ವರುಣ್ ಧವನ್ ಪ್ರೇಯಸಿಗೆ ಜೀವ ಬೆದರಿಕೆ; ಕಂಗಾಲಾಗಿ ಕುಳಿತ ಜೋಡಿ!

ಬಾಲಿವುಡ್ ನಟ ವರುಣ್ ಧವನ್ ಕಂಗಾಲಾಗಿದ್ದಾರೆ. ಅವರ ಪ್ರೇಯಸಿ ನತಾಶಾಗೆ ಯುವತಿಯೊಬ್ಬಳು ಜೀವ ಬೆದರಿಕೆ ಒಡ್ಡಿದ್ದಾಳೆ. ಸದ್ಯ ಕಳಂಕ್ ಚಿತ್ರದ ಪ್ರಚಾರದಲ್ಲಿ ಬ್ಯುಸಿಯಾಗಿರುವ ನಟ ವರುಣ್ ಧವನ್ ಅವರಿಗೆ ಈ ಘಟನೆಯಿಂದ ಸಖತ್ ಶಾಕ್ ಆಗಿದೆ.

ನಟ ವರುಣ್ ಧವನ್, ಅಭಿಮಾನಿಗಳಿಗೆ ಹೆಚ್ಚು ಮಹತ್ವ ನೀಡುತ್ತಾರೆ. ಸಾಮಾಜಿಕ ಜಾಲತಾಣದಲ್ಲಿ ಸದಾ ಸಕ್ರಿಯವಾಗಿರುವ ವರುಣ್ ಧವನ್, ಸಮಯ ಸಿಕ್ಕಾಗ ಅಭಿಮಾನಿಗಳನ್ನು ಭೇಟಿಯಾಗುತ್ತಾರೆ. ಆದರೆ, ಕಳೆದ ಶುಕ್ರವಾರ ಅಭಿಮಾನಿಯೊಬ್ಬಳನ್ನು ಭೇಟಿಯಾಗದೇ ಹೋಗಿದ್ದು ಭಾರಿ ದೊಡ್ಡ ಗಲಾಟೆಗೆ ಕಾರಣವಾಗಿದೆ.
ಕಳಂಕ್ ಚಿತ್ರದ ಪ್ರಚಾರದಲ್ಲಿ ಬ್ಯುಸಿಯಾಗಿರುವ ವರುಣ್ ಧವನ್, ಮಹಿಳಾ ಅಭಿಮಾನಿಯನ್ನು ಭೇಟಿಯಾಗಿರಲಿಲ್ಲ.

ವರುಣ್ ಧವನ್ ಭೇಟಿ ಮಿಸ್ ಆಗಿದ್ದೇ ತಡ, ಕೋಪಗೊಂಡ ಯುವತಿ ಭದ್ರತಾ ಸಿಬ್ಬಂದಿ ಬಳಿ ಕೂಗಾಡಿದ್ದಾಳೆ. ಪ್ರಾಣ ಕಳೆದುಕೊಳ್ಳುತ್ತೇನೆಂದು ಕಂಡಕಂಡವರಲ್ಲಿ ಹೇಳಿ ಹೆದರಿಸಿದ್ದಾಳೆ. ನಂತರ ವರುಣ್ ಧವನ್ ಗರ್ಲ್ ಫ್ರೆಂಡ್ ನತಾಶಾ ಬಗ್ಗೆ ಮಾತನಾಡಿದ ಹುಡುಗಿ, ನತಾಶಾಳನ್ನು ಬಿಡುವುದಿಲ್ಲ, ಸಾಯಿಸುತ್ತೇನೆ ಎಂದು ಆಕೆಗೆ ಪ್ರಾಣ ಬೆದರಿಕೆಯೊಡ್ಡಿದ್ದಾಳೆ. ಇದರಿಂದ ನತಾಶಾ ಫುಲ್ ಕಂಗಾಲಾಗಿ ಕುಳಿತಿದ್ದಾಳಂತೆ.

ಈ ಬಗ್ಗೆ ವರುಣ್ ಧವನ್ ಭದ್ರತಾ ಸಿಬ್ಬಂದಿ ಸ್ಥಳೀಯ ಪೊಲೀಸ್ ಠಾಣೆಯಲ್ಲಿ ದೂರು ಸಲ್ಲಿಸಿದ್ದಾರೆ. ಎಷ್ಟು ಹೇಳಿದರೂ ಮಹಿಳಾ ಅಭಿಮಾನಿ ನಮ್ಮ ಮಾತು ಕೇಳಲಿಲ್ಲ. ಹಾಗಾಗಿ ಪೊಲೀಸರಿಗೆ ದೂರು ನೀಡಬೇಕಾಯ್ತು ಎಂದಿದ್ದಾರೆ. ಒಟ್ಟಿನಲ್ಲಿ, ವರುಣ್-ನತಾಶಾ ಜೋಡಿ ಆ ಯುವತಿಯ ವರ್ತನೆಯಿಂದ ಇರುವ ಕೆಲಸ ಬಿಟ್ಟು ಕಂಗಾಲಾಗಿ ಕುಳಿತುಕೊಳ್ಳುವಂತಾಗಿದೆ. ಅಂದಹಾಗೆ, ವರುಣ್ ಧವನ್ ಅಭಿನಯದ 'ಕಳಂಕ್' ಚಿತ್ರವು ಇದೇ ತಿಂಗಳು, ಏಪ್ರಿಲ್ 17, 2019ರಂದು ತೆರೆಗೆ ಬರಲಿದೆ.