ಅವಳ ಜತೆ ಏಕೆ ನನ್ನ ಹೋಲಿಕೆ: ದೀಪಿಕಾ

ಬಾಲಿವುಡ್‌ ಅಂಗಳದಲ್ಲಿ ಒಂದರ ನಂತರ ಮತ್ತೊಂದು ಹಿಟ್‌ ಚಿತ್ರಗಳನ್ನು ನೀಡಿದ ದೀಪಿಕಾ ಪಡುಕೋಣೆ, ಹಾಲಿವುಡ್‌ನಲ್ಲೂ ಭರ್ಜರಿಯಾಗೇ ಕ್ಲಿಕ್‌ ಆಗಿದ್ದಾರೆ. 'xXx: Return of Xander Cage' ಚಿತ್ರದ ಮೂಲಕ ಹಾಲಿವುಡ್‌ಗೆ ಪಾದಾರ್ಪಣೆ ಮಾಡಿದ ದೀಪಿಕಾ, ಎರಡು ದೋಣಿಯ ಮೇಲೆ ಜಾಗರೂಕತೆಯಿಂದ ಪ್ರಯಾಣ ಮುಂದುವರೆಸಿದ್ದಾರೆ.

ಈ ನಡುವೆ ದೀಪಿಕಾ ಮತ್ತು ಪ್ರಿಯಾಂಕಾ ಚೋಪ್ರಾ ನಡುವೆ ಏನೋ ಸರಿಯಿಲ್ಲ ಎಂಬ ಮಾತುಗಳು ಬಹಳ ದಿನಗಳಿಂದ ಕೇಳಿಬರುತ್ತಿವೆ. ಈ ಇಬ್ಬರೂ ನಟಿಯರು ಹಾಲಿವುಡ್‌ಗೆ ಪಾದಾರ್ಪಣೆ ಮಾಡಿರುವುದೇ ಇದಕ್ಕೆ ಕಾರಣ ಅಂತಿವೆ ಕೆಲ ಮೂಲಗಳು. ಇವರಿಬ್ಬರ ನಡುವೆ ಜನಪ್ರಿಯತೆ, ಸಾಧನೆ, ನಟನೆ ಹಾಗೂ ಚಿತ್ರಗಳ ವಿಷಯವಾಗಿ ಹೋಲಿಕೆಗಳು ನಡೆಯುತ್ತಿವೆ. ಹಾಗಾಗಿ ದೀಪಿಕಾ ಮತ್ತು ಪ್ರಿಯಾಂಕಾ ನಡುವೆ ಶೀತಲ ಸಮರ ಏರ್ಪಟ್ಟಿದೆ ಎಂಬ ಸುದ್ದಿ ಬಹಳ ದಿನಗಳಿಂದ ಚಿತ್ರರಂಗದಲ್ಲಿ ಗಿರಕಿ ಹೊಡೆಯುತ್ತಿದೆ.

ಆದರೆ ಈ ಕುರಿತು ದೀಪಿಕಾರನ್ನ ನೇರವಾಗಿ ಪ್ರಶ್ನಿಸಿದಾಗ ಅವರು ಕೊಡುವ ಉತ್ತರವೇ ಬೇರೆ. 'ಪ್ರಿಯಾಂಕ ಚೋಪ್ರಾ ಹೇಗೆ ಎಂಬುವುದು ನನಗೆ ಗೊತ್ತು. ನಾನು ಅವರನ್ನು ವೈಯಕ್ತಿಕವಾಗಿ ಅರಿತುಕೊಂಡಿದ್ದೇನೆ. ನಮ್ಮಿಬ್ಬರ ಮಧ್ಯೆ ಹೋಲಿಕೆ ಮಾಡುವುದು ನಿಜಕ್ಕೂ ವಿಲಕ್ಷಣ. ಚಿತ್ರರಂಗದಲ್ಲಿ ಪ್ರಿಯಾಂಕ ತಮ್ಮದೇ ಆದ ಅವಕಾಶ ಮತ್ತು ಬೇಡಿಕೆಯನ್ನು ಹೊಂದಿದ್ದಾರೆ. ನನ್ನೊಂದಿಗೆ ಅವರನ್ನು ಹೋಲಿಕೆ ಮಾಡುವುದು ಸರಿಯಲ್ಲ' ಎಂದು ದೀಪಿಕಾ ಮಾಧ್ಯಮಗಳಿಗೆ ಪ್ರತಿಕ್ರಿಯಿಸಿದ್ದಾರೆ.

ಸದ್ಯಕ್ಕೆ ಗುಳಿಕೆನ್ನೆ ಚೆಲುವೆ ದೀಪಿಕಾ ತಮ್ಮ ಹಾಲಿವುಡ್‌ ಚಿತ್ರದ ಪ್ರಮೋಶನ್‌ನಲ್ಲಿ ಸಖತ್‌ ಬಿಜಿಯಾಗಿದ್ದಾರೆ. ಇದರ ಜತೆ ಸಂಜಯ್‌ ಲೀಲಾ ಬನ್ಸಾಲಿ ನಿರ್ದೇಶನದ 'ಪದ್ಮಾವತಿ' ಚಿತ್ರದಲ್ಲೂ ತೊಡಗಿಸಿಕೊಂಡಿದ್ದಾರೆ.