ವೈರಲ್ ಆಯಿತು ಶ್ರೀದೇವಿ ಖಾತೆಯಿಂದಾದ ಟ್ವೀಟ್

'ಅವರು ಈ ಜಗತ್ತಿಗೆ ಚಾಂದಿನಿ... ನನಗೆ ಮಾತ್ರ ಆಕೆ ಸರ್ವಸ್ವ.. ನನ್ನ ಪ್ರೀತಿ, ನನ್ನ ಗೆಳತಿ, ಪತ್ನಿ, ಇಬ್ಬರು ಮಕ್ಕಳ ತಾಯಿಯನ್ನು ಕಳೆದುಕೊಂಡಿದ್ದೇನೆ. ಆಕೆ ಇಲ್ಲದ ಕೊರತೆಯನ್ನು ಮಾತಿನಲ್ಲಿ ಹೇಳಲು ಸಾಧ್ಯವಾಗುತ್ತಿಲ್ಲ' ಎಂದು ನಿರ್ಮಾಪಕ, ನಟಿ ಶ್ರೀದೇವಿ ಪತಿ ಬೋನಿ ಕಪೂರ್ ಟ್ವೀಟ್ ಮಾಡಿದ್ದಾರೆ.

ಬುಧವಾರ (ಫೆ.28) ಅಂತ್ಯಕ್ರಿಯೆ ಪೂರ್ಣಗೊಂಡ ಬಳಿಕ ಶ್ರೀದೇವಿ ಟ್ಟಿಟರ್ ಖಾತೆಯಿಂದ ಅವರು ಟ್ವೀಟ್ ಮಾಡಿದ್ದಾರೆ. ಶ್ರೀದೇವಿ ಮೃತಪಟ್ಟ ಬಳಿಕ ಅವರ ಖಾತೆಯಿಂದ ಟ್ವೀಟ್ ಆದ ಮೊದಲ ಪೋಸ್ಟ್ ಇದು. ಶ್ರೀದೇವಿ ಬೆಳ್ಳಿಪರದೆ ಮೇಲೆ ಹೊಳೆಯುತ್ತಲೇ ಇರುತ್ತಾರೆ. ಇಂದು ದೈಹಿಕವಾಗಿ ಅವರು ನಮ್ಮ ನಡುವೆ ಇಲ್ಲ. ಅವರ ಆತ್ಮಕ್ಕೆ ಶಾಂತಿ ಸಿಗಲಿ ಎಂದು ಪ್ರಾರ್ಥಿಸುತ್ತಿರುವುದಾಗಿ ಟ್ವಿಟರ್‌ನಲ್ಲಿ ಬೋನಿ ಕಪೂರ್ ಬರೆದಿದ್ದಾರೆ.

pic.twitter.com/VNgw7FY9rF — SRIDEVI BONEY KAPOOR (@SrideviBKapoor) February 28, 2018 'ಈ ನೋವಿನ ಸಮಯದಲ್ಲಿ ಅರ್ಜುನ್ ಕಪೂರ್, ಅನ್ಷುಲಾ ನನ್ನ ಬೆನ್ನಿಗೆ ನಿಂತು ನನಗೆ, ಜಾನ್ವಿ, ಖುಷಿಗೆ ತುಂಬ ಧೈರ್ಯ ತುಂಬಿದರು' ಎಂದು ಟ್ವೀಟ್‌ನಲ್ಲಿ ಹೇಳಿದ್ದಾರೆ. ತನ್ನ ಇಬ್ಬರು ಹೆಣ್ಣು ಮಕ್ಕಳು ಜಾನ್ವಿ, ಖುಷಿಯನ್ನು ಎಚ್ಚರಿಕೆಯಿಂದ ನೋಡಿಕೊಳ್ಳುವುದು ತನ್ನ ಮೊದಲ ಕರ್ತವ್ಯ. ಸಿನಿಮಾ ತಾರೆಗಳ ಜೀವನಕ್ಕೆ ತೆರೆಬೀಳುವುದಿಲ್ಲ, ಬೆಳ್ಳಿಪರದೆ ಮೇಲೆ ಅವರು ಯಾವಾಗಲೂ ಜೀವಂತವಾಗಿ ಇರುತ್ತಾರೆ. ಶ್ರೀದೇವಿ ಇನ್ನಿಲ್ಲ ಎಂಬುದನ್ನು ನಂಬಲು ಸಾಧ್ಯವಾಗುತ್ತಿಲ್ಲ ಎಂದಿದ್ದಾರೆ. ಶ್ರೀದೇವಿ ಖಾತೆಯಿಂದ ಪೋಸ್ಟ್ ಆದ ಟ್ವೀಟ್ ಸಾವಿರಾರು ರೀ-ಟ್ವೀಟ್, ಲೈಕ್‌ಗಳಿಂದ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗಿದೆ.