200 KG ತೂಕವಿದ್ದ ಕೊರಿಯೋಗ್ರಾಫರ್‌ ಗಣೇಶ್‌ ಆಚಾರ್ಯ ಸ್ಲಿಮ್‌ ಆಗಿದ್ದೇ ಒಂದು ಅಚ್ಚರಿ!

ಬಾಲಿವುಡ್‌ನ ಖ್ಯಾತ ಕೊರಿಯೋಗ್ರಾಫರ್‌ ಗಣೇಶ್‌ ಆಚಾರ್ಯ ಅವರು ತಮ್ಮ ಧಡೂತಿ ದೇಹವನ್ನು ಕರಗಿಸಲು ಸಿಕ್ಕಾಪಟ್ಟೆ ಕಸರತ್ತು ಮಾಡಿದ್ದಾರೆ. ಹಲವು ವರ್ಷಗಳಿಂದ ಅವರ ಆ ಪ್ರಯತ್ನದಲ್ಲಿದ್ದಾರೆ. ಅಚ್ಚರಿ ಎಂದರೆ, ಅವರು ಬರೋಬ್ಬರಿ 98ರಿಂದ 100 ಕೆಜಿ ದೇಹ ತೂಕ ಕಡಿಮೆ ಮಾಡಿಕೊಂಡಿದ್ದಾರೆ!

ಗಣೇಶ್‌ ಆಚಾರ್ಯ ಅವರು ಇತ್ತೀಚೆಗೆ 'ದಿ ಕಪಿಲ್‌ ಶರ್ಮಾ ಶೋ' ಕಾರ್ಯಕ್ರಮಕ್ಕೆ ಅತಿಥಿಯಾಗಿ ಬಂದಿದ್ದರು. ಆಗ ಅವರು ಈ ವಿಚಾರ ಬಾಯಿ ಬಿಟ್ಟಿದ್ದಾರೆ. ಸತತ ವರ್ಕೌಟ್‌ನಿಂದಾಗಿ ತಾವು 98 ಕೆಜಿ ದೇಹದ ತೂಕ ಕಡಿಮೆ ಮಾಡಿಕೊಂಡಿರುವ ಬಗ್ಗೆ ಮಾಹಿತಿ ನೀಡಿದ್ದಾರೆ. ಅದಕ್ಕೆ ಪ್ರತಿಕ್ರಿಯಿಸಿರುವ ಕಪಿಲ್‌ ಶರ್ಮಾ, 'ಇಬ್ಬರು ವ್ಯಕ್ತಿಗಳನ್ನು ನೀವು ಮಾಯ ಮಾಡಿದ್ದೀರಿ' ಎಂದು ಕಾಮಿಡಿ ಮಾಡಿದ್ದಾರೆ.

ಅಚ್ಚರಿ ಏನೆಂದರೆ, ಕೆಲವೇ ವರ್ಷಗಳ ಹಿಂದೆ ಗಣೇಶ್‌ ಆಚಾರ್ಯ ಅವರು ಬರೋಬ್ಬರಿ 200 ಕೆಜಿ ಇದ್ದರು! 2015ರಲ್ಲಿ ಅವರು 'ಹೇ ಬ್ರೋ' ಚಿತ್ರದಲ್ಲಿ ನಟಿಸಿದ್ದರು. ಆ ಸಿನಿಮಾಗಾಗಿ ಅವರು 30ರಿಂದ 40 ಕೆಜಿ ತೂಕ ಹೆಚ್ಚಿಸಿಕೊಂಡಿದ್ದರು. ಆಗ ಅವರ ದೇಹ ತೂಕ 200 ಕೆಜಿ ಮುಟ್ಟಿತ್ತು. ನಂತರ ಅವರು ಸ್ಲಿಮ್‌ ಆಗುವತ್ತ ಗಮನ ಹರಿಸಿದರು. ಈಗ 98 ಕೆಜಿ ಕಡಿಮೆ ಮಾಡಿಕೊಂಡಿರುವ ಅವರನ್ನು ಕಂಡರೆ ಎಲ್ಲರೂ ಅಚ್ಚರಿಪಡುತ್ತಿದ್ದಾರೆ.

also read: ಕುಡಿತ & ಸಿಗರೇಟ್‌ ತ್ಯಜಿಸಿದ ಈ ಸ್ಟಾರ್‌ ನಟನ ಬಾಳಲ್ಲಿ ಆಯ್ತು ಮಹತ್ವದ ಬದಲಾವಣೆ!

ಹಲವು ಬಗೆಯ ವ್ಯಾಯಾಮಗಳನ್ನು ಮಾಡುವ ಮೂಲಕ ಗಣೇಶ್‌ ಆಚಾರ್ಯ ಈ ಬದಲಾವಣೆ ಕಂಡುಕೊಂಡಿದ್ದಾರೆ. ಜಿಮ್‌ನಲ್ಲಿ ಕಸರತ್ತು ಮಾಡುತ್ತಿರುವ ಹಲವು ವಿಡಿಯೋಗಳನ್ನು ಅವರು ಅಪ್‌ಲೋಡ್‌ ಮಾಡಿಕೊಂಡಿದ್ದಾರೆ. 'ಈ ರೀತಿ ಮಾಡಬೇಕು ಎಂದು ನನ್ನ ಮನಸ್ಸಿನಲ್ಲಿ ಒಂದು ಆಲೋಚನೆ ಬಂತು ಅಷ್ಟೇ. ಜನರು ಕೇವಲ ದಢೂತಿ ಗಣೇಶ್‌ ಆಚಾರ್ಯನನ್ನು ನೋಡಿದ್ದಾರೆ. ಈ ಇಮೇಜ್‌ ಬದಲಾಯಿಸಬೇಕು ಎಂಬುದು ನನ್ನ ಉದ್ದೇಶವಾಗಿತ್ತು' ಎಂದಿದ್ದಾರೆ ಗಣೇಶ್‌.

also read: 15 ಕೆಜಿ ಸ್ಲಿಮ್‌ ಆಗಿ ಅಚ್ಚರಿ ಮೂಡಿಸಿದ 'ಆಶಿಕ್‌ ಬನಾಯಾ ಆಪ್ನೆ' ನಟಿ ತನುಶ್ರೀ ದತ್ತ! ವಿಡಿಯೋ ವೈರಲ್‌