'ಬಾಹುಬಲಿ'ಯನ್ನು ಹಿಂದಿಕ್ಕಿದ ಮಹೇಶ್‌ ಬಾಬು!

ಟಾಲಿವುಡ್‌ ಸೂಪರ್‌ ಸ್ಟಾರ್‌ ಮಹೇಶ್‌ ಬಾಬು 'ಬಾಹುಬಲಿ' ಸ್ಟಾರ್‌ಗಳಾದ ಪ್ರಭಾಸ್‌ ಮತ್ತು ರಾಣಾ ದಗ್ಗುಬಾಟಿಯನ್ನು ಹಿಂದಿಕ್ಕಿ ಮೋಸ್ಟ್‌ ಡಿಸೈರೆಬಲ್‌ ಮೆನ್‌-2016 ಪಟ್ಟಿಯಲ್ಲಿ 2ನೇ ಸ್ಥಾನ ಗಿಟ್ಟಿಸಿಕೊಂಡಿದ್ದಾರೆ.

ಹೈದರಾಬಾದ್‌ನಲ್ಲಿ ಟೈಮ್ಸ್‌ ಗ್ರೂಪ್‌ ನಡೆಸಿದ ಸಮೀಕ್ಷೆಯಲ್ಲಿ 2016ರಲ್ಲಿ ಮಿಸ್ಟರ್‌ ವರ್ಲ್ಡ್‌ ಪಟ್ಟವನ್ನು ಗಿಟ್ಟಿಸಿಕೊಂಡಿದ್ದ ರೋಹಿತ್‌ ಖಂಡೇಲ್‌ವಾಲ್‌, '50 ಮೋಸ್ಟ್‌ ಡಿಸೈರೆಬಲ್‌ ಮೆನ್‌' ಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆದುಕೊಂಡಿದ್ದಾರೆ. ಹೈದರಾಬಾದಿನ ರೂಪದರ್ಶಿಯಾಗಿರುವ ರೋಹಿತ್‌ ಖಂಡೇಲ್‌ವಾಲ್‌ ಮಿಸ್ಟರ್‌ ವರ್ಲ್ಡ್‌ 2016 ಪಟ್ಟ ಮುಡಿಗೇರಿಸಿಕೊಳ್ಳುವ ಮೂಲಕ ಮಿಸ್ಟರ್‌ ವರ್ಲ್ಡ್‌ ಆದ ಮೊದಲ ಭಾರತೀಯ ಎಂಬ ಹೆಮ್ಮಗೆ ಪಾತ್ರರಾದವರು.

ಈ ಬಾರಿಯ ಸಮೀಕ್ಷೆಯಲ್ಲಿ ಹೈದರಾಬಾದ್‌ ಜನತೆ 'ಬಾಹುಬಲಿ' ಸ್ಟಾರ್‌ಗಳಾದ ಪ್ರಭಾಸ್‌ ಮತ್ತು ರಾಣಾ ದಗ್ಗುಬಾಟಿಗೆ ಹೆಚ್ಚು ವೋಟ್‌ ಮಾಡುತ್ತಾರೆ ಎಂದು ಊಹಿಸಲಾಗಿತ್ತು. 'ಬಾಹುಬಲಿ 2' ಚಿತ್ರದ ಯಶಸ್ಸು ಇವರ ಕೈಹಿಡಿಯುತ್ತೆ ಎಂಬ ಮಾತುಗಳು ಕೇಳಿ ಬಂದಿದ್ದವು.

ಆದರೆ ಎಲ್ಲ ಲೆಕ್ಕಾಚಾರಗಳು ತಲೆಕೆಳಗಾಗಿದ್ದು, ಸಿನಿಮಾ ಹಿನ್ನೆಲೆಯಿಲ್ಲದ ರೋಹಿತ್‌ ಮೊದಲ ಸ್ಥಾನ ಪಡೆದುಕೊಂಡಿರುವುದು ಅಚ್ಚರಿಗೆ ಕಾರಣವಾಗಿದೆ. ಇನ್ನು 41 ವರ್ಷದ ಮಹೇಶ್‌ ಬಾಬು ತಮ್ಮ ಜನಪ್ರಿಯತೆಯನ್ನು ಕಾಯ್ದಿರಿಸಿಕೊಂಡಿದ್ದು, ಈಗಲೂ ಅವರು ತೆಲುಗು ಪ್ರೇಕ್ಷಕರ ಹಾಟ್‌ ಫೇವರಿಟ್‌ ಎಂದು ಸಾಬೀತುಪಡಿಸಿದ್ದಾರೆ.

ಮತ್ತೊಂದು ಇಂಟ್ರೆಸ್ಟಿಂಗ್‌ ಸುದ್ದಿ ಎಂದರೆ ನಟ ನಾನಿ ಈ ಪಟ್ಟಿಯಲ್ಲಿ 3ನೇ ಸ್ಥಾನದಲ್ಲಿದ್ದು, ರಾಣಾ ದಗ್ಗುಬಾಟಿ 4ನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿದ್ದಾರೆ. ಜ್ಯೂನಿಯರ್‌ ಎನ್‌ಟಿಆರ್‌ 5ನೇ ಸ್ಥಾನದಲ್ಲಿದ್ದರೆ, 'ಬಾಹುಬಲಿ' ಚಿತ್ರದ ಮೂಲಕ ದೇಶದ ಸೆಲೆಬ್ರಿಟಿಯಾಗಿರುವ ಪ್ರಭಾಸ್‌ ಮಾತ್ರ 6ನೇ ಸ್ಥಾನದಲ್ಲಿರುವುದು ವಿಚಿತ್ರ.