ಸೀರೆಯುಟ್ಟು ಟ್ರೋಲ್‌ ಆದ 'ದಂಗಲ್‌' ಬೆಡಗಿ ಫಾತಿಮಾ

'ದಂಗಲ್‌' ಚಿತ್ರದ ಬೆಡಗಿ ಫಾತಿಮಾ ಸನಾ ಶೇಕ್‌ ಮತ್ತೊಮ್ಮೆ ಸುದ್ದಿಯಲ್ಲಿದ್ದಾರೆ. ಒಂದಿಷ್ಟು ತಿಂಗಳ ಹಿಂದೆ ಬಿಕಿನಿ ತೊಟ್ಟು ಹಲವರ ಕೆಂಗಣ್ಣಿಗೆ ಗುರಿಯಾಗಿದ್ದ ಫಾತಿಮಾ ಈಗ ಸೀರೆಯುಟ್ಟು ಟ್ರೋಲ್‌ಗಳಿಗೆ ಆಹಾರವಾಗಿದ್ದಾರೆ.

ಅಮೀರ್‌ ಖಾನ್‌ ಅಭಿನಯದ ದಂಗಲ್‌ ಚಿತ್ರದಲ್ಲಿ ಕುಸ್ತಿಪಟು ಪಾತ್ರದಲ್ಲಿ ಮಿಂಚಿದ ಫಾತಿಮಾ ತಮ್ಮ ಇನ್‌ಸ್ಟಾಗ್ರಾಮ್‌ನಲ್ಲಿ ಸೀರೆಯುಟ್ಟ ಫೋಟೋವನ್ನು ಅಪ್ಲೋಡ್‌ ಮಾಡಿದ್ದಾರೆ. ಬಹುಶಃ ಫಾತಿಮಾಗೆ ಈ ಫೋಟೋ ಚರ್ಚಿತವಾಗುತ್ತೆ ಎಂಬ ಸುಳಿವು ಗೊತ್ತಿತ್ತು ಅನಿಸುತ್ತೆ. ಹಾಗಾಗಿ ಖುದ್ದು 'ಶೇಮ್‌ಲೆಸ್‌ ಸೆಲ್ಫೀ' ಎಂಬ ಕ್ಯಾಪ್ಶನ್‌ ನೀಡಿದ್ದಾರೆ.

ಈ ಫೋಟೋದಲ್ಲಿ ಫಾತಿಮಾ ಸಖತ್ತಾಗಿ ಕಾಣುತ್ತಿದ್ದರೂ, ಕೆಲ ನೆಟ್ಟಿಗರು ಆಕ್ರೋಶಭರಿತ ಕಾಮೆಂಟ್‌ಗಳನ್ನು ಮಾಡಿದ್ದಾರೆ. ಒಬ್ಬರು ಸೀರೆ ಬಿಟ್ಟು ಬುರ್ಖಾ ತೊಡುವಂತೆ ಸಲಹೆ ನೀಡಿದರೆ, ಮತ್ತೊಬ್ಬರು ನಿಜಕ್ಕೂ ನಾಚಿಕೆಗೇಡು ಎಂಬ ಕಾಮೆಂಟ್‌ಗಳನ್ನು ಬರೆದಿದ್ದಾರೆ.

  ಕೆಲ ತಿಂಗಳ ಹಿಂದಷ್ಟೇ ಅಂದರೆ ರಂಜಾನ್‌ ಸಮಯದಲ್ಲಿ ಫಾತಿಮಾ ಬಿಕಿನಿ ತೊಟ್ಟ ಫೋಟೋವೊಂದನ್ನು ಅಪ್ಲೋಡ್‌ ಮಾಡಿದ್ದರು. ಆಗ ಫಾತಿಮಾ ವಿರುದ್ಧ ಸುಮಾರು ಜನ ಆಕ್ರೋಶ ವ್ಯಕ್ತಪಡಿಸಿದ್ದು ನಿಮಗೆಲ್ಲ ಗೊತ್ತೇ ಇದೆ. ಈಗ ಸಂಸ್ಕಾರಿಯಂತೆ ಸೀರೆಯುಟ್ಟರೂ ಜನರಿಗೆ ಸಮಾಧಾನವಿಲ್ಲ. ಸದ್ಯಕ್ಕೆ ಫಾತಿಮಾ 'ಥಗ್ಸ್‌ ಆಫ್‌ ಹಿಂದೂಸ್ತಾನ್‌' ಚಿತ್ರದಲ್ಲಿ ಬಿಝಿಯಾಗಿದ್ದಾರೆ.