ನಟಿ ದೀಪಿಕಾ ಪಡುಕೋಣೆ ಮ್ಯಾನೇಜರ್‌ ಮನೆ ಮೇಲೆ NCB ಅಧಿಕಾರಿಗಳ ದಾಳಿ! ಪತ್ತೆಯಾಯ್ತು ಡ್ರಗ್ಸ್!

ಬಾಲಿವುಡ್‌ನಲ್ಲಿ ದಿನದಿಂದ ದಿನಕ್ಕೆ ಡ್ರಗ್ಸ್ ಪ್ರಕರಣದ ಜಾಲ ದೊಡ್ಡದಾಗುತ್ತಿದೆ. ಈಗಾಗಲೇ ನಟಿ ದೀಪಿಕಾ ಪಡುಕೋಣೆ ಸೇರಿದಂತೆ ಕೆಲ ಸೆಲೆಬ್ರಿಟಿಗಳನ್ನು ಎನ್‌ಸಿಬಿ ಅಧಿಕಾರಿಗಳು ವಿಚಾರಣೆ ಮಾಡಿದ್ದಾರೆ. ಈ ಮಧ್ಯೆ ದೀಪಿಕಾ ಪಡುಕೋಣೆ ಮ್ಯಾನೇಜರ್ ಕರೀಷ್ಮಾ ಪ್ರಕಾಶ್‌ ಮನೆ ಮೇಲೆ ಎನ್‌ಸಿಬಿ ಅಧಿಕಾರಿಗಳು ಮಂಗಳವಾರ (ಅ.27) ದಾಳಿ ಮಾಡಿದ್ದಾರೆ. ಈ ವೇಳೆ ಡ್ರಗ್ಸ್ ಪತ್ತೆಯಾಗಿದೆ ಎಂದು ಹೇಳಲಾಗಿದೆ. NDPS ಕಾಯ್ದೆ ಅಡಿಯಲ್ಲಿ ಕರೀಷ್ಮಾ ವಿರುದ್ಧ ಪ್ರಕರಣ ದಾಖಲಾಗಿದೆ

ಎನ್‌ಸಿಬಿ ಅಧಿಕಾರಿಗಳು ನೀಡಿರುವ ಮಾಹಿತಿ ಪ್ರಕಾರ, ದಾಳಿ ವೇಳೆ 1.7 ಗ್ರಾಂ ಚರಸ್‌ ಹಾಗೂ ಎರಡು ಬಾಟಲಿ ಗಾಂಜಾ (ಸಿಬಿಡಿ) ಎಣ್ಣೆ ಪತ್ತೆಯಾಗಿದೆ ಎಂದು ಹೇಳಲಾಗಿದೆ. ಈ ಹಿಂದೆ ಸುಶಾಂತ್ ಸಿಂಗ್ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕರೀಷ್ಮಾ ಪ್ರಕಾಶ್ ಅವರನ್ನು ಎನ್‌ಸಿಬಿ ಅಧಿಕಾರಿಗಳು ವಿಚಾರಣೆ ಮಾಡಿದ್ದರು. 'ಬಾಲಿವುಡ್‌ನಲ್ಲಿ ಬಲವಾಗಿ ಬೇರೂರಿರುವ ಡ್ರಗ್ ಜಾಲವನ್ನು ಬುಡಸಹಿತ ಕಿತ್ತು ಹಾಕಲಿದ್ದೇವೆ. ಡ್ರಗ್ ಪೆಡ್ಲರ್ ಒಬ್ಬನನ್ನು ವಿಚಾರಣೆ ಮಾಡುವ ವೇಳೆ, ಕರೀಷ್ಮಾ ಪ್ರಕಾಶ್ ಹೆಸರು ಬಹಿರಂಗಗೊಂಡಿತ್ತು. ಆ ಹಿನ್ನೆಲೆಯಲ್ಲಿ ಕರೀಷ್ಮಾ ಮನೆ ಮೇಲೆ ದಾಳಿ ಮಾಡಲಾಗಿದ್ದು, 1.7 ಗ್ರಾಂ ಚರಸ್‌ ಹಾಗೂ ಎರಡು ಬಾಟಲಿ ಸಿಬಿಡಿ ಎಣ್ಣೆ ಪತ್ತೆಯಾಗಿದೆ' ಎಂದು ಎಸ್‌ಸಿಬಿ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಇನ್ನು, ದಾಳಿ ವೇಳೆ ಕರೀಷ್ಮಾ ಪ್ರಕಾಶ್ ಮನೆಯಲ್ಲಿ ಇರಲಿಲ್ಲ ಎಂದು ತಿಳಿದುಬಂದಿದೆ. ಅವರ ಪರಿಚಯಸ್ಥರ ಸಮ್ಮುಖದಲ್ಲಿ ಅಧಿಕಾರಿಗಳು ಮನೆಯನ್ನು ಶೋಧ ಮಾಡಿದ್ದಾರೆ. 'ವಿಚಾರಣೆಗಾಗಿ ಅವರನ್ನು ಕರೆಯಲು ಫೋನ್ ಮಾಡಿದೆವು. ಆದರೆ, ಅವರ ಫೋನ್ ಸ್ವಿಚ್ ಆಫ್‌ ಆಗಿದೆ. ಸದ್ಯಕ್ಕಂತೂ ಕರೀಷ್ಮಾ ಎಲ್ಲಿದ್ದಾರೆ ಎಂಬುದು ತಿಳಿದುಬಂದಿಲ್ಲ' ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ವಾಟ್ಸಪ್‌ನಲ್ಲಿ ಕೋಡ್‌ ವರ್ಡ್‌ ಬಳಸುತ್ತಿದ್ದ ದೀಪಿಕಾ! ತನಿಖೆಯಿಂದ ಮೆಸೇಜ್‌ ರಹಸ್ಯ ಬಹಿರಂಗ!

2017ರಲ್ಲಿ ದೀಪಿಕಾ ಪಡುಕೋಣೆ ಅವರು ಸೆಲೆಬ್ರಿಟಿ ಮ್ಯಾನೇಜರ್ ಕರೀಷ್ಮಾ ಪ್ರಕಾಶ್ ಜೊತೆ ನಡೆಸಿದ್ದ ವಾಟ್ಸಪ್‌ ಚಾಟ್‌ನಲ್ಲಿ ಡ್ರಗ್ಸ್‌ಗೆ ಸಂಬಂಧಿಸಿದ್ದ ಮಾಲ್‌, ವೀಡ್‌, ಹಶ್‌, ಡೂಬ್‌ ಎಂಬಿತ್ಯಾದಿ ಪದಗಳು ಬಳಕೆ ಮಾಡಿದ್ದರು. ಆದರೆ, ವಿಚಾರಣೆ ವೇಳೆ ವಿವಿಧ ಬಗೆಯ ಸಿಗರೇಟ್‌ಗಳಿಗೆ ತಮಾಷೆಗಾಗಿ ಈ ರೀತಿ ಹೆಸರಿಟ್ಟಿದ್ದರು ಎನ್ನಲಾಗಿತ್ತು. 'ಕಡಿಮೆ ಗುಣಮಟ್ಟದ ಸಿಗರೇಟ್‌ಗೆ ಮಾಲ್‌, ಉತ್ತಮ ಗುಣಮಟ್ಟದ ಸಿಗರೇಟ್‌ಗೆ ಹಶ್‌ ಮತ್ತು ವೀಡ್‌ ಎಂದು ಕರೆಯುತ್ತಿದ್ದೆವು. ದಪ್ಪ ಸಿಗರೇಟ್‌ಗೆ ಡೂಬ್‌ ಎಂದು ಹೆಸರಿಟ್ಟಿದ್ದೆವು' ಎಂದು ಅಧಿಕಾರಿಗಳ ಮುಂದೆ ದೀಪಿಕಾ ಮತ್ತು ಕರೀಷ್ಮಾ ಒಪ್ಪಿಕೊಂಡಿದ್ದಾರೆ ಎನ್ನಲಾಗಿತ್ತು.

ಗೋವಾದಲ್ಲಿ ತಪ್ಪು ಮಾಡಿದ ಕರಣ್‌ ಜೋಹರ್‌ & ದೀಪಿಕಾ? ಬೇಜವಾಬ್ದಾರಿ ಕೆಲಸ ಕಂಡು ಕಂಗನಾ ಗರಂ!