ನಟಿ ಶ್ರೀರೆಡ್ಡಿಗೆ ಲೀಗಲ್ ನೋಟೀಸ್ ಕಳುಹಿಸಿದ ’ಈಗ’ ಸ್ಟಾರ್ ನಾನಿ

ಸಹನೆಗೂ ಒಂದು ಮಿತಿ ಇರುತ್ತದೆ ಎಂದಿದ್ದಾರೆ ಟಾಲಿವುಡ್ ’ಈಗ’ ಹೀರೋ, ನ್ಯಾಚುರಲ್ ಸ್ಟಾರ್ ನಾನಿ. ಕೂಲ್ ಆಗಿ ಕಾಣಿಸುವ ನಾನಿ ಇತ್ತೀಚೆಗೆ ಶ್ರೀರೆಡ್ಡಿ ತನ್ನ ಮೇಲೆ ಹೊರಿಸಿರುವ ಆರೋಪಗಳು ಹಾಗೂ ಅಸಭ್ಯಕರ ಹೇಳಿಕೆಗಳ ವಿರುದ್ಧ ಲೀಗಲ್ ನೋಟೀಸ್ ಕಳುಹಿಸಿದ್ದಾರೆ.

ತನಗೆ ತೆಲುಗು ಬಿಗ್ ಬಾಸ್ ಶೋನಲ್ಲಿ ಸ್ಪರ್ಧಿಸಲು ಅವಕಾಶ ನೀಡಲಿಲ್ಲ ಎಂಬ ಕಾರಣಕ್ಕೆ ನಟಿ ಶ್ರೀರೆಡ್ಡಿ ಈ ರೀತಿಯ ಆರೋಪಗಳನ್ನು ಮಾಡಿದ್ದಾರೆ ಎನ್ನಲಾಗಿದೆ. ಸಾಮಾಜಿಕ ಮಾಧ್ಯಮಗಳಲ್ಲಿ ನಾನಿ ಬಗ್ಗೆ ಕೀಳಾಗಿ, ಅಸಭ್ಯವಾಗಿ ಕಾಮೆಂಟ್ ಮಾಡಿರುವ ಸ್ಕ್ರೀನ್‍ಶಾಟ್‌ಗಳನ್ನು ತೆಗೆದುಕೊಂಡು ಈಗ ಶ್ರೀರೆಡ್ಡಿ ವಿರುದ್ಧ ಲೀಗಲ್ ನೋಟೀಸ್ ಕಳುಹಿಸಿದ್ದಾರೆ ನಾನಿ.

ಸಾಮಾಜಿಕ ಮಾಧ್ಯಮಗಳಲ್ಲಿ ತನ್ನ ವಿರುದ್ಧ ನಿರಾಧಾರ ಆರೋಪಗಳನ್ನು ಮಾಡುತ್ತಾ ತನ್ನ ಗೌರವಕ್ಕೆ ಧಕ್ಕೆ ತರುತ್ತಿದ್ದಾರೆಂದು ಶ್ರೀರೆಡ್ಡಿ ವಿರುದ್ಧ ನೋಟೀಸ್ ಕಳುಹಿಸಿದ್ದಾರೆ. ಮಾನನಷ್ಟ ಪ್ರಕರಣ ದಾಖಲಿಸಿದ್ದು, ಏಳು ದಿನಗಳಲ್ಲಿ ಸಿಟಿ ಸಿವಿಲ್ ನ್ಯಾಯಾಲಯಕ್ಕೆ ಹಾಜರಾಗಿ ತನ್ನ ವಿರುದ್ಧ ಮಾಡಿರುವ ಆರೋಪಗಳಿಗೆ ಉತ್ತರ ನೀಡಬೇಕೆಂದು ನಾನಿ ಪರ ವಕೀಲರು ನೋಟೀಸ್‌ನಲ್ಲಿ ಸೂಚಿಸಿದ್ದಾರೆ.

ಈ ಬಗ್ಗೆ ಟ್ವಿಟರ್‌ನಲ್ಲಿ ನಾನಿ ಪತ್ರವನ್ನೂ ಪೋಸ್ಟ್ ಮಾಡಿದ್ದಾರೆ. "ಪ್ರತಿ ಸಣ್ಣ ವಿಷಯಕ್ಕೂ ಪ್ರತಿಕ್ರಿಯಿಸಬೇಕಾಗಿಲ್ಲ. ಆರೋಪಗಳನ್ನು ಮಾಡಿದವರು ಕೇಳುವ ಪ್ರತಿ ಅಂಶದ ಬಗ್ಗೆ ಉತ್ತರಿಸುವುದು ನನಗಿಷ್ಟವಿಲ್ಲ. ಕಾನೂನು ಪ್ರಕ್ರಿಯೆ ಆರಂಭಿಸಿದ್ದೇವೆ. ಮಾನನಷ್ಟ ಪ್ರಕರಣದ ಅಡಿ ನೋಟೀಸ್ ಜಾರಿ ಮಾಡಿದ್ದೇವೆ. ನಿರಾಧಾರ ಆರೋಪಗಳನ್ನು ಮಾಡುತ್ತಾ ನನ್ನ ಸಮಯವನ್ನು ವ್ಯರ್ಥ ಮಾಡಬೇಡ. ನನ್ನ ವಿಚಾರದಲ್ಲಿ ನಾನು ಆತಂಕಪಡುತ್ತಿಲ್ಲ. ಎಲ್ಲರಿಗೂ ಕುಟುಂಬಗಳಿರುತ್ತವೆ. ಈ ರೀತಿಯ ತಪ್ಪು ಆರೋಪಗಳು, ಸುದ್ದಿಗಳನ್ನು ನಿಲ್ಲಿಸುವುದು ಉತ್ತಮ. ನಾನು ಈ ಬಗ್ಗೆ ಮತ್ತೊಮ್ಮೆ ಕಾಮೆಂಟ್ ಮಾಡಲು ಹೋಗಲ್ಲ" ಎಂದು ಮಾಡಿರುವ ಪೋಸ್ಟ್ ವೈರಲ್ ಆಗಿದೆ. ನಾನಿ ಅವರ ಟ್ವೀಟ್‌ಗೆ ನೇಟಿಜನ್ಸ್ ಸಹ ಬೆಂಬಲ ಸೂಚಿಸಿದ್ದಾರೆ.

"ನಾನಿ ಜತೆಗೆ ನಾನು ಸೇರಿದರೆ ಇನ್ನು ಡರ್ಟಿ ಪಿಕ್ಚರ್! ಆದರೆ ಯಾವಾಗ? ಅತಿ ಶೀಘ್ರದಲ್ಲೇ..ನಿಮ್ಮ ಮುಂದೆ ಬರುತ್ತಿದೆ. ನಾನಿ ರಾಸಲೀಲೆಗಳನ್ನು ಬಯಲು ಮಾಡುತ್ತೇನೆ. ನಾನಿ ಸಂಸಾರದಲ್ಲಿ ಇನ್ನು ಮುಂದೆ ಬೆಂಕಿ.." ಎಂದು ಶ್ರೀರೆಡ್ಡಿ ಇತ್ತೀಚೆಗೆ ಪೋಸ್ಟ್ ಮಾಡಿದ್ದು ಟಾಲಿವುಡ್ ವಲಯದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿತ್ತು.