ಹತ್ತನೇ ಕ್ಲಾಸ್‌ನಲ್ಲಿ ಇದ್ದಾಗಲೇ ಲವ್ ಮಾಡಿ ಸಿಕ್ಕಿಬಿದ್ದಿದ್ದೆ: ಕಿಯಾರಾ ಅಡ್ವಾಣಿ

ಹತ್ತನೇ ತರಗತಿಯಲ್ಲಿದ್ದಾಗ ಹುಡುಗನೊಬ್ಬನನ್ನು ಪ್ರೀತಿಸುತ್ತಿದ್ದೆ. ಈ ಸಂಗತಿ ಅಮ್ಮನಿಗೆ ಗೊತ್ತಾಗಿ ವಾರ್ನಿಂಗ್ ಸಹ ನೀಡಿದ್ದರು ಎಂದು ಬಾಲಿವುಡ್ ನಟಿ ಕಿಯಾರಾ ಅಡ್ವಾಣಿ ಹೇಳಿದ್ದಾರೆ. ತೆಲುಗಿನ 'ಅರ್ಜುನ್ ರೆಡ್ಡಿ' ರೀಮೇಕ್ ಸಿನಿಮಾ 'ಕಬೀರ್ ಸಿಂಗ್' ಶುಕ್ರವಾರ (ಜೂನ್ 21) ರಿಲೀಸ್ ಆಗಿದ್ದು ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ.

ಸಂದರ್ಶನದಲ್ಲಿ ಕಿಯಾರಾ ಒಮ್ಮೆ ಪ್ರೀತಿಯಲ್ಲಿ ಬಿದ್ದಿದ್ದೆ ಎಂದಿದ್ದಾರೆ. "ನನಗೆ ನೆನಪಿರುವಂತೆ ಒಮ್ಮೆ ಪ್ರೀತಿಯಲ್ಲಿ ಬಿದ್ದಿದ್ದೆ. ಕೇವಲ ಆತನ ಜತೆಗೆ ಹೆಚ್ಚು ದಿನ ಇದ್ದೆ. ನಾವಿಬ್ಬರೂ ಜತೆಯಾಗಿಯೇ ಬೆಳೆದವರು. ಹಾಗಾಗಿ ನಮ್ಮ ನಡುವಿನ ಪ್ರೀತಿ ತುಂಬಾ ಭಿನ್ನವಾಗಿತ್ತು. ಈಗಲೂ ಆತ ನನ್ನ ಸ್ನೇಹಿತ. ನನಗೆ ಖುಷಿಯಾದರೂ, ದುಃಖವಾದರೂ ಆತನಿಗೆ ಫೋನ್ ಮಾಡುತ್ತೇನೆ" ಎಂದಿದ್ದಾರೆ.

"ಹತ್ತನೇ ತರಗತಿಯಲ್ಲಿ ನಾವಿಬ್ಬರೂ ಪ್ರೀತಿಸಿಕೊಂಡೆವು. ನಾನು ಆತನ ಜತೆಗೆ ಫೋನ್‌ನಲ್ಲಿ ಮಾತನಾಡುತ್ತಿದ್ದಾಗ ಅಮ್ಮನಿಗೆ ಸಿಕ್ಕಿಬಿದ್ದೆ. ಹತ್ತನೇ ತರಗತಿ ಪರೀಕ್ಷೆ ಇಟ್ಟುಕೊಂಡು ಪ್ರೀತಿಯಲ್ಲಿ ಬೀಳಲು ನಿನಗೆಷ್ಟು ಧೈರ್ಯ ಎಂದು ಬೈದಿದ್ದರು. ಇಂದಿನಿಂದ ನೀನು ಹುಡುಗರ ಜತೆಗೆ ಮಾತನಾಡಬಾರದು ಎಂದು ವಾರ್ನ್ ಮಾಡಿದ್ದರು. ಆ ಹುಡುಗನದು ಸ್ವಲ್ಪ ಭಿನ್ನ ಸ್ವಭಾವ. ಹಾಗಾಗಿ ನಾನು ಚೆನ್ನಾಗಿ ಓದಿ, ಪರೀಕ್ಷೆಯಲ್ಲಿ ಉತ್ತಮ ಅಂಕಗಳನ್ನು ಪಡೆದೆ" ಎಂದು ಹೇಳಿದ್ದಾರೆ.

ಕಬೀರ್ ಸಿಂಗ್ ಸಿನಿಮಾದಲ್ಲಿ ನೀವು ಪರಿಸ್ಥಿತಿಯ ಕಾರಣ ಪ್ರೇಮಿಯನ್ನು ದೂರ ಮಾಡಿಕೊಳ್ಳಬೇಕಾಯಿತಾ? ಎಂಬ ಪ್ರಶ್ನೆಗೆ, ನಾವೆಲ್ಲರೂ ಆ ಸ್ಟೇಜ್‌ನಿಂದ ಬಂದವರಲ್ಲವೇ. ಆಗ ನಾನು ಹಾಸಿಗೆ ಮೇಲಿಂದ ಎದ್ದು ಹೊರಬರಲೂ ಇಷ್ಟಪಡುತ್ತಿರಲಿಲ್ಲ. ಮನೆಯಲ್ಲೇ ಇರುತ್ತಿದ್ದೆ. "ಇನ್ನೊಬ್ಬರಿಗಾಗಿ ಅಳುವುದನ್ನು ಬಿಡು, ಇದರಿಂದ ಹೊರಬೀಳು" ಎಂದು ಗೆಳೆಯರು ಹೇಳುತ್ತಿದ್ದರು. ಅಳುವುದು ಇರಲಿ, ಆ ವ್ಯಕ್ತಿಯನ್ನು ಬಿಟ್ಟು ಮುಂದೆ ಬರುವುದು ಕಷ್ಟದ ಕೆಲಸ ಅನ್ನಿಸುತ್ತಿತ್ತು. ಈಗ ನಾನು ಸಿಂಗಲ್ ಆಗಿಯೇ ಇದ್ದೇನೆ" ಎಂದಿದ್ದಾರೆ ಕಿಯಾರಾ.