ಅಮಿಷಾ ಮುಖದ ಮೇಲೆ ಕಲೆಗಳು ಕಾಣುತ್ತಿದ್ದವು: ಕರೀನಾ ಕಪೂರ್

ಬಾಲಿವುಡ್ ನಟಿ ಅಮಿಷಾ ಪಟೇಲ್ ಅಂದಚೆಂದದ ಬಗ್ಗೆ ಕರೀನಾ ಕಪೂರ್ ಕಾಮೆಂಟ್ ಮಾಡಿದ್ದಾರೆ. ಆದರೆ ಈಗಲ್ಲ. ಈ ಹಿಂದೆಂದೋ ನಡೆದ ಘಟನೆ ಇದು. ಅದರ ಒಂದು ಝಲಕ್ ಇಲ್ಲಿದೆ ನೋಡಿ. ಇವರಿಬ್ಬರೂ 2000ರಲ್ಲಿ ಚಿತ್ರೋದ್ಯಮಕ್ಕೆ ಪರಿಚಯವಾದರು. 'ರೆಫ್ಯೂಜಿ' ಸಿನಿಮಾ ಮೂಲಕ ಕರೀನಾ ಕಪೂರ್, 'ಕಹೋ ನಾ ಪ್ಯಾರ್ ಹೈ' ಸಿನಿಮಾ ಮೂಲಕ ಅಮಿಷಾ ಪಟೇಲ್ ಬೆಳ್ಳಿಪರದೆ ಪದಾರ್ಪಣೆ ಮಾಡಿದರು.

ಆದರೆ ಹೃತಿಕ್ ರೋಷನ್ ತಂದೆ ರಾಕೇಶ್ ರೋಷನ್ ನಿರ್ದೇಶನದ 'ಕಹೋ ನಾ ಪ್ಯಾರ್ ಹೈ' ಸಿನಿಮಾಗೆ ನಾಯಕಿಯಾಗಿ ಕರೀನಾರನ್ನು ಆಯ್ಕೆ ಮಾಡಿಕೊಳ್ಳಲು ಮೊದಲು ನಿರ್ಧರಿಸಲಾಗಿತ್ತು. ಆದರೆ ಕರೀನಾ ನಿರಾಕರಿಸಿದ ಕಾರಣ ಅಮಿಷಾಗೆ ಅವಕಾಶ ನೀಡಲಾಗಿತ್ತು. ಅಮಿಷಾರ ಮೊದಲ ಸಿನಿಮಾ ಬಗ್ಗೆ ಈ ಹಿಂದೊಮ್ಮೆ ಕರೀನಾ ಕಾಮೆಂಟ್ ಮಾಡಿದ್ದರು. ಅವರ ಲುಕ್ ಬಗ್ಗೆ ಮುಖ ಕಿವುಚಿಕೊಂಡಿದ್ದರು.

"ಹೃತಿಕ್ ತಂದೆ ರಾಕೇಶ್ ರೋಷನ್ ಪ್ರತಿ ಫ್ರೇಮ್‌ನಲ್ಲಿ ತನ್ನ ಮಗನಿಗಾಗಿ ಐದು ಗಂಟೆ ಮೀಸಲಿಡುತ್ತಿದ್ದರು. ಆದರೆ ಅಮಿಷಾಗೆ ಕನಿಷ್ಠ ಐದು ಸೆಕೆಂಡ್ ಸಹ ಕೊಡುತ್ತಿರಲಿಲ್ಲ. ಸಿನಿಮಾದ ಕೆಲವು ಸೀನ್‌ಗಳಲ್ಲಿ ಆಕೆ ಮುಖದ ಮೇಲೆ ಮೊಡವೆ, ಕಣ್ಣಿನ ಕೆಳಗೆ ಕಪ್ಪು ಕಲೆಗಳು ಕಾಣಿಸಿದವು" ಎಂದಿದ್ದರು.

"ಒಂದು ವೇಳೆ ನಾನು ಆ ಸಿನಿಮಾದಲ್ಲಿ ಇದ್ದಿದ್ದರೆ, ಖಂಡಿತ ಒಳ್ಳೆಯ ಡೀಲ್ ಕುದುರಿಸಿಕೊಳ್ಳುತ್ತಿದ್ದೆ. ಆದರೆ ಅಟೆನ್ಷನ್ ವಿಚಾರದಲ್ಲಿ ನಮ್ಮಿಬ್ಬರ ನಡುವೆ ತುಂಬಾ ವ್ಯತ್ಯಾಸ ಇದೆ ಎಂಬುದು ನನ್ನ ಫೀಲಿಂಗ್. ಅದೇನೇ ಇರಲಿ, ಆ ಸಿನಿಮಾದಲ್ಲಿ ನಾನು ನಟಿಸದೆ ಇದ್ದದ್ದೇ ನನ್ನ ಅದೃಷ್ಟ ಎಂದು ಭಾವಿಸುತ್ತಿದ್ದೇನೆ" ಎಂದಿದ್ದಾರೆ.