ಮಗನ ಡೈಪರ್‌ ಬದಲಾಯಿಸುವುದೆಂದರೆ ಬೇಬೊಗೆ ಕಿರಿಕಿರಿ?

ಬಾಲಿವುಡ್‌ ಬೇಬೊ ಕರೀನಾ ಕಪೂರ್‌ ಸದ್ಯಕ್ಕೆ ತಮ್ಮ ಮುದ್ದು ಮಗ ತೈಮೂರ್‌ನ ಆರೈಕೆಯಲ್ಲಿ ಬಿಝಿಯಾಗಿರುತ್ತಾರೆ. ಹಾಗಾದ್ರೆ ಮುದ್ದು ಮಗನ ಡೈಪರ್‌ ಚೇಂಜ್‌ ಮಾಡುವುದು ಕರೀನಾಗೆ ಕಿರಿಕಿರಿ ಉಂಟು ಮಾಡುತ್ತಾ? ಹೀಗೊಂದು ಪ್ರಶ್ನೆಗೆ ಬೇಬೊ ಉತ್ತರಿಸಿದ ರೀತಿ ಮಾತೃತ್ವಕ್ಕೆ ಹಿಡಿದ ಕೈಗನ್ನಡಿಯಂತಿತ್ತು.

ಇತ್ತೀಚೆಗೆ ಫೀಲ್ಮ್‌ಫೇರ್‌ ಮ್ಯಾಗಜಿನ್‌ ನಡೆಸಿದ ಸಂದರ್ಶನವೊಂದರಲ್ಲಿ ಪಾಲ್ಗೊಂಡಿದ್ದ ಕರೀನಾ ಕಪೂರ್‌ ತಮ್ಮ ವೃತ್ತಿ ಬದುಕು ಹಾಗೂ ತಾಯ್ತನದ ವಿಷಯವಾಗಿ ಒಂದಿಷ್ಟು ವಿಚಾರಗಳನ್ನು ಹಂಚಿಕೊಂಡಿದ್ದಾರೆ. ಈ ಸಂದರ್ಭದಲ್ಲಿ ಸಂದರ್ಶಕರು, 'ನಿಮ್ಮ ಮಗನ ಡೈಪರ್‌ ಬದಲಾಯಿಸುವುದು ನಿಮಗೆ ಕಿರಿಕಿರಿ ಉಂಟು ಮಾಡುತ್ತಾ?' ಎಂಬ ಪ್ರಶ್ನೆಯನ್ನು ಕೇಳಿದರು.

ಇದಕ್ಕೆ ಉತ್ತರಿಸಿದ ಕರೀನಾ, 'ಕಿರಿಕಿರಿ? ಹಾಗೇನೂ ಇಲ್ಲ. ಅವನು ನನ್ನ ಮಗ. ಆ ರೀತಿ ಅನುಭವ ನನಗ್ಯಾವತ್ತೂ ಆಗುವುದಿಲ್ಲ' ಎಂದು ಕಡ್ಡಿ ಮುರಿದಂತೆ ಹೇಳಿದ್ದಾರೆ. ಕರೀನಾರ ಈ ಉತ್ತರ ಮಾತೃ ಪ್ರೇಮಕ್ಕೆ ಒಂದು ಉದಾಹರಣೆಯಾಗಿದೆ. ಸಾಕಷ್ಟು ಸಂದರ್ಶನಗಳಲ್ಲಿ ಮಗ ತೈಮೂರ್‌ ಬಗ್ಗೆ ತಮಗಿರುವ ಕಾಳಜಿಯನ್ನು ವ್ಯಕ್ತಪಡಿಸಿದ್ದಾರೆ ಕರೀನಾ. ಇನ್ನು ಮಗನ ಆರೈಕೆಯ ಜತೆಗೆ ತಮ್ಮ ಫಿಟ್‌ನೆಸ್‌ ಕಡೆಗೂ ಕರೀನಾ ಗಮನ ನೀಡುತ್ತಾರೆ.