'ಸಂಜು' ತಾಯಿ ನರ್ಗೀಸ್ ದತ್ ಪಾತ್ರದಲ್ಲಿ ಮನಿಷಾ ಕೋಯಿರಾಲಾ

ಪೋಸ್ಟರ್‌ಗಳ ಮೂಲಕ ಕುತೂಹಲ ಮತ್ತು ಭರವಸೆ ಮೂಡಿಸಿರುವ ಸಿನಿಮಾ 'ಸಂಜು'. ಸಂಜಯ್ ದತ್ ಬಯೋಪಿಕ್ ಆಗಿರುವ ಈ ಸಿನಿಮಾದಲ್ಲಿ ’ಸಂಜು’ ಪಾತ್ರವನ್ನು ರಣಬೀರ್ ಕಪೂರ್ ಪೋಷಿಸಿದ್ದಾರೆ. ಇದೀಗ ಈ ಚಿತ್ರಕ್ಕೆ ಸಂಬಂಧಿಸಿದಂತೆ ಇನ್ನೊಂದು ಪೋಸ್ಟರ್ ಬಿಡುಗಡೆಯಾಗಿದೆ.

ಸಂಜಯ್ ದತ್ ತಾಯಿ ನರ್ಗೀಸ್ ದತ್ ಪಾತ್ರದಲ್ಲಿ ಮನಿಷಾ ಕೋಯಿರಾಲಾ ಕಾಣಿಸಿಕೊಂಡಿದ್ದಾರೆ. ಇದಕ್ಕೆ ಸಂಬಂಧ ಪಟ್ಟ ಪೋಸ್ಟರನ್ನು ನಿರ್ದೇಶಕ ರಾಜ್ ಕುಮಾರ್ ಹಿರಾನಿ ಟ್ವೀಟ್ ಮಾಡಿದ್ದಾರೆ. "ತಮ್ಮ ಮಗನನ್ನು ಪ್ರೀತಿಯಿಂದ 'ಸಂಜು' ಎಂದು ಕರೆಯುತ್ತಿದ್ದರು. ನಾವೂ ಹಾಗೆಯೇ ಮಾಡುತ್ತಿದ್ದೇವೆ. ನರ್ಗೀಸ್ ಜಿಯಾಗಿ ಮನಿಷಾ ಕೋಯಿರಾಲಾ ಜೂನ್ 29ರಂದು ನಿಮ್ಮ ಮುಂದೆ ಬರುತ್ತಿದ್ದಾರೆ" ಎಂದು ಟ್ವೀಟ್ ಮಾಡಿದ್ದಾರೆ.

ಸಂಜು ತಂದೆ ಪಾತ್ರದಲ್ಲಿ ಪರೇಶ್ ರಾವಲ್ ಅಭಿನಯಿಸಿದ್ದಾರೆ. ರಣಬೀರ್ ಕಪೂರ್ ತಮ್ಮ ಗೆಟಪ್ ಬದಲಾಯಿಸಿಕೊಂಡಿದ್ದು 58 ವರ್ಷದ ಸಂಜು ಪಾತ್ರದಲ್ಲಿ ಪರಕಾಯ ಪ್ರವೇಶ ಮಾಡಿರುವುದನ್ನು ಕಾಣಬಹುದು. ಪೋಸ್ಟರ್‌ನಲ್ಲಿ ನ್ಯೂಯಾರ್ಕ್ ಹಿನ್ನೆಲೆಯಲ್ಲಿ ಇದ್ದು ರಣಬೀರ್ ಮತ್ತು ಮನೀಷಾ ಅಮ್ಮ-ಮಗನಾಗಿ ಗಮನಸೆಳೆದಿದ್ದಾರೆ.

ನರ್ಗೀಸ್ ಅವರು ಕ್ಯಾನ್ಸರ್‌ಗೆ ತುತ್ತಾದಾಗ ಅವರಿಗೆ ನ್ಯೂಯಾರ್ಕ್‍ನಲ್ಲಿ ಚಿಕಿತ್ಸೆ ನೀಡಲಾಗಿತ್ತು. ಈ ಪೋಸ್ಟರ್ ಅಮ್ಮ ಮಗನ ಬಾಂಧವ್ಯಕ್ಕೆ ಕನ್ನಡಿ ಹಿಡಿಯುವಂತಿದೆ. ಸಂಜಯ್ ದತ್ ಹುಟ್ಟುಹಬ್ಬವಾದ ಜೂನ್ 6ರಂದು ’ಸಂಜು’ ಚಿತ್ರದ ಹೊಸ ಪೋಸ್ಟರನ್ನು ಚಿತ್ರತಂಡ ಬಿಡುಗಡೆ ಮಾಡಿರುವುದು ವಿಶೇಷ.

ಇನ್ನು ಮನಿಷಾ ಕೋಯಿರಾಲಾರ ಗೆಟಪ್ ನೋಡಿದರೆ ನರ್ಗೀಸ್ ಅವರು 1955ರಲ್ಲಿ ರಾಜ್ ಕಪೂರ್ ಸಿನಿಮಾದಲ್ಲಿ ನಟಿಸಿದ್ದ ’ಶ್ರೀ 420’ ಚಿತ್ರದ ಲುಕ್ ಹೋಲುತ್ತದೆ. ಮದರ್ ಇಂಡಿಯಾ ಚಿತ್ರದಲ್ಲಿ ಅಭಿನಯಿಸಿದ್ದ ಸುನಿಲ್ ದತ್‍ ಮತ್ತು ನರ್ಗೀಸ್ 1958ರಲ್ಲಿ ಮದುವೆಯಾದರು. 1959ರಲ್ಲಿ ಸಂಜಯ್ ದತ್ ಜನಿಸಿದರು.

ಮನಿಷಾ ಕೋಯಿರಾಲಾ ಸಹ ಕ್ಯಾನ್ಸರ್ ರೋಗಿಯಾಗಿದ್ದು ಇದೀಗ ಗುಣಮುಖರಾಗಿದ್ದಾರೆ. ಸಂಜು ಚಿತ್ರದ ಬಗ್ಗೆ ಮಾತನಾಡಿರುವ ಅವರು, ನಾನು ಕ್ಯಾನ್ಸರ್ ರೋಗಿಯನ್ನು ನೋಡಿದಾಗ ಅದರಿಂದ ನಾನು ಉಪಶಮನ ಪಡೆದದ್ದು ಕಾಡುತ್ತದೆ. ಇದೀಗ ನರ್ಗೀಸ್ ಪಾತ್ರದಲ್ಲಿ ಅಭಿನಯಿಸುತ್ತಿರುವ ಕಾರಣಕ್ಕೆ ಮತ್ತೆ ಕ್ಯಾನ್ಸರ್ ದಿನಗಳಿಗೆ ಮರಳಬೇಕಾಗಿದೆ" ಎಂದಿದ್ದಾರೆ.