ನನ್ನ ಬಯೋಪಿಕ್‌ಗೆ ಕಂಗನಾ ರನಾವತ್‌ ಬೆಸ್ಟ್‌ ಎಂದ ದ್ಯುತಿ ಚಾಂದ್‌

ಭಾರತದ ಹೆಮ್ಮೆಯ ಕ್ರೀಡಾಪಟು ದ್ಯುತಿ ಚಾಂದ್‌, ತಮ್ಮ ಕುರಿತು ನಿರ್ಮಾಣವಾಗಲಿರುವ ಬಯೋಪಿಕ್‌ನಲ್ಲಿ ಕಂಗನಾ ರನಾವತ್‌ ತಮ್ಮ ಪಾತ್ರ ನಿರ್ವಹಿಸಲಿ ಎಂದು ಬಯಸಿದ್ದಾರೆ. ಈ ಬಯೋಪಿಕ್‌ಗೆ ಯಾರು ಆಯ್ಕೆಯಾಗುತ್ತಾರೆ ಎಂದು ನನಗೆ ಗೊತ್ತಿಲ್ಲ. ಆದರೆ ಆನ್‌ಸ್ಕ್ರೀನ್‌ನಲ್ಲಿ ನನ್ನ ಪಾತ್ರವನ್ನು ಕಂಗನಾ ತುಂಬಾ ಪರ್ಫೆಕ್ಟ್ ಆಗಿ ನಿರ್ವಹಿಸಬಹುದು ಎಂದು ನನಗೆ ಅನಿಸುತ್ತದೆ. ಓರ್ವ ನಟಿಯಾಗಿ ಆಕೆ ನನಗೆ ತುಂಬಾ ಇಷ್ಟ ಎಂದು ಅವರು ಹೇಳಿದ್ದಾರೆ.

100 ಮೀ ಟ್ರ್ಯಾಕ್‌ನಲ್ಲಿ ಅತ್ಯಂತ ಕಡಿಮೆ ಅವಧಿಯಲ್ಲಿ ರನ್ನಿಂಗ್‌ ಮಾಡಿ ದಾಖಲೆ ಸ್ಥಾಪಿಸಿರುವ ಮತ್ತು ಏಷ್ಯನ್‌ ಗೇಮ್ಸ್‌ನಲ್ಲಿ ಎರಡು ಬೆಳ್ಳಿ ಪದಕ ಗೆದ್ದು ಸಾಧನೆ ಮಾಡಿರುವ ಒಲಿಂಪಿಕ್‌ ಸ್ಟ್ರಿಂಟರ್‌ ದ್ಯುತಿ ಇತ್ತೀಚೆಗೆ ತಾವು ಸಲಿಂಗ ಸಂಬಂಧದಲ್ಲಿರುವುದನ್ನು ಹೇಳಿ ಮತ್ತೆ ಸುದ್ದಿಯಲ್ಲಿದ್ದರು. ಈ ವಿಷಯವನ್ನು ಮುಕ್ತವಾಗಿ ಹೇಳಿಕೊಂಡ ಅವರ ಧೈರ್ಯವನ್ನು ಎಲ್ಲರೂ ಮೆಚ್ಚಿಕೊಂಡಿದ್ದರು. ಆ ನಂತರ ಅವರ ಬದುಕಿನ ಕುರಿತಾದ ಕಥೆಯಿರುವ ಸಿನಿಮಾ ನಿರ್ಮಾಣಕ್ಕೂ ಕೆಲವರು ಆಸಕ್ತಿ ತೋರಿದ್ದರು.

ಸ್ವತಃ ದ್ಯುತಿಯವರೇ ತಮ್ಮ ಬಯೋಪಿಕ್‌ ನಿರ್ಮಾಣದ ಹಕ್ಕು ಪಡೆಯಲು ಹಿರಿಯ ನಟ ಅನಿಲ್‌ ಕಪೂರ್‌ ಮತ್ತು ನಿರ್ಮಾಪಕ ರಾಕೇಶ್‌ ಓಂಪ್ರಕಾಶ್‌ ಮೆಹ್ರಾ ತಮ್ಮನ್ನು ಸಂಪರ್ಕಿಸಿದ್ದರು ಎಂದು ಹೇಳಿದ್ದರು. ಈ ಬಯೋಪಿಕ್‌ ನಿರ್ಮಾಣಕ್ಕೆ ಅವರಿನ್ನೂ ಒಪ್ಪಿಗೆ ಕೊಡದಿದ್ದರೂ, ಅದರಲ್ಲಿ ತಮ್ಮ ಪಾತ್ರವನ್ನು ಕಂಗನಾ ರನಾವತ್‌ ಮಾಡಲಿ ಎಂದು ಅವರು ಬಯಸಿದ್ದಾರೆ.

ಈ ಕುರಿತು ಪ್ರತಿಕ್ರಿಯೆ ನೀಡಿರುವ ಕಂಗನಾ ರನಾವತ್‌, ದ್ಯುತಿ ಪಾತ್ರವನ್ನು ನಾನು ಚೆನ್ನಾಗಿ ಮಾಡಬಲ್ಲೆ ಎಂದು ಅವರಿಗೆ ಅನಿಸಿರುವುದು ಅವರ ದೊಡ್ಡ ಗುಣ. ಇದಕ್ಕಾಗಿ ನಾನು ಅವರಿಗೆ ಅಭಾರಿಯಾಗಿದ್ದೇನೆ ಎಂದಿದ್ದಾರೆ. ಸೋಷಿಯಲ್‌ ಮೀಡಿಯಾದಲ್ಲೂ ಜನರು ದ್ಯುತಿ ಚಾಂದ್‌ರಂಥ ಸಾಹಸಿ ಕ್ರೀಡಾಪಟುವಿನ ಪಾತ್ರವನ್ನು ರೀಲ್‌ ಮಾತ್ರವಲ್ಲ ರಿಯಲ್‌ ಲೈಫ್‌ನಲ್ಲೂ ಸಾಹಸಿಯಾಗಿರುವ ಕಂಗನಾ ರನಾವತ್‌ ಅವರೇ ಚೆನ್ನಾಗಿ ಮಾಡಬಲ್ಲರು ಎಂಬ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.