ಕರುಳು ಹಿಂಡುವ ಆನೆ ಸಾವಿನ ಸುದ್ದಿ ಕೇಳಿ ಕಣ್ಣೀರಿಟ್ಟ ಸಿನಿಮಾ ಕಲಾವಿದರು! ನ್ಯಾಯಕ್ಕಾಗಿ ಆಕ್ರೋಶ

ಆಹಾರ ಅರಸಿ ಬಂದಿದ್ದ ಆನೆಗೆ ಹಣ್ಣಿನಲ್ಲಿ ಸಿಡಿಮುದ್ದು ಇಟ್ಟು ತಿನಿಸಿದ ಹೇಯ ಕೃತ್ಯಕ್ಕೆ ದೇಶಾದ್ಯಂತ ಖಂಡನೆ ವ್ಯಕ್ತವಾಗುತ್ತಿದೆ. ಪ್ರಾಣಿಪ್ರಿಯರು ಕಣ್ಣೀರಿನ ಜೊತೆಗೆ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ಅಮಾನುಷವಾಗಿ ಕೊಲ್ಲಲ್ಪಟ್ಟ ಆನೆಯ ಫೋಟೋಗಳು ವೈರಲ್‌ ಆಗುತ್ತಿದ್ದಂತೆಯೇ ಅದು ಸಿನಿಮಾ ಸೆಲೆಬ್ರಿಟಿಗಳ ಗಮನವನ್ನೂ ಸೆಳೆದಿದೆ.

ಜನಸಾಮಾನ್ಯರು ಮಾತ್ರವಲ್ಲದೆ ಬಾಲಿವುಡ್‌ ಸಿನಿಮಾ ತಾರೆಯರು ಕೂಡ ಗರ್ಭಿಣಿ ಆನೆ ಸಾವಿನ ಸುದ್ದಿ ಕೇಳಿ ಕಂಬನಿ ಮಿಡಿದಿದ್ದಾರೆ. ಆನೆಯ ಫೋಟೋವನ್ನು ಶೇರ್‌ ಮಾಡಿಕೊಂಡಿರುವ ಅನುಷ್ಕಾ ಶರ್ಮಾ, 'ಈ ಕಾರಣಕ್ಕಾಗಿಯೇ ಪ್ರಾಣಿ ಹಿಂಸೆ ವಿರುದ್ಧ ನಮ್ಮ ದೇಶದಲ್ಲಿ ಕಠಿಣ ಕಾನೂನು ಜಾರಿ ಆಗಬೇಕಿದೆ' ಎಂದು ಟ್ವೀಟ್‌ ಮಾಡಿದ್ದಾರೆ. ಮೊದಲಿನಿಂದಲೂ ಪ್ರಾಣಿಗಳ ಬಗ್ಗೆ ಕಾಳಜಿ ವ್ಯಕ್ತಪಡಿಸುತ್ತ ಬಂದಿರುವ ಅವರು ಈ ಬಾರಿಯೂ ಧ್ವನಿ ಎತ್ತಿದ್ದಾರೆ.

ಹೆಣ್ಣಾನೆಯ ಕರುಣಾಜನಕ ವಿಷಯ ಕೇಳಿ ಶ್ರದ್ಧಾ ಕಪೂರ್‌ ತೀವ್ರ ಸಂತಾಪ ವ್ಯಕ್ತಪಡಿಸಿದ್ದಾರೆ. 'ಹೇಗೆ??? ಇಂಥದ್ದೆಲ್ಲ ಹೇಗೆ ನಡೆಯಲು ಸಾಧ್ಯ? ಮನುಷ್ಯರಿಗೆ ಹೃದಯವೇ ಇಲ್ಲವೇ? ಈ ಸುದ್ದಿ ತಿಳಿದು ನನ್ನ ಹೃದಯ ಒಡೆದು ಚೂರಾಗಿದೆ. ತಪ್ಪಿತಸ್ಥರಿಗೆ ಅತಿ ಕಠಿಣವಾದ ಶಿಕ್ಷೆ ಆಗಬೇಕು' ಎಂದು ಶ್ರದ್ಧಾ ಕಪೂರ್ ಟ್ವೀಟ್‌ ಮಾಡಿದ್ದಾರೆ. ಜೊತೆಗೆ ಕೇರಳ ಮುಖ್ಯಮಂತ್ರಿಗಳಿಗೂ ಟ್ಯಾಗ್‌ ಮಾಡಿದ್ದಾರೆ.

also read: ಗರ್ಭಿಣಿ ಕಾಡಾನೆಯ ಭೀಕರ ಹತ್ಯೆ : ರಕ್ಕಸ ಕೃತ್ಯಕ್ಕೆ ಸೋಶಿಯಲ್ ಮೀಡಿಯಾದಲ್ಲಿ ಕಿಡಿ

ನಟ ರಣದೀಪ್‌ ಹೂಡ ಅವರನ್ನೂ ಈ ಘಟನೆ ಅತಿಯಾಗಿ ಕಾಡಿದೆ. ಈ ಬಗ್ಗೆ ಅವರು ಸರಣಿ ಟ್ವೀಟ್‌ ಮಾಡುತ್ತಿದ್ದಾರೆ. 'ಇಂಥದ್ದನ್ನೆಲ್ಲ ನಾವು ಒಪ್ಪಿಕೊಳ್ಳಲೇಬಾರದು. ಅಪರಾಧಿಗಳ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಬೇಕು' ಎಂದು ಪರಿಸರ ಖಾತೆ ಸಚಿವ ಪ್ರಕಾಶ್‌ ಜಾವಡೇಕರ್‌ ಅವರಿಗೆ ರಣದೀಪ್‌ ಹೂಡ ಒತ್ತಾಯ ಹೇರಿದ್ದಾರೆ. ಈ ವಿಚಾರವಾಗಿ ಬೇರೆಯವರು ಮಾಡಿದ ಅನೇಕ ಟ್ವೀಟ್‌ಗಳನ್ನು ಅವರು ಶೇರ್‌ ಮಾಡಿಕೊಳ್ಳುತ್ತಿದ್ದಾರೆ.

also read: ಪುಟ್ಟ ಬಾಲೆ ಹಾಗೂ ಆನೆಯ ನಡುವಣ ಫ್ರೆಂಡ್ಸ್‌ಶಿಪ್ ವೈರಲ್

'ಇದು ತೀರಾ ಭಯಾನಕ ಆಗಿದೆ. ನಾವು ಈ ಪ್ರಾಣಿಗಳ ಪರವಾಗಿ ಧ್ವನಿ ಎತ್ತಬೇಕು ಹಾಗು ಅವುಗಳ ಜೊತೆಯಲ್ಲಿ ಬಾಳಬೇಕು. ಇದೇನು ತಮಾಷೆಯ ವಿಚಾರವೇ. ಹೃದಯ ಛಿದ್ರವಾಗುವಂತಿದೆ' ಎಂದು ಇನ್‌ಸ್ಟಾಗ್ರಾಮ್‌ನಲ್ಲಿ ಸ್ಟೇಟಸ್‌ ಶೇರ್‌ ಮಾಡಿಕೊಂಡಿದ್ದಾರೆ ನಟಿ ಆಲಿಯಾ ಭಟ್‌.