ಎನ್‌ಟಿಆರ್‌ ಚಿತ್ರಕ್ಕೆ ನಾದೇಂಡ್ಲ ಶಾಕ್‌

ನಂದಮೂರಿ ಬಾಲಕೃಷ್ಣ ತಮ್ಮ ತಂದೆ ಎನ್‌ಟಿಆರ್‌ ಪಾತ್ರದಲ್ಲಿ ನಟಿಸುತ್ತಿರುವ ಎನ್‌ಟಿಆರ್‌ ಸಿನಿಮಾ ಇದೀಗ ಆಂಧ್ರ ಪ್ರದೇಶ ರಾಜಕೀಯದಲ್ಲಿ ಕೋಲಾಹಲವೆಬ್ಬಿಸಿದೆ.

ಈ ಚಿತ್ರದಲ್ಲಿ ತಮ್ಮನ್ನು ಕೆಟ್ಟದ್ದಾಗಿ ಚಿತ್ರಿಸಿರುವ ಅನುಮಾನವಿದೆ. ಒಂದು ವೇಳೆ ಹಾಗೆ ಚಿತ್ರಿಸಿದ್ದರೆ ನಾನು ನ್ಯಾಯಾಲಯಕ್ಕೆ ಮೊರೆ ಹೋಗುತ್ತೇನೆ ಎಂಬುದಾಗಿ ಮಾಜಿ ಮುಖ್ಯಮಂತ್ರಿ ನಾದೇಂಡ್ಲ ಭಾಸ್ಕರ ರಾವ್ ಹೇಳಿರುವುದು ಚಿತ್ರತಂಡಕ್ಕೆ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ.

1984ರಲ್ಲಿ ಮುಖ್ಯಮಂತ್ರಿಯಾಗಿ ಎನ್‌.ಟಿ. ರಾಮಾರಾವ್‌ ಅವರನ್ನು ಪದಚ್ಯುತಗೊಳಿಸಿದ್ದ ಅಂದಿನ ಕೇಂದ್ರ ಸರಕಾರ, ಮುಖ್ಯಮಂತ್ರಿ ಕುರ್ಚಿಯಲ್ಲಿ ನಾದೇಂಡ್ಲ ಭಾಸ್ಕರರಾವ್‌ ಅವರನ್ನು ಕೂರಿಸಿತ್ತು. ಈ ಬೆಳವಣಿಗೆ ಇಡೀ ದೇಶಾದ್ಯಂತ ದೊಡ್ಡ ಕಂಪನ ಉಂಟು ಮಾಡಿತ್ತು.

ಈ ಘಟನೆಯೂ ಸಿನಿಮಾದಲ್ಲಿ ಸೇರಿರುವ ಮಾಹಿತಿ ಇದೆ. ಒಂದು ವೇಳೆ ಸಿನಿಮಾದಲ್ಲಿ ನನ್ನ ಪಾತ್ರವನ್ನು ನೆಗೆಟೀವ್‌ ಆಗಿ ತೋರಿಸಿದ್ದರೆ ಸುಮ್ಮನಿರುವ ಪ್ರಶ್ನೆಯಿಲ್ಲ. ನ್ಯಾಯಾಲಯಕ್ಕೆ ಮೊರೆ ಹೋಗಿ ನ್ಯಾಯ ಪಡೆಯುತ್ತೇನೆಂದು ಅವರು ಹೈದರಾಬಾದ್‌ನಲ್ಲಿ ತಿಳಿಸಿದ್ದಾರೆ. ಇನ್ನೊಂದೆಡೆ ಈ ಬಗ್ಗೆ ನಿರ್ದೇಶಕ ಕ್ರಿಶ್‌ ಯಾವುದೇ ಪ್ರತಿಕ್ರಿಯೆ ವ್ಯಕ್ತಪಡಿಸಿಲ್ಲ.