ಪುರುಷರಿಗೆ ಪಿರಿಯೆಡ್ಸ್‌ ಇದ್ದಿದ್ದರೆ ಏನಾಗ್ತಿತ್ತು?

ಕೆಲ ದಿನಗಳ ಹಿಂದೆ ಬಾಲಿವುಡ್‌ 'ಟಾಯ್ಲೆಟ್‌: ಏಕ್‌ ಪ್ರೇಮ್‌ ಕಥಾ' ಚಿತ್ರದ ಪ್ರಮೋಶನ್‌ ವೇಳೆ ನಟ ಅಕ್ಷಯ್‌ ಕುಮಾರ್‌, ಭಾರತದಲ್ಲಿ 91 ಪ್ರತಿಶತ ಹೆಣ್ಣುಮಕ್ಕಳು ಸ್ಯಾನಿಟರಿ ಪ್ಯಾಡ್‌ನ್ನು ಬಳಸುವುದಿಲ್ಲ ಎಂದು ಹೇಳಿದ್ದರು. ಇದೀಗ ಬಾಲಿವುಡ್‌ ನಟಿಯೊಬ್ಬರು ಇದೇ ವಿಚಾರವಾಗಿ ಚರ್ಚಾಸ್ಪದ ಹೇಳಿಕೆ ನೀಡಿದ್ದಾರೆ.

ಹೌದು, ಬಿಟೌನ್‌ ಬೆಡಗಿ ರಿಚಾ ಛಡ್ಡಾ ಜಿಎಸ್‌ಟಿ ಅಡಿಯಲ್ಲಿ ಸ್ಯಾನಿಟರಿ ಪ್ಯಾಡ್‌ಗೆ ತೆರಿಗೆ ವಿಧಿಸುತ್ತಿರುವುದರ ಕುರಿತು ತಮ್ಮದೇ ಧಾಟಿಯಲ್ಲಿ ಟೀಕಿಸಿದ್ದಾರೆ. ಶೇ. 12ರಷ್ಟು ತೆರಿಗೆ ಇರುವ ಸ್ಯಾನಿಟರಿ ಪ್ಯಾಡ್‌ಗಳನ್ನು ತೆರಿಗೆ ಮುಕ್ತಗೊಳಿಸಬೇಕೆಂದು ರಿಚಾ ಒತ್ತಾಯಿಸಿದ್ದಾರೆ. ಈ ಕುರಿತು ಉಳಿದ ನಟಿಯರೂ ಧ್ವನಿ ಎತ್ತಿದ್ದರೂ ಅದು ರಿಚಾ ಅವರಷ್ಟು ಬೋಲ್ಡ್‌ ಆಗಿರಲಿಲ್ಲ.

ಕಾರ್ಯಕ್ರಮವೊಂದರಲ್ಲಿ ಪಾಲ್ಗೊಂಡಿದ್ದ ರಿಚಾ, 'ಒಂದು ವೇಳೆ ಪುರುಷರಿಗೆ ಋತುಸ್ರಾವ (ಪಿರಿಯೆಡ್ಸ್‌) ಆಗುತ್ತಿದ್ದರೆ ಸ್ಯಾನಿಟರಿ ಪ್ಯಾಡ್‌ಗಳು ಟ್ಯಾಕ್ಸ್ ಫ್ರೀ ಆಗುತ್ತಿದ್ದವು. ಪ್ರತಿಯೊಬ್ಬರಿಗೂ ತಾಯಿ ಇದ್ದಾಳೆ. ಋತುಸ್ರಾವವಿಲ್ಲದೆ ಮಗುವನ್ನು ಪಡೆಯಲು ಸಾಧ್ಯವಿಲ್ಲ. ಸ್ಯಾನಿಟರಿ ಪ್ಯಾಡ್‌ ಒಂದು ಐಷಾರಾಮಿ ವಸ್ತುವಲ್ಲ. ಅದು ಪ್ರತಿಯೊಬ್ಬ ಹೆಣ್ಣಿನ ಅವಶ್ಯಕತೆ. ಇದರ ಮೇಲೆ ತೆರಿಗೆ ವಿಧಿಸುವುದು ಸರಿಯಲ್ಲ' ಎಂದು ಖಡಕ್ಕಾಗಿ ನುಡಿದಿದ್ದಾರೆ.