ಒಂದೊಂದು ರೂಪಾಯಿಗೂ ಬೆವರು ಹರಿಸಿದ್ದೇನೆ: ಅಕ್ಷಯ್ ಕುಮಾರ್

ಸಾಲುಸಾಲು ಹಿಟ್ ಸಿನಿಮಾಗಳ ಮೂಲಕ ಜಗತ್ತಿನಲ್ಲೇ ಅತ್ಯಧಿಕ ಸಂಪಾದಿಸುತ್ತಿರುವ ಸೆಲೆಬ್ರಿಟಿಗಳಲ್ಲಿ ಒಬ್ಬರಾಗಿ ಗುರುತಿಸಿಕೊಂಡಿದ್ದಾರೆ ಬಾಲಿವುಡ್ ಹೀರೋ ಅಕ್ಷಯ್ ಕುಮಾರ್. ಆದರೆ ಇಷ್ಟೆಲ್ಲಾ ಜನಪ್ರಿಯತೆ, ಹಣ ತನಗೆ ಸುಖಾ ಸುಮ್ಮನೇ ಬರಲಿಲ್ಲ ಎಂದು ಸಂದರ್ಶನವೊಂದರಲ್ಲಿ ಹೇಳಿದ್ದಾರೆ ಅಕ್ಷಯ್ ಕುಮಾರ್

'ಮಿಷನ್ ಮಂಗಳ್' ಸಿನಿಮಾ ಪ್ರಚಾರಕ್ಕಾಗಿ ಸಂದರ್ಶನ ನೀಡಿರುವ ಅವರು ಫೋರ್ಬ್ಸ್ ಪಟ್ಟಿಯಲ್ಲಿ ಸ್ಥಾನ ಸಿಕ್ಕಿರುವ ಬಗ್ಗೆ ಸಂತಸ ವ್ಯಕ್ತಪಡಿಸಿದ್ದಾರೆ. ನಾನು ಇಂತಹ ಸುದ್ದಿಯ ಶೀರ್ಷಿಕೆಗಳನ್ನು ಮಾತ್ರ ನೋಡುತ್ತೇನೆ, ಸುದ್ದಿಯನ್ನು ಓದಲ್ಲ. ಕೆಲವು ವರ್ಷಗಳ ನನ್ನ ಶ್ರಮದಿಂದಾಗಿ ಇದು ಸಾಧ್ಯವಾಗಿದೆ ಎಂದಿದ್ದಾರೆ.

"ಈಗ ನನ್ನ ಕೈಯಲ್ಲಿ ಇರುವ ಪ್ರತಿ ರೂಪಾಯಿಗಾಗಿ ನಾನು ಸಾಕಷ್ಟು ಕಷ್ಟಪಟ್ಟಿದ್ದೇನೆ. ಹಣ ಯಾರಿಗೂ ಅಷ್ಟು ಸುಲಭವಾಗಿ ಬರಲ್ಲ. ಇದಕ್ಕಾಗಿ ನಾನು ನನ್ನ ರಕ್ತವನ್ನು, ಶ್ರಮವನ್ನು ಧಾರೆ ಎರೆದಿದ್ದೇನೆ. ಹಾಗಾಗಿ ಅದರ ಬೆಲೆ ನನಗೆ ಗೊತ್ತು" ಎಂದಿದ್ದಾರೆ ಅಕ್ಕಿ. [ಅಜಿತ್‌ ದೋವಲ್‌ ಪಾತ್ರದಲ್ಲಿ ಅಕ್ಷಯ್‌ ಕುಮಾರ್‌]

ಅಮೆರಿಕದ ಬಿಝಿನೆಸ್ ನಿಯತಕಾಲಿಕೆ ಇತ್ತೀಚೆಗೆ ಜೂನ್ 2018-ಜೂನ್ 2019ರ ಸಾಲಿನಲ್ಲಿ ಅತ್ಯಧಿಕ ಗಳಿಸಿರುವ ಸೆಲೆಬ್ರಿಟಿಗಳ ಪಟ್ಟಿಯನ್ನು ಬಿಡುಗಡೆ ಮಾಡಿದೆ. ಅಕ್ಷಯ್ ಕುಮಾರ್ ₹ 444 ಕೋಟಿ ಸಂಪಾದನೆಯೊಂದಿಗೆ ಪಟ್ಟಿಯಲ್ಲಿ ಸ್ಥಾನ ಪಡೆದಿದ್ದಾರೆ. ಅಷ್ಟೇ ಅಲ್ಲ ಕಳೆದ ವರ್ಷ ಪಟ್ಟಿಯಲ್ಲಿ ಸ್ಥಾನ ಸಂಪಾದಿಸಿದ ಏಕೈಕ ಭಾರತೀಯ ಅವರು ಎಂಬುದು ವಿಶೇಷ. [ಬಾಲಿವುಡ್‌ ಮೆಚ್ಚುಗೆ ಗಳಿಸಿದ ಅನಂತ ಅಯ್ಯಂಗಾರ್‌]

ಅಕ್ಷಯ್ ಕುಮಾರ್ ನಟಿಸಿರುವ ಮಿ 'ಮಿಷನ್ ಮಂಗಳ್’ ಸಿನಿಮಾ ಆಗಸ್ಟ್ 15ರಂದು ಬಿಡುಗಡೆಯಾಗುತ್ತಿದೆ. ಈ ಚಿತ್ರದ ಪಾತ್ರವರ್ಗದಲ್ಲಿ ವಿದ್ಯಾ ಬಾಲನ್, ತಾಪ್ಸಿ, ನಿತ್ಯಾ ಮೆನನ್, ಕೀರ್ತಿ ಕುಲ್ಹರಿ, ಸೋನಾಕ್ಷಿ ಸಿನ್ಹಾ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. 2013ರಲ್ಲಿ ಭಾರತ ಕೈಗೊಂಡ ಮಂಗಳ ಯಾನ ಹಿನ್ನೆಲೆಯಲ್ಲಿ ಈ ಸಿನಿಮಾದ ಕಥೆ ಸಾಗಲಿದೆ. ಜಗನ್ ಶಕ್ತಿ ಚಿತ್ರವನ್ನು ನಿರ್ದೇಶಿಸಿದ್ದಾರೆ.