ವರುಣ್ ಧವನ್ ಹೊಸ ಸಿನಿಮಾದ ಪ್ರಮುಖರಿಗೆ ಕೊರೊನಾ ವೈರಸ್! ಶೂಟಿಂಗ್ ನಿಲ್ಲಿಸಿದ ತಂಡ!

ವರುಣ್ ಧವನ್‌ ಮತ್ತು ಕಿಯಾರಾ ಅಡ್ವಾಣಿ ಕಾಂಬಿನೇಷನ್‌ನಲ್ಲಿ ಈಚೆಗಷ್ಟೇ 'ಜುಗ್ ಜುಗ್ ಜಿಯೋ' ಸಿನಿಮಾ ಲಾಂಚ್ ಆಗಿತ್ತು. ಇದೀಗ ಈ ಸಿನಿಮಾತಂಡಕ್ಕೆ ಕೊರೊನಾ ಶಾಕ್ ಉಂಟಾಗಿದೆ! ಅರ್ಥಾತ್, ಚಿತ್ರತಂಡದ ಬಹುತೇಕರಿಗೆ ಕೊರೊನಾ ಪಾಸಿಟಿವ್ ಆಗಿ ಇದೀಗ ಶೂಟಿಂಗ್ ಅನ್ನೇ ಸ್ಟಾಪ್ ಮಾಡಲಾಗಿದೆ! ಹೌದು, 'ಜುಗ್ ಜುಗ್ ಜಿಯೋ' ಸಿನಿಮಾದ ಹೀರೋ ವರುಣ್ ಧವನ್‌, ಪೋಷಕ ಪಾತ್ರದಲ್ಲಿ ಬಣ್ಣ ಹಚ್ಚಿದ್ದ ನೀತು ಕಪೂರ್‌ ಹಾಗೂ ನಿರ್ದೇಶಕ ರಾಜ್ ಮೆಹ್ತಾಗೆ ಕೊರೊನಾ ಪಾಸಿಟಿವ್ ಆಗಿರುವುದು ಖಚಿತವಾಗಿದೆ.

ಅನಿಲ್ ಕಪೂರ್‌ಗೆ ನೆಗೆಟಿವ್!
ವರುಣ್‌, ನೀತು ಜೊತೆಗೆ ಚಿತ್ರದಲ್ಲಿ ಅನಿಲ್ ಕಪೂತ್ ಕೂಡ ಬಣ್ಣ ಹಚ್ಚಿದ್ದರು. ಆರಂಭದಲ್ಲಿ ಅವರಿಗೂ ಕೊರೊನಾ ಪಾಸಿಟಿವ್ ಆಗಿದೆ ಅಂತಲೇ ಸುದ್ದಿ ಆಗಿತ್ತು. ಆದರೆ, ಅನಿಲ್ ಸಹೋದರ, ನಿರ್ಮಾಪಕ ಬೋನಿ ಕಪೂರ್‌, ಅನಿಲ್‌ಗೆ ಕೊರೊನಾ ಪರೀಕ್ಷೆ ನೆಗೆಟಿವ್ ಆಗಿದೆ ಅಂತ ಮಾಹಿತಿ ನೀಡಿದ್ದಾರೆ. ಸದ್ಯ ಅನಿಲ್ ಮುಂಬೈಗೆ ಮರಳುತ್ತಿದ್ದಾರಂತೆ. ಇನ್ನು, ಸಿನಿಮಾದ ನಾಯಕಿ ಕಿಯಾರಾ ಅಡ್ವಾಣಿಗೂ ಕೂಡ ಕೊರೊನಾ ನೆಗೆಟಿವ್ ಆಗಿದೆ.

ನವೆಂಬರ್‌ನಲ್ಲಿ ಆರಂಭಗೊಂಡಿದ್ದ ಶೂಟಿಂಗ್
'ಜುಗ್ ಜುಗ್ ಜಿಯೋ' ಸಿನಿಮಾಕ್ಕೆ ನವೆಂಬರ್‌ನಲ್ಲಿ ಶೂಟಿಂಗ್ ಆರಂಭಿಸಲಾಗಿತ್ತು. ಆಗ ನೀತು ಕಪೂರ್ ಏರ್‌ಪೋರ್ಟ್‌ನಲ್ಲಿರುವ ಫೋಟೋವೊಂದನ್ನು ಶೇರ್ ಮಾಡಿಕೊಂಡು, 'ಇಂತಹ ಸಮಯದಲ್ಲಿ ನನ್ನ ಮೊದಲ ವಿಮಾನ ಜರ್ನಿ. ಈ ಜರ್ನಿ ನನಗೆ ನರ್ವಸ್ ಆಗುತ್ತಿದೆ. ಕಪೂರ್ ಸಾಹೆಬ್ (ರಿಷಿ ಕಪೂರ್) ಈಗ ನೀವು ನನ್ನ ಕೈಹಿಡಿದುಕೊಂಡಿಲ್ಲ. ಆದರೆ, ನನಗೆ ಗೊತ್ತು ನೀವು ನನ್ನೊಂದಿಗೆ ಇದ್ದೀರಿ. ಇದನ್ನು ಮಾಡಲು ನನಗೆ ಪ್ರೋತ್ಸಾಹಿಸಿದ್ದಕ್ಕೆ ಧನ್ಯವಾದಗಳು. ಅಂದಹಾಗೆ, ನಾವೆಲ್ಲ ಕೊರೊನಾ ಪರೀಕ್ಷೆ ಮಾಡಿಸಿಕೊಂಡಿದ್ದೇವೆ ಮತ್ತು ಸುರಕ್ಷಿತವಾಗಿದ್ದೇವೆ. ಫೋಟೋ ಕ್ಲಿಕ್ ಮಾಡಿಕೊಳ್ಳುವುದಕ್ಕಾಗಿ ಮಾಸ್ಕ್ ತೆಗೆದಿದ್ದೇವೆ' ಎಂದು ಬರೆದುಕೊಂಡಿದ್ದರು.

ವರುಣ್ ಧವನ್ ಜೊತೆ ಕುಣಿದು ಯೂಟ್ಯೂಬ್‌ನಲ್ಲಿ ಬಿಸಿ ಹೆಚ್ಚಿಸಿದ ನೋರಾ ಫತೇಹಿ

ಕೊರೊನಾ ಬಗ್ಗೆ ನೀತು ಅವರಿಗೆ ಎಷ್ಟು ಭಯ ಇತ್ತು ಅನ್ನೋದು ಈ ಪೋಸ್ಟ್‌ನಲ್ಲೇ ಗೊತ್ತಾಗುತ್ತದೆ. ದುರಾದೃಷ್ಟವಶಾತ್ ಅವರಿಗೂ ಈಗ ಪಾಸಿಟಿವ್ ಆಗಿದೆ. 'ಜುಗ್ ಜುಗ್ ಜಿಯೋ' ಸಿನಿಮಾಕ್ಕೆ ಕರಣ್ ಜೋಹರ್ ಹಣ ಹಾಕುತ್ತಿದ್ದಾರೆ. ಸದ್ಯ ಚಂಢಿಗಡದಲ್ಲಿ ನಡೆಯುತ್ತಿದ್ದ ಶೂಟಿಂಗ್ ನಿಲ್ಲಿಸಲಾಗಿದೆ.

ಕೊರೊನಾ ವೈರಸ್ ಹುಟ್ಟಿದ್ದು ಭಾರತದಲ್ಲಂತೆ: ಚೀನಿ ಸಂಶೋಧಕರಿಂದ 'ಬಿಗ್ ಜೋಕ್'!