ಲಕ್ಷ್ಮೀ ದೇವರಿಗೆ ಅಕ್ಷಯ್‌ ಕುಮಾರ್‌ ಸಿನಿಮಾದಿಂದ ಅವಮಾನ? ಟೈಟಲ್‌ ಬದಲಿಸಲು ಹಿಂದೂ ಸೇನಾ ಒತ್ತಾಯ!

ಈ ವರ್ಷದ ಬಹುನಿರೀಕ್ಷಿತ ಬಾಲಿವುಡ್‌ ಸಿನಿಮಾಗಳಲ್ಲಿ 'ಲಕ್ಷ್ಮೀ ಬಾಂಬ್‌' ಚಿತ್ರಕ್ಕೆ ಮೊದಲ ಸ್ಥಾನವಿದೆ. ಶೀಘ್ರದಲ್ಲೇ ಈ ಚಿತ್ರ ಓಟಿಟಿ ಪ್ಲಾಟ್‌ಫಾರ್ಮ್‌ ಮೂಲಕ ಬಿಡುಗಡೆ ಆಗಲಿದೆ. ಆದರೆ ಈ ಸಿನಿಮಾಗೆ ವಿವಾದ ಸುತ್ತಿಕೊಂಡಿದೆ. ಅಕ್ಷಯ್‌ ಕುಮಾರ್‌ ಮತ್ತು ಕಿಯಾರಾ ಅಡ್ವಾಣಿ ಮುಖ್ಯಭೂಮಿಕೆ ನಿಭಾಯಿಸಿರುವ 'ಲಕ್ಷ್ಮೀ ಬಾಂಬ್‌' ಶೀರ್ಷಿಕೆಗೆ ವಿರೋಧ ವ್ಯಕ್ತವಾಗುತ್ತಿದೆ.

ಹಿಂದೂಗಳ ದೇವತೆ ಲಕ್ಷ್ಮೀ ಹೆಸರಿನ ಪಕ್ಕದಲ್ಲಿ ಬಾಂಬ್‌ ಎಂಬ ಪದ ಬಳಸಿರುವುದಕ್ಕೆ ಹಿಂದೂ ಸೇನಾ ಕಾರ್ಯಕರ್ತರು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ಈ ಶೀರ್ಷಿಕೆ ಬದಲಾಗಬೇಕು ಎಂದು ಒತ್ತಾಯಿಸಿದ್ದಾರೆ. ಅಲ್ಲದೆ, ಮಾಹಿತಿ ಮತ್ತು ಪ್ರಸಾರ ಖಾತೆ ಸಚಿವ ಪ್ರಕಾಶ್‌ ಜಾವಡೇಕರ್‌ ಅವರಿಗೆ ಪತ್ರ ಕೂಡ ಬರೆಯಲಾಗಿದೆ. ಇಂಥ ಶೀರ್ಷಿಕೆ ಮೂಲಕ ಹಿಂದೂಗಳ ಭಾವನೆಗೆ ಧಕ್ಕೆ ತಂದಿರುವುದಕ್ಕಾಗಿ ಚಿತ್ರತಂಡದ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಪತ್ರದಲ್ಲಿ ಒತ್ತಾಯಿಸಲಾಗಿದೆ. ಒಂದು ವೇಳೆ ಶೀರ್ಷಿಕೆ ಬದಲಾಗದಿದ್ದರೆ ಪ್ರತಿಭಟನೆ ಮಾಡುವುದಾಗಿ ತಿಳಿಸಲಾಗಿದೆ.

'ಲಕ್ಷ್ಮೀ ಬಾಂಬ್‌' ಚಿತ್ರದಿಂದ ಲವ್‌ ಜಿಹಾದ್‌ ಅನ್ನು ಪ್ರಚಾರ ಮಾಡಲಾಗುತ್ತಿದೆ ಎಂಬುದಾಗಿಯೂ ಒಂದು ವರ್ಗದ ನೆಟ್ಟಿಗರು ಆರೋಪಿಸಿದ್ದಾರೆ. ಈ ಸಿನಿಮಾದಲ್ಲಿ ಕಥಾನಾಯಕನ ಹೆಸರು ಆಸಿಫ್‌, ಕಥಾನಾಯಕಿ ಹೆಸರು ಪ್ರಿಯಾ. ಹಾಗಾಗಿ ಇದು ಲವ್‌ ಜಿಹಾದ್‌ ಅನ್ನು ಪ್ರೇರೇಪಿಸುತ್ತಿದೆ. ಇದನ್ನು ನಿರ್ಮಾಣ ಮಾಡಿರುವ ಶಬೀನಾ ಖಾನ್‌ ಅವರು ಕಾಶ್ಮೀರದ ಪ್ರತ್ಯೇಕವಾದಿಗಳು ಎಂದು ಕೆಲವರು ಆರೋಪಿಸಿದ್ದಾರೆ.

also read: 'ಲಕ್ಷ್ಮೀ ಬಾಂಬ್‌' ಮೇಲೆ ಲವ್‌ ಜಿಹಾದ್‌ ಆರೋಪ! ಅಕ್ಷಯ್‌ ಕುಮಾರ್‌ಗೆ ನಾಚಿಕೆ ಆಗಬೇಕು ಎಂದ ನೆಟ್ಟಿಗರು!

ಈ ಎಲ್ಲ ಕಾರಣಗಳಿಗಾಗಿ ಅಕ್ಷಯ್‌ ಕುಮಾರ್‌ ಅವರನ್ನು ಸೋಶಿಯಲ್‌ ಮೀಡಿಯಾದಲ್ಲಿ ಟ್ರೋಲ್‌ ಮಾಡಲಾಗುತ್ತಿದೆ. #ShameOnUAkshayKumar ಹ್ಯಾಷ್‌ಟ್ಯಾಗ್‌ ಟ್ರೆಂಡ್‌ ಆಗಿದೆ. ನ.9ರಂದು 'ಡಿಸ್ನಿ ಹಾಟ್‌ಸ್ಟಾರ್‌' ಮೂಲಕ 'ಲಕ್ಷ್ಮೀ ಬಾಂಬ್‌' ಬಿಡುಗಡೆ ಆಗಲಿದೆ. ರಾಘವ ಲಾರೆನ್ಸ್‌ ಈ ಚಿತ್ರಕ್ಕೆ ನಿರ್ದೇಶನ ಮಾಡುವ ಮೂಲಕ ಬಾಲಿವುಡ್‌ಗೆ ಕಾಲಿಟ್ಟಿದ್ದಾರೆ. ಈಗಾಗಲೇ ಟ್ರೇಲರ್‌ ನೋಡಿರುವ ಆಮೀರ್‌ ಖಾನ್‌ ಮುಂತಾದವರು ಮನಸಾರೆ ಮೆಚ್ಚಿಕೊಂಡಿದ್ದಾರೆ.

also read: ಅಕ್ಷಯ್‌ಗೆ ಮನಸಾರೆ ಹೊಗಳಿದ ನಟ ಆಮೀರ್ ಖಾನ್‌! ಇದಕ್ಕೆ ಕಾರಣವಾಗಿದ್ದು ಆ ಒಂದು ಸಿನಿಮಾ