ಕಾರಿನಿಂದ ಇಳಿದು ಗೋಧಿ ಹೊಲಕ್ಕೆ ನುಗ್ಗಿದ ಹೇಮಾ ಮಾಲಿನಿ

ಬಾಲಿವುಡ್ ನಟಿ, ಮಾಜಿ ಸಂಸದೆ ಡ್ರೀಮ್ ಗರ್ಲ್ ಖ್ಯಾತಿಯ ಹೇಮಾ ಮಾಲಿನಿ ಮಥುರಾ ಲೋಕಸಭೆ ಕ್ಷೇತ್ರದಿಂದ ಪ್ರಚಾರ ಆರಂಭಿಸಿದ್ದಾರೆ. "ಜನ ನನ್ನನ್ನು ಖುಷಿಯಾಗಿ ಸ್ವಾಗತಿಸುತ್ತಿದ್ದಾರೆ. ಮಥುರಾ ಜನರ ಅಭಿವೃದ್ಧಿಗಾಗಿ ನಾನು ಸಾಕಷ್ಟು ಕೆಲಸ ಮಾಡಿದ್ದೇನೆ. ಮುಂದೆಯೂ ಮಥುರಾವನ್ನು ಇನ್ನಷ್ಟು ಅಭಿವೃದ್ದಿಪಡಿಸುತ್ತೇನೆ" ಎಂದಿದ್ದಾರೆ ಹೇಮಾ ಮಾಲಿನಿ.

ಬಾಂಕಿ ಬಿಹಾರಿ ದೇವಾಲಯದಲ್ಲಿ ಪೂಜೆ ಬಳಿಕ ಸಿಎಂ ಯೋಗಿ ಆದಿತ್ಯನಾಥ್ ಜತೆಗೆ ನಾಮಪತ್ರ ಸಲ್ಲಿಸಿದ ಹೋಮಾ ಮಾಲಿನಿ ಗೋವರ್ಧನ್ ಕ್ಷೇತ್ರದಿಂದ ಚುನಾವಣಾ ಪ್ರಚಾರ ಪ್ರಾರಂಭಿಸಿದ್ದಾರೆ. ಮಥುರಾ ನಗರದ ಹೊರವಲಯದಲ್ಲಿನ ಗ್ರಾಮವೊಂದಲ್ಲಿ ತೆರಳುತ್ತಿದ್ದಾಗ ಕಾರಿನಿಂದ ಇಳಿದು ಗೋಧಿ ಹೊಲಕ್ಕೆ ನುಗ್ಗಿದರು. ಕೊಡಲಿ ಕೈಯಲ್ಲಿ ಹಿಡಿದು ತಾವೇ ಸ್ವತಃ ಗೋಧಿ ತೆನೆಯನ್ನು ಕಟಾವ್ ಮಾಡಿ ಮಹಿಳೆಯರಿಗೆ ನೀಡಿ ಮತ ಯಾಚಿಸಿದರು. ಬಿಜೆಪಿ ಹಾಲಿ ಸಂಸದೆಯಾಗಿರುವ ಹೇಮಾ ಮಾಲಿನಿ ಮತ್ತೊಮ್ಮೆ ಚುನಾವಣೆಗೆ ಸ್ಪರ್ಧಿಸಿದ್ದು ಮಹಿಳಾ ಮತದಾರರನ್ನು ಸೆಳೆಯಲು ವಿನೂತನ ಪ್ರಚಾರ ಮಾಡುತ್ತಿದ್ದಾರೆ.

ಈ ಕ್ಷೇತ್ರದಲ್ಲಿ ಕುಡಿಯುವ ನೀರಿನ ಸಮಸ್ಯೆ, ಶೌಚಾಲಯ ವ್ಯವಸ್ಥೆ ತಾಂಡವವಾಡುತ್ತಿದೆ. ಕಳೆದ 2014ರ ಚುನಾವಣೆಯಲ್ಲಿ ಅಂದಿನ ಹಾಲಿ ಸಂಸದರಾಗಿದ್ದ ರಾಷ್ಟ್ರೀಯ ಲೋಕ್ ದಳದ ಜಯಂತ್ ಚೌದರಿಯನ್ನು ಹೇಮಾ ಮಾಲಿನಿ 3,30,743 ಮತಗಳ ಅಂತರದಿಂದ ಸೋಲಿಸಿದ್ದರು. ಇದೀಗ ಹೇಮಾ ಮಾಲಿನಿ ಮಾಡುತ್ತಿರುವ ಪ್ರಚಾರದಿಂದ ಅವರು ಮತ್ತೊಮ್ಮೆ ಗೆಲ್ಲುತ್ತಾರಾ? ಇಲ್ಲವೇ ಎಂಬುದು ಗೊತ್ತಾಗಬೇಕಾದರೆ ಫಲಿತಾಂಶದ ತನಕ ಕಾಯಬೇಕು.