ಕತ್ರಿನಾ ಕೈಫ್‌ ಫೋನ್‌ನಲ್ಲಿ ಭೂತ! ಲಾಕ್‌ಡೌನ್‌ನಲ್ಲಿ ಇದೆಂಥ ಅಚ್ಚರಿಯ ಸುದ್ದಿ!

ಕಳೆದ ವರ್ಷ ತೆರೆಕಂಡ 'ಭಾರತ್‌' ಸಿನಿಮಾ ಬಳಿಕ ನಟಿ ಕತ್ರಿನಾ ಕೈಫ್‌ ಯಾರೋ ಕೊಂಚ ಮಂಕಾಗಿದ್ದರು. ಗಲ್ಲಾಪೆಟ್ಟಿಗೆಯಲ್ಲಿ 'ಭಾರತ್‌' ಚಿತ್ರ ಹೇಳಿಕೊಳ್ಳುವಷ್ಟು ಯಶಸ್ಸು ಕಾಣಲಿಲ್ಲ. ಅಕ್ಷಯ್‌ ಕುಮಾರ್‌ ಜೊತೆ ನಟಿಸಿದ್ದ 'ಸೂರ್ಯವಂಶಿ' ಬಿಡುಗಡೆ ಆಗಲೇ ಇಲ್ಲ. ಈ ನಡುವೆ ಕತ್ರಿನಾ ಬಗ್ಗೆ ಒಂದು ಗಾಸಿಪ್‌ ಕೇಳಿಬರುತ್ತಲೇ ಇತ್ತು. ಅದೀಗ ನಿಜವಾಗಿದೆ.

ಹೌದು, ಕತ್ರಿನಾ ಹೊಸದೊಂದು ಹಾರರ್‌ ಸಿನಿಮಾದಲ್ಲಿ ನಟಿಸಲು ತಯಾರಿ ಮಾಡಿಕೊಳ್ಳುತ್ತಿದ್ದಾರೆ ಎಂಬ ಗುಸುಗುಸು ಕಳೆದೊಂದು ತಿಂಗಳಿನಿಂದ ಹರಿದಾಡುತ್ತಿತ್ತು. ಆ ಸಿನಿಮಾದಲ್ಲಿ ಶಾಹಿದ್‌ ಕಪೂರ್‌ ಸಹೋದರ ಇಶಾನ್‌ ಖಟ್ಟರ್‌, ಸಿದ್ಧಾರ್ಥ್‌ ಚತುರ್ವೇದಿ ಕೂಡ ನಟಿಸುತ್ತಾರೆ ಎನ್ನಲಾಗಿತ್ತು. ಆ ಸುದ್ದಿ ಈಗ ನಿಜವಾಗಿದೆ. ಅಧಿಕೃತವಾಗಿ ಆ ಸಿನಿಮಾ ಘೋಷಣೆ ಆಗಿದೆ. ಆಕರ್ಷಕವಾದ ಟೈಟಲ್‌ ಕೂಡ ಇಡಲಾಗಿದೆ.

ರಿತೇಶ್‌ ಸಿದ್ವಾನಿ ಮತ್ತು ಫರ್ಹಾನ್‌ ಅಖ್ತರ್‌ ಒಡೆತನದ ಎಕ್ಸೆಲ್‌ ಎಂಟರ್‌ಟೇನ್‌ಮೆಂಟ್‌ ಸಂಸ್ಥೆ ಮೂಲಕ ಈ ಸಿನಿಮಾ ಸಿದ್ಧವಾಗಲಿದ್ದು, 'ಫೋನ್‌ ಭೂತ್‌' ಎಂದು ಶೀರ್ಷಿಕೆ ಇಡಲಾಗಿದೆ. ಅದನ್ನು ಬಹಿರಂಗಗೊಳಿಸುವುದರ ಜೊತೆಗೆ ಫಸ್ಟ್‌ಲುಕ್‌ ಕೂಡ ಅನಾವರಣಗೊಂಡಿದೆ. ಇಶಾನ್‌, ಸಿದ್ದಾರ್ಥ್‌ ಮತ್ತು ಕತ್ರಿನಾ ಕೂಡ ತಮ್ಮ ತಮ್ಮ ಸೋಶಿಯಲ್‌ ಮೀಡಿಯಾ ಖಾತೆಗಳಲ್ಲಿ ಫಸ್ಟ್‌ಲುಕ್‌ ಪೋಸ್ಟರ್‌ ಹಂಚಿಕೊಂಡು ಸಂಭ್ರಮಿಸಿದ್ದಾರೆ.

also read: ಕತ್ರಿನಾ ಕೈಫ್‌-ಸಲ್ಮಾನ್‌ ಖಾನ್‌ ಮದುವೆ ವಿಡಿಯೋ ವೈರಲ್‌! ಫ್ಯಾನ್ಸ್‌ಗೆ ಅಚ್ಚರಿಯೋ ಅಚ್ಚರಿ

ಲಾಕ್‌ಡೌನ್‌ನಿಂದಾಗಿ ಸಿನಿಮಾರಂಗದ ವಹಿವಾಟಿನ ಮೇಲೆ ಹೊಡೆತ ಬಿದ್ದಿದೆ. ಹಾಗಾಗಿ ಹೊಸ ಚಿತ್ರಗಳನ್ನು ಅನೌನ್ಸ್‌ ಮಾಡಲು ಅನೇಕರು ಹಿಂದೇಟು ಹಾಕುತ್ತಿದ್ದಾರೆ. ರೆಡಿ ಇರುವ ಸಿನಿಮಾಗಳು ರಿಲೀಸ್‌ ಆದರೆ ಸಾಕಪ್ಪ ಎಂಬ ಮಾತು ಕೇಳಿಬರುತ್ತಿದೆ. ಅದರ ನಡುವೆಯೂ ಹೊಸ ಹಾರರ್‌ ಕಾಮಿಡಿ ಚಿತ್ರವನ್ನು ಎಕ್ಸೆಲ್‌ ಎಂಟರ್‌ಟೇನ್‌ಮೆಂಟ್‌ ಸಂಸ್ಥೆ ಘೋಷಿಸಿರುವುದು ವಿಶೇಷ.

also read: ಕತ್ರಿನಾ ಕೈಫ್‌ ನಂಬಿಕೊಂಡು 90 ಕೋಟಿ ರೂ. ಸುರಿಯಲು ಮುಂದಾಗಿರೋದು ಯಾರು? ಬಿ-ಟೌನ್‌ನಲ್ಲಿ ಬಿಸಿ-ಬಿಸಿ ಚರ್ಚೆ!