ಸಲ್ಮಾನ್ ಖಾನ್ ಜತೆ ಇನ್ನು ನಟಿಸುವುದು ಕಷ್ಟ ಎಂದ ದಿಶಾ ಪಟಾನಿ

ಬಾಲಿವುಡ್ ಸೂಪರ್ ಸ್ಟಾರ್ ಸಲ್ಮಾನ್ ಖಾನ್ ಜತೆಗೆ ಕೆಲಸ ಮಾಡುವುದು ಇನ್ನು ಮುಂದೆ ಬಹುಶಃ ಸಾಧ್ಯವಾಗಲ್ಲ ಎಂದಿದ್ದಾರೆ ನಟಿ ದಿಶಾ ಪಟಾನಿ. ಸಲ್ಮಾನ್ ಖಾನ್ ನಟಿಸಿದ 'ಭಾರತ್' ಸಿನಿಮಾದಲ್ಲಿ ದಿಶಾ ಮುಖ್ಯಪಾತ್ರವೊಂದನ್ನು ಪೋಷಿಸಿದ್ದಾರೆ. ಈ ಸಿನಿಮಾದ ಪ್ರಮೋಷನ್‌ನಲ್ಲಿ ಭಾಗಿಯಾಗಿದ್ದ ಅವರು ಮಾಧ್ಯಮಗಳ ಜತೆಗೆ ಕೆಲವು ಕುತೂಹಲಕರ ಸಂಗತಿಗಳನ್ನು ಹಂಚಿಕೊಂಡಿದ್ದಾರೆ.

ಭವಿಷ್ಯದಲ್ಲಿ ಸಲ್ಮಾನ್ ಜತೆಗೆ ಮತ್ತೆ ನಟಿಸಲು ಬಹುಶಃ ಸಾಧ್ಯವಾಗಲ್ಲವೇನೋ. ಯಾಕೆಂದರೆ ನನಗೂ ಮತ್ತು ಸಲ್ಮಾನ್ ಅವರ ವಯಸ್ಸಿನಲ್ಲಿ ಸಾಕಷ್ಟು ಅಂತರ ಇದೆ. ನಿರ್ದೇಶಕ ಅಲಿ ಅಬ್ಬಾಸ್ ನನಗೆ ಫೋನ್ ಮಾಡಿದಾಗಲೂ ಇದೇ ಸಂಗತಿ ಹೇಳಿದರು. ಸಿನಿಮಾದಲ್ಲಿ ನನ್ನದು ಸರ್ಕ ಕಲಾವಿದೆಯ ಪಾತ್ರ ಎಂದು ಹೇಳಿದ್ದಕ್ಕೆ ಒಪ್ಪಿಕೊಂಡೆ ಎಂದಿದ್ದಾರೆ.

ಈ ಚಿತ್ರದಲ್ಲಿ ನಾನು ಸಲ್ಮಾನ್ ಜತೆಗೆ ಕೆಲವು ಸನ್ನಿವೇಶಗಳಲ್ಲಿ, ಒಂದು ಹಾಡಿನಲ್ಲಿ ನಟಿಸಿದ್ದೇನೆ. ಯಾಕೆಂದರೆ ಈ ಹಾಡು ಬರುವಾಗ ಸಿನಿಮಾದಲ್ಲಿ ಸಲ್ಮಾನ್ 30 ವರ್ಷದ ಯುವಕನಂತೆ ಕಾಣುತ್ತಾರೆ. ಅಂತಹ ಸಂದರ್ಭಗಳಲ್ಲಿ ಅವರೊಂದಿಗೆ ನಾನು ನಟಿಸಲು ಯಾವುದೇ ತೊಂದರೆ ಇಲ್ಲ. ಆದರೆ ಮುಂದೆ ಇಂತಹದ್ದೇ ಪಾತ್ರಗಳು ಸಿಗುತ್ತವೆ ಎಂದು ಹೇಳಲು ಸಾಧ್ಯವಿಲ್ಲ. ಹಾಗಾಗಿ ಸಲ್ಮಾನ್ ಜತೆಗೆ ಇದೇ ನನ್ನ ಕೊನೆಯ ಸಿನಿಮಾ ಆಗಬಹುದು ಎಂದಿದ್ದಾರೆ ದಿಶಾ ಪಟಾನಿ.

'ಭಾರತ್' ಸಿನಿಮಾದಲ್ಲಿ ಕತ್ರಿನಾ ಕೈಫ್ ಹೀರೋಯಿನ್. ರಂಜಾನ್ ಪ್ರಯುಕ್ತ ಜೂನ್ 7ರಂದು ಈ ಸಿನಿಮಾ ಪ್ರೇಕ್ಷಕರ ಮುಂದೆ ಬರುತ್ತಿದೆ. ಈ ಸಿನಿಮಾ ಬಗ್ಗೆ ಸಲ್ಮಾನ್ ಖಾನ್ ಅಭಿಮಾನಿಗಳಲ್ಲಿ ಬಹಳಷ್ಟು ನಿರೀಕ್ಷೆಗಳಿವೆ.