ಸಂಜಯ್‌ ದತ್‌ ಹೆಸರಿನ ಹಿಂದಿದೆ ಇಂಟರೆಸ್ಟಿಂಗ್‌ ಸಂಗತಿ! ನಾಮಕರಣ ಮಾಡಿದ್ದು ಅಪರಿಚಿತ ಮಹಿಳೆ!

ಭಾರತೀಯ ಚಿತ್ರರಂಗದಲ್ಲಿ ನಟ ಸಂಜತ್‌ ದತ್‌ ಮಾಡಿದ ಸಾಧನೆ ದೊಡ್ಡದು. ದೇಶಾದ್ಯಂತ ಅವರು ಜನಪ್ರಿಯತೆ ಗಳಿಸಿದ್ದಾರೆ. ವೈಯಕ್ತಿಕ ಬದುಕಿನಲ್ಲಿ ಅವರು ಕಂಡ ಏಳು-ಬೀಳುಗಳು ಹಲವು. ಸಿನಿಮಾಗಳಲ್ಲಿನ ಪಾತ್ರದ ರೀತಿಯೇ ಅವರ ವ್ಯಕ್ತಿತ್ವಕ್ಕೆ ಹಲವು ಬಗೆಯ ಶೇಡ್‌ಗಳಿವೆ. ಇನ್ನು ಅವರಿಗೆ ಸಂಜಯ್‌ ಎಂದು ಹೆಸರು ಇಟ್ಟಿದ್ದರ ಹಿಂದೆಯೂ ಒಂದು ಇಂಟರೆಸ್ಟಿಂಗ್‌ ಸಂಗತಿ ಇದೆ.

ಬಾಲಿವುಡ್‌ನ ತಾರಾದಂಪತಿಗಳಾದ ಸುನೀಲ್‌ ದತ್‌ ಮತ್ತು ನರ್ಗೀಸ್‌ ದತ್‌ ಅವರಿಗೆ 1959ರಲ್ಲಿ ಜನಿಸಿದವರು ಸಂಜಯ್ ದತ್. ಎಲ್ಲ ತಂದೆ-ತಾಯಿ ರೀತಿಯೇ ಸುನೀಲ್‌ ದತ್‌ ಮತ್ತು ನರ್ಗೀಸ್‌ ಕೂಡ ತಮ್ಮ ಮಗುವಿಗೆ ಮುದ್ದಾದ ಹೆಸರು ಇಡಬೇಕು ಎಂದು ನಿರ್ಧರಿಸಿದರು. ಆಪ್ತರು ಮತ್ತು ಸ್ನೇಹಿತರ ಬಳಿ ಹೆಸರಿಗಾಗಿ ಸಲಹೆ ಕೇಳಿದರು. ಆಗ ಅವರ ಸಹಾಯಕ್ಕೆ ಬಂದಿದ್ದು ಒಬ್ಬ ಸ್ನೇಹಿತ. ಆ ಸ್ನೇಹಿತ ಒಂದು ಮ್ಯಾಗಜಿನ್‌ನ ಸಂಪಾದಕರು ಕೂಡ ಆಗಿದ್ದರು.

ಸ್ನೇಹಿತನ ಮ್ಯಾಗಜಿನ್‌ನಲ್ಲಿ ಸುನೀಲ್‌ ದತ್‌ ಮತ್ತು ನರ್ಗೀಸ್‌ ಒಂದು ಜಾಹೀರಾತು ನೀಡಿದರು. ತಮ್ಮ ಮಗುವಿಗೆ ಹೆಸರು ಸೂಚಿಸುವಂತೆ ಅದರಲ್ಲಿ ವಿನಂತಿ ಮಾಡಿಕೊಳ್ಳಲಾಗಿತ್ತು. ಆಗ ಅಭಿಮಾನಿಗಳು ಬರೋಬ್ಬರಿ 18 ಸಾವಿರ ಹೆಸರುಗಳನ್ನು ಬರೆದುಕಳಿಸಿದ್ದರು! ಅದರಲ್ಲಿ 20 ಹೆಸರುಗಳನ್ನು ಶಾರ್ಟ್‌ಲಿಸ್ಟ್‌ ಮಾಡಲಾಯಿತು. ಅಂತಿಮವಾಗಿ ನರ್ಗೀಸ್‌ ದತ್‌ ಅವರು ಸಂಜಯ್‌ ಬಾಲರಾಜ್‌ ಎಂಬ ಹೆಸರನ್ನು ಆಯ್ಕೆ ಮಾಡಿದರು.

also read: ಮಿತಿ ಮೀರಿತೇ ಸಂಜಯ್‌ ದತ್‌ ಅನಾರೋಗ್ಯ? ಕ್ಯಾನ್ಸರ್‌ 4ನೇ ಹಂತದಲ್ಲಿದೆ ಎನ್ನುತ್ತಿವೆ ಮೂಲಗಳು!

ಅಂದಹಾಗೆ, ಈ ಸಂಜಯ್‌ ಎಂಬ ಹೆಸರನ್ನು ಸೂಚಿಸಿದವರು ಉತ್ತರ ಪ್ರದೇಶದ ಆಗ್ರಾದ ಒಬ್ಬ ಅಪರಿಚಿತ ಮಹಿಳೆ. ಅವರಿಗೆ ಸಂಜಯ್‌ ದತ್‌ ಮತ್ತು ನರ್ಗಿಸ್‌ ಅವರು ಕೃತಜ್ಞತೆ ಸಲ್ಲಿಸುವ ಸಲುವಾಗಿ ಆಟೋಗ್ರಾಫ್‌ ನೀಡಿದ್ದರು. ಇದು ಸಂಜಯ್‌ ದತ್‌ ಅವರ ಹೆಸರಿನ ಹಿಂದಿರುವ ಘಟನೆ. ಪ್ರಸ್ತುತ ಸಂಜುಗೆ ಶ್ವಾಸಕೋಶದ ಕ್ಯಾನ್ಸರ್‌ ಉಂಟಾಗಿದ್ದು, ಚಿಕಿತ್ಸೆಗಾಗಿ ಅವರು ವಿದೇಶಕ್ಕೆ ತೆರಳಲಿದ್ದಾರೆ. ಅವರು ಬೇಗ ಗುಣಮುಖರಾಗಲಿ ಎಂದು ಅಭಿಮಾನಿಗಳು ಮತ್ತು ಸ್ನೇಹಿತರು ಪ್ರಾರ್ಥಿಸುತ್ತಿದ್ದಾರೆ.

also read: ಸಂಜಯ್‌ ದತ್‌ ಆರೋಗ್ಯದ ಮೇಲೆ ನಿಂತಿದೆಯೇ 'ಕೆಜಿಎಫ್‌ ಚಾಪ್ಟರ್‌ 2' ಸಿನಿಮಾದ ಬಿಡುಗಡೆ ದಿನಾಂಕ?