ಉದ್ಯಮಿಗೆ 24 ಲಕ್ಷ ರೂ. ಪಂಗನಾಮ : ಶಿಲ್ಪಾ, ಪತಿ ವಿರುದ್ಧ ಕೇಸ್‌

ಭಿವಂಡಿ: ಇಲ್ಲಿನ ಬೆಡ್‌ಶೀಟ್‌ ಉದ್ಯಮಿಯೊಬ್ಬರು ಬಾಲಿವುಡ್‌ ನಟಿ ಶಿಲ್ಪಾ ಶೆಟ್ಟಿ ಮತ್ತವರ ಪತಿ ರಾಜ್‌ ಕುಂದ್ರಾ ಸೇರಿದಂತೆ ಬೆಸ್ಟ್‌ ಡೀಲ್‌ ಟಿವಿ ಚಾನೆಲ್‌ನ 3 ನಿರ್ದೇಶಕರ ವಿರುದ್ಧ ಪೊಲೀಸ್‌ ಠಾಣೆಯಲ್ಲಿ ಕ್ರಿಮಿನಲ್‌ ಕೇಸ್‌ ದಾಖಲಿಸಿದ್ದಾರೆ. ತಮಗೆ ಈ ಐವರಿಂದ 24.12 ಲಕ್ಷ ರೂ. ವಂಚನೆಯಾಗಿದೆ ಎಂದು ಉದ್ಯಮಿ ರವಿ ಭಾಲೋಟಿಯಾ ಆರೋಪಿಸಿದ್ದಾರೆ.

ಬೆಸ್ಟ್‌ ಡೀಲ್‌ ಟಿವಿ ಚಾನೆಲ್‌ ಒಂದು ಹೋಂ ಶಾಪಿಂಗ್‌ ಚಾನೆಲ್‌ ಆಗಿದ್ದು, ಶಿಲ್ಪಾ ಶೆಟ್ಟಿ ಮತ್ತವರ ಪತಿ ರಾಜ್‌ ಕುಂದ್ರಾ ಇದರ ಪಾಲುದಾರಿಕೆ ಹೊಂದಿರುವುದರಿಂದ ಅವರ ಮೇಲೆ ವಂಚನೆ ಪ್ರಕರಣ ದಾಖಲಾಗಿದೆ. ಉದ್ಯಮಿಯ ದೂರಿನ ಪ್ರಕಾರ ಬೆಸ್ಟ್‌ ಡೀಲ್‌ ಚಾನೆಲ್‌ನ ಮಾಜಿ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಗೌರವ್‌ ಗರ್ಗ್‌ 2015ರ ಮೇ ತಿಂಗಳಲ್ಲಿ ತಮಗೆ ಕರೆ ಮಾಡಿ, ಚಾನಲ್‌ ಮೂಲಕ ಬೆಡ್‌ಶೀಟ್‌ಗಳನ್ನು ಮಾರುವಂತೆ ಕೇಳಿಕೊಂಡರು. ಕಂಪನಿಯ ನಿರ್ದೇಶಕರನ್ನು ಭೇಟಿ ಮಾಡಿದ ಬಳಿಕ ವ್ಯವಹಾರಕ್ಕೆ ಒಪ್ಪಿಗೆ ಸೂಚಿಸಿದ ರವಿ, ಚಾನೆಲ್‌ ಮೂಲಕ ತಮ್ಮ ಬೆಡ್‌ಶೀಟ್‌ಗಳನ್ನು ಮಾರಲು ಮುಂದಾದರು.

ಪ್ರಾರಂಭದಲ್ಲಿ ರವಿಗೆ ನೀಡಬೇಕಾದ ಹಣವನ್ನು ಅಚ್ಚುಕಟ್ಟಾಗಿಯೇ ಪಾವತಿಸಿದ ಚಾನೆಲ್‌, ನಂತರದ ದಿನಗಳಲ್ಲಿ ಬಾಕಿ ಹಣವನ್ನು ಉಳಿಸಿಕೊಂಡಿತು ಎಂದು ಆರೋಪಿಸಿದ್ದಾರೆ. ಒಟ್ಟು 24.12 ಲಕ್ಷ ರೂ. ಬಾಕಿ ಹಣವನ್ನು ನೀಡದೆ ವಂಚಿಸುವುದಲ್ಲದೇ, ಟಿವಿ ಚಾನೆಲ್‌ನ್ನು ತಮ್ಮ ಗಮನಕ್ಕೆ ತರದೆ ಮುಚ್ಚಲಾಗಿದೆ ಎಂದು ದೂರಿದ್ದಾರೆ.

ಸದ್ಯಕ್ಕೆ ಕೊಂಗೊನ್ ಪೊಲೀಸ್‌ ಠಾಣೆಯಲ್ಲಿ ಶಿಲ್ಪಾ ಶೆಟ್ಟಿ, ರಾಜ್‌ ಕುಂದ್ರಾ, ದರ್ಶಿತ್‌ ಶಾಹ್‌, ಉದಯ್‌ ಕೊಠಾರಿ ಮತ್ತು ವೇದಾಂತ್‌ ಬಲ್ಲಿ ವಿರುದ್ಧ ವಂಚನೆ ಪ್ರಕರಣ ದಾಖಲಾಗಿದ್ದು, ಪೊಲೀಸರು ವಿಚಾರಣೆ ನಡೆಸಲಿದ್ದಾರೆ.