌ವೀರ್ ಸಿಂಗ್ ಹಾಗೂ ನಟಿ ದೀಪಿಕಾ ಪಡುಕೋಣೆ ಚಿತ್ರದ ಪೂರ್ವಭಾವಿ ಸಿದ್ಧತೆ ಎಂಬಂತೆ ಕ್ರಿಕೆಟ್ ಆಟ ಆಡಿದ್ದಾರೆ. ಆ ವೇಳೆ ದೀಪಿಕಾ ಅವರು ತಮ್ಮ ಗಂಡ, ನಟ ರಣ್‌ವೀರ್ ಸಿಂಗ್ ಅವರಿಗೆ ಆಕಸ್ಮಿಕವಾಗಿ ಬ್ಯಾಟ್‌ನಲ್ಲಿ ಹೊಡೆದಿದ್ದಾರೆ. ಅಂದರೆ, ಅವರು ಬೀಸಿದ ಬ್ಯಾಟ್ ರಣ್‌ವೀರ್ ಸಿಂಗ್ ಅವರಿಗೆ ಬಡಿದಿದೆ.

ಈ ವೀಡಿಯೋವನ್ನು ತಮ್ಮ ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಮಾಡಿರುವ ನಟ ರಣ್‌ವೀರ್ ಸಿಂಗ್ ಅವರು "ಇದು ನನ್ನ ಜೀವನದ ಕಥೆ; ರೀಲ್ ಮತ್ತು ರಿಯಲ್.." ಎಂದು ಅದರ ಜೊತೆ ಬರೆದುಕೊಂಡಿದ್ದಾರೆ. ರಣ್‌ವೀರ್ ಸಿಂಗ್ ಮಾಡಿರುವ ಈ ಪೋಸ್ಟ್, ಇದೀಗ ಭಾರೀ ವೈರಲ್ ಆಗಿದೆ. ನಟಿ ದೀಪಿಕಾ ಅವರು ರಣ್‌ವೀರ್ ಸಿಂಗ್ ಅವರ ಮೇಲೆ ಸವಾರಿ ಮಾಡುತ್ತಾರೆ ಎಂದು ಜನರು ನಂಬುವಂತಾಗಿದೆ. ರಣ್‌ವೀರ್ ಸಿಂಗ್ ತಮಾಷೆಗೆ ಮಾಡಿರುವ ಈ ಟ್ವೀಟ್, ಬಾಲಿವುಡ್ ಅಂಗಳ ಹಾಗೂ ಸಿನಿಪ್ರೇಕ್ಷಕರಲ್ಲಿ ಕೆಲವರಿಗೆ ತಮಾಷೆಗೆ ಎಂಬುದು ಅರ್ಥವಾಗಿಲ್ಲ ಎಂಬುದು ಅವರು ಮಾಡಿರುವ ಕಾಮೆಂಟ್ ಮೂಲಕ ಅರ್ಥವಾಗುತ್ತದೆ.

ಅಂದಹಾಗೆ, ನಟ ರಣ್‌ವೀರ್ ಸದ್ಯಕ್ಕೆ '83' ಚಿತ್ರದಲ್ಲಿ ಬ್ಯುಸಿಯಾಗಿದ್ದರೆ ನಟಿ ದೀಪಿಕಾ ಮೇಘನಾ ಗುಲ್ಜಾರ್ ನಿರ್ದೇಶನದ 'ಚಪಕ್' ಸಿನಿಮಾದ ಶೂಟಿಂಗ್‌ನಲ್ಲಿ ಬ್ಯುಸಿಯಾಗಿದ್ದಾರೆ. 43 ದಿನಗಳ ಕಾಲ ಚಪಕ್ ಸಿನಿಮಾ ಶೂಟಿಂಗ್‌ನಲ್ಲಿ ನಿರತರಾಗಿದ್ದ ನಟಿ ದೀಪಿಕಾ, ಸದ್ಯದಲ್ಲೇ ತಮ್ಮ ಪತಿ ರಣ್‌ವೀರ್ ಸಿಂಗ್ ನಾಯಕತ್ವದ '83' ಚಿತ್ರೀಕರಣದಲ್ಲಿ ತೊಡಗಿಸಿಕೊಳ್ಳಲಿದ್ದಾರೆ. ಒಟ್ಟಿನಲ್ಲಿ ಮದುವೆಗಿಂತ ಮೊದಲು ಹಾಗೂ ನಂತರ ಸಹ, ದೀಪಿಕಾ-ರಣ್‌ವೀರ್ ಒಟ್ಟಿಗೇ ಸಿನಿಮಾಗಳಲ್ಲಿ ನಟಿಸುತ್ತ ತಮ್ಮ ಅಭಿಮಾನಿಗಳಿಗೆ ಸಂತಸ ಧಾರೆಯೆರೆಯುತ್ತಿದ್ದಾರೆ.