ವಿವೇಕ್ ಒಬೆರಾಯ್ ವಿರುದ್ಧ ಕ್ರಮಕ್ಕೆ ಮುಂದಾದ ಮಹಿಳಾ ಆಯೋಗ

ಎಕ್ಸಿಟ್ ಪೋಲ್, ಚುನಾವಣೆ ಫಲಿತಾಂಶವನ್ನು ನಟಿ ಐಶ್ವರ್ಯಾ ರೈ ಅವರಿಗೆ ಹೋಲಿಸಿ ವಿವೇಕ್ ಒಬೆರಾಯ್ ಮಾಡಿದ ಟ್ವೀಟ್ ವಿವಾದಕ್ಕೆ ಗುರಿಯಾಗಿದೆ. ಮೇಮ್ ರೂಪದಲ್ಲಿರವ ಟ್ವೀಟ್‌ನಲ್ಲಿ ಮೂರು ಫೋಟೋಗಳನ್ನು ಕೊಲಾಜ್ ಮಾಡಲಾಗಿದೆ. ಒಂದರಲ್ಲಿ ಸಲ್ಲು ಜತೆಗಿನ ಐಶ್ವರ್ಯಾ ಫೋಟೋಗೆ 'opinion poll' ಎಂದು, ಇನ್ನೊಂದರಲ್ಲಿ ವಿವೇಕ್-ಐಶ್ವರ್ಯಾ ಜೋಡಿ ಫೋಟೋಗೆ 'exit poll' ಎಂದೂ ಐಶ್ವರ್ಯಾ-ಅಭಿಷೇಕ್ ಇರುವ ಮೂರನೇ ಫೋಟೋಗೆ 'results' ಎಂದಿದೆ.


ಯಾರೋ ಕಳುಹಿಸಿರುವ ಮೇಮನ್ನು ತನ್ನ ಟ್ವಿಟರ್‌ನಲ್ಲಿ ಹಂಚಿಕೊಂಡಿದ್ದರು ವಿವೇಕ್ ಒಬೆರಾಯ್. "ಹಹ! ಒಳ್ಳೆ ಸೃಜನಾತ್ಮಕವಾಗಿದೆ! ಯಾವುದೇ ರಾಜಕೀಯ ಬೇಡ.... ಜಸ್ಟ್ ಲೈಫ್" ಎಂದು ಕಾಮೆಂಟ್ ಮಾಡಿ ಪೋಸ್ಟ್ ಮಾಡಿದ್ದಾರೆ ವಿವೇಕ್ ಒಬೆರಾಯ್.

ಈ ಟ್ವೀಟ್‌ಗೆ ಹಲವಾರು ಮಂದಿ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ಸೆಲೆಬ್ರಿಟಿಗಳಾದ ಸೋನಂ ಕಪೂರ್ ಮತ್ತು ಜ್ವಾಲಾ ಗುಟ್ಟಾ ಸಹ ವಿವೇಕ್‌ರನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ. ಇದೀಗ ಮಹಾರಾಷ್ಟ್ರ ಮಹಿಳಾ ಆಯೋಗ ಸಹ ವಿವೇಕ್ ವಿರುದ್ಧ ಕ್ರಮಕ್ಕೆ ಮುಂದಾಗಿರುವುದಾಗಿ ಎಎನ್‍ಐ ವರದಿ ಮಾಡಿದೆ.

"ನಿಮ್ಮ ಈ ಮೂರ್ಖ ಜೋಕನ್ನು ಇನ್ನೊಬ್ಬರ ಖಾಸಗಿ ಬದುಕಿನ ಮೇಲೆ ಹಾಕಬೇಡಿ" ಎಂದಿದ್ದಾರೆ. "ಇದು ಕಳಪೆ ಅಭಿರುಚಿಯನ್ನು ತೋರುತ್ತದೆ. ಇನ್ನೊಬ್ಬರ ಖಾಸಗಿ ಬದುಕನ್ನು ಇಲ್ಲಿ ಚರ್ಚಿಸಬೇಕಾಗಿಲ್ಲ. ನಿಮಗೆ ನಾಚಿಕೆಯಾಗಬೇಕು ಎಂದು ಐಶ್ವರ್ಯಾ ರೈ ಅವರನ್ನು ಇಲ್ಲಿ ತಂದಿರುವುದಕ್ಕೆ ಬಹುತೇಕರು ಬೇಸರಿಸಿಕೊಂಡಿದ್ದಾರೆ.