ಅವೆಂಜರ್ಸ್‌ನಲ್ಲಿ 40 ಕೆ.ಜಿ ತೂಕದ ಸಿಲಿಕಾನ್‌ ಸೂಟ್‌ ಧರಿಸಿದ್ದ ಕ್ರಿಸ್‌ ಹೆಮ್ಸ್‌ವರ್ತ್‌

ನಿಜ ಜೀವನದಲ್ಲಿ ತೆಳ್ಳಗಿರುವ ಹಾಲಿವುಡ್‌ ನಟ ಕ್ರಿಸ್‌ ಹೆಮ್ಸ್‌ವರ್ತ್‌ ಅವೆಂಜರ್ಸ್‌ ಎಂಡ್‌ಗೇಮ್‌ ಸಿನಿಮಾದ ಥೋರ್‌ ಪಾತ್ರದಲ್ಲಿ ಅಷ್ಟೊಂದು ದಪ್ಪವಾಗಿ ಕಾಣಿಸಿಕೊಂಡಿದ್ದು ಹೇಗೆ, ಅವರು ದೇಹ ತೂಕ ಜಾಸ್ತಿ ಮಾಡಿಕೊಂಡಿದ್ದಾರೆಯೇ ಎಂಬೆಲ್ಲಾ ಪ್ರಶ್ನೆಗಳನ್ನು ಅವರ ಅಭಿಮಾನಿಗಳು ಕೇಳುತ್ತಿದ್ದರು. ಅದಕ್ಕೆ ಕೆಲವರು ಅವರ ಆಹಾರಶೈಲಿಯಿಂದ ಅವರ ದೇಹ ದಪ್ಪಗಾಗಿದೆ ಎಂದು ಹಾರಿಕೆಯ ಉತ್ತರ ನೀಡುತ್ತಿದ್ದರು. ಇದೀಗ ಸ್ವತಃ ಕ್ರಿಸ್‌ ಹೆಮ್ಸ್‌ವರ್ತ್‌ ಅವರೇ ಈ ಪ್ರಶ್ನೆಗೆ ಉತ್ತರ ನೀಡಿದ್ದು, ಆ ಪಾತ್ರಕ್ಕಾಗಿ ನಾನು ಶೂಟಿಂಗ್‌ ವೇಳೆ 40 ಕೆ.ಜಿ ತೂಗುವ ಸಿಲಿಕಾನ್‌ನ ದಪ್ಪನೆಯ ಕೃತಕ ಸೂಟ್‌ ಧರಿಸಿದ್ದೆ ಎಂದಿದ್ದಾರೆ.

ಬ್ಯಾಕ್‌ ಝಿಪ್‌ ಇದ್ದ ಆ ಕೃತಕ ಸೂಟ್‌ನಲ್ಲಿ ನಾನು ಸ್ಥೂಲಕಾಯನಂತೆ ಕಾಣುತ್ತಿದ್ದೆ. ಅದನ್ನು ಧರಿಸಿದ ಮೇಲೆ ನನಗೆ ನನ್ನ ಪತ್ನಿ ಎಲ್ಸಾ ಪೆಟಕಿ ಗರ್ಭಿಣಿಯಾಗಿದ್ದಾಗ ಆಕೆಗೆ ಯಾವ ರೀತಿಯ ಫೀಲ್‌ ಆಗುತ್ತಿತ್ತು ಎಂದು ಅನಿಸಿತು. ಆ ಸಿನಿಮಾದಲ್ಲಿ ನಾನು ವಿಭಿನ್ನವಾಗಿ ನಡೆಯಬೇಕು ಎಂಬ ಕಾರಣಕ್ಕೆ ನನ್ನ ಮಣಿಗಂಟು ಮತ್ತು ಪಾದಗಳಿಗೆ ವೇಯ್ಟ್‌್ಸ ಹಾಕಲಾಗಿತ್ತು. ಆ ಪಾತ್ರಕ್ಕೆ ಬೇಕಾಗಿದ್ದ ಈ ರೂಪಾಂತರವನ್ನು ನಾನು ಎಂಜಾಯ್‌ ಮಾಡಿದ್ದೇನೆ ಎಂದು ಕ್ರಿಸ್‌ ವಿವರಿಸಿದ್ದಾರೆ.