ರಾಹುಲ್‌ ಗಾಂಧಿ ಜತೆ ಡೇಟಿಂಗ್‌ ಮಾಡುವ ಆಸೆಯಂತೆ ಕರೀನಾಗೆ!

ಬಾಲಿವುಡ್‌ ನಟಿ ಕರೀನಾ ಕಪೂರ್‌ರಿಗೆ ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿಯವರ ಜತೆ ಡೇಟಿಂಗ್‌ಗೆ ಹೋಗಲು ಆಸೆಯಿದೆಯಂತೆ. ಸಿಮಿ ಗರೇವಾಲ್‌ರ ಜನಪ್ರಿಯ ಚಾಟ್‌ ಶೋವೊಂದರಲ್ಲಿ ಅವರು ಈ ಆಸೆ ವ್ಯಕ್ತಪಡಿಸಿದ್ದಾರೆ.

ನೀವು ಯಾರೊಂದಿಗೆ ಡೇಟಿಂಗ್‌ ಹೋಗಲು ಬಯಸುವಿರಿ ಎಂದು ಕೇಳಿದ ಪ್ರಶ್ನೆಗೆ ಕರೀನಾ, ಈ ವಿಷಯ ಹೇಳಿದರೆ ವಿವಾದವಾಗುತ್ತದೆ. ಆದರೂ ನಾನು ಹೇಳುತ್ತೇನೆ. ನಾನು ರಾಹುಲ್‌ ಗಾಂಧಿ ಜತೆಗೆ ಡೇಟಿಂಗ್‌ಗೆ ಹೋಗಲು ಇಚ್ಛಿಸುತ್ತೇನೆ ಎಂದು ಹೇಳಿದ್ದಾರೆ.

ರಾಹುಲ್‌ ಬಗ್ಗೆ ತಿಳಿದುಕೊಳ್ಳಲು ನನಗೆ ತುಂಬಾ ಆಸಕ್ತಿಯಿದೆ. ಮ್ಯಾಗಝಿನ್‌ಗಳಲ್ಲಿ ಅವರ ಫೋಟೋಗಳನ್ನು ನೋಡುವಾಗ ಇವರೊಂದಿಗೆ ಏನು ಮಾತನಾಡಬೇಕು ಎಂಬ ಬಗ್ಗೆಯೇ ಯೋಚಿಸುತ್ತೇನೆ ಎಂದು ಹೇಳಿರುವ ಕರೀನಾ, ನಮ್ಮಿಬ್ಬರಲ್ಲಿಯೂ ಒಂದು ನಿರ್ದಿಷ್ಟವಾದ ವಂಶಾವಳಿಯಿದೆ. ನಾನು ಸಿನಿಮಾ ಹಿನ್ನೆಲೆಯಿರುವ ವಂಶಾವಳಿಯಿಂದ ಬಂದಿದ್ದರೆ, ರಾಹುಲ್‌ ಗಾಂಧಿ ರಾಜಕೀಯ ಹಿನ್ನೆಲೆಯಿರುವ ವಂಶಾವಳಿಯಿಂದ ಬಂದಿದ್ದಾರೆ. ಆದ್ದರಿಂದ ನಮ್ಮಿಬ್ಬರ ನಡುವಿನ ಸಂಭಾಷಣೆ ಆಸಕ್ತಿದಾಯಕವಾಗಿರಬಹುದು ಎಂದು ವಿವರಿಸಿದ್ದಾರೆ.