Farhan Akhtar: ಯಶ್ ಜತೆಗಿನ ಫೋಟೋ ಹಂಚಿಕೊಂಡು ಹೊಸ ಸುಳಿವು ನೀಡಿದ ಫರ್ಹಾನ್ ಅಖ್ತರ್

ನಟ, ನಿರ್ದೇಶಕ, ನಿರ್ಮಾಪಕ, ಸ್ಕ್ರೀನ್ ರೈಟರ್ ಹಾಗೂ ಹಿನ್ನೆಲೆ ಗಾಯಕ ಫರ್ಹಾನ್ ಅಖ್ತರ್ ಸದ್ಯಕ್ಕೆ 'ದಿ ಸ್ಕೈ ಈಸ್ ಪಿಂಕ್' ಚಿತ್ರದಲ್ಲಿ ತೊಡಗಿಕೊಂಡಿದ್ದಾರೆ. ಜೊತೆಗೆ ತಮ್ಮ ನಿರ್ಮಾಣದ ಮುಂದಿನ ಚಿತ್ರ 'ಗಲ್ಲಿ ಬಾಯ್' ಬಿಡುಗಡೆ ಸಿದ್ಧವಾಗಿದೆ. ಬಹುಮುಖ ಪ್ರತಿಭೆಯ ಫರ್ಹಾನ್ ಅಖ್ತರ್ ಈಗ ಯಶ್ ಜತೆಗಿನ ಫೋಟೋ ಹಂಚಿಕೊಂಡು ಕುತೂಹಲ ಕೆರಳಿಸಿದ್ದಾರೆ.

ಯಶ್ ಅಭಿನಯದ ಕೆಜಿಎಫ್: ಚಾಪ್ಟರ್ 1 ಸಿನಿಮಾವನ್ನು ಎಕ್ಸೆಲ್ ಎಂಟರ್‌ಟೇನ್‌ಮೆಂಟ್ ಲಾಂಛನದಲ್ಲಿ ರಿತೇಶ್ ಸಿಧ್ವಾನಿ ಜತೆಗೆ ಫರ್ಹಾನ್ ಅಖ್ತರ್ ಹಿಂದಿಯಲ್ಲಿ ರಿಲೀಸ್ ಮಾಡಿದ್ದರು. ಹಿಂದಿ ಬಾಕ್ಸ್ ಆಫೀಸರಲ್ಲಿ ಶಾರುಖ್ ಖಾನ್ ಅವರ 'ಝೀರೋ' ಚಿತ್ರಕ್ಕೆ ಕೆಜಿಎಫ್ ಸೆಡ್ಡು ಹೊಡೆದದ್ದು ಗೊತ್ತೇ ಇದೆ. ಈಗ ಯಶ್ ಜತೆಗಿನ ಫೋಟೋವನ್ನು ಇನ್‍ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡು ಕುತೂಹಲ ಮೂಡಿಸಿದ್ದಾರೆ.

ಅಷ್ಟೇ ಅಲ್ಲದೆ ಫೋಟೋ ಅಡಿಬರಹ ಈ ರೀತಿ ಇದೆ, "ಯಶ್‌ರ ಕೆಜಿಎಫ್ ಚಿತ್ರಕ್ಕೆ ನೀವು ತೋರಿದ ಪ್ರೀತಿಯನ್ನು ಸಂಭ್ರಮಿಸುತ್ತಿದ್ದೇನೆ. ಚಾಪ್ಟರ್ 2 ಚಿತ್ರದ ನಿರೀಕ್ಷೆಯಲ್ಲಿದ್ದೇನೆ" ಎಂದು ಯಶ್‌ಗೆ ಟ್ಯಾಗ್ ಮಾಡಿದ್ದಾರೆ. ಈ ಮೂಲಕ ಕೆಜಿಎಫ್: ಚಾಪ್ಟರ್ 2 ಸಿನಿಮಾ ಸಹ ಹಿಂದಿಯಲ್ಲಿ ಬಿಡುಗಡೆ ಮಾಡುವ ಸೂಚನೆಯನ್ನು ಫರ್ಹಾನ್ ಅಖ್ತರ್ ನೀಡಿದಂತಾಗಿದೆ.


ವಿಜಯ್ ಕಿರಗಂದೂರು ನಿರ್ಮಾಣದ ಪ್ರಶಾಂತ್ ನೀಲ್ ನಿರ್ದೇಶನದ ಕೆಜಿಎಫ್ ಹಿಂದಿ ಆವೃತ್ತಿ ಬಾಕ್ಸ್ ಆಫೀಸಲ್ಲಿ ₹ 40 ಕೋಟಿಗೂ ಅಧಿಕ ಕಲೆಕ್ಷನ್ ಮಾಡಿದೆ. ಅದೇ ರೀತಿ ಎಲ್ಲಾ ಆವೃತ್ತಿಗಳ ಒಟ್ಟಾರೆ ಗಳಿಕೆ ₹ 200 ಕೋಟಿ ದಾಟಿದೆ ಎಂಬ ಹೆಗ್ಗಳಿಕೆಗೂ ಪಾತ್ರವಾಗಿದೆ.