ಹೌದು. ಬಾಲಿವುಡ್ನ ಖ್ಯಾತ ನಿರ್ಮಾಪಕ ಕರಣ್ ಜೋಹರ್ ಅವರ ಮುಂಬರುವ ಸಿನಿಮಾಗಳಲ್ಲಿ ಐಟಂ ಸಾಂಗ್ ಇರುವುದಿಲ್ಲ. ಇದನ್ನು ಅವರೇ ಸ್ವತಃ ಹೇಳಿಕೊಂಡಿದ್ದಾರೆ. ನೂರಾರು ಪುರುಷರ ಮಧ್ಯೆ ಅಬ್ಬರದ ಸಂಗೀತಕ್ಕೆ ಮಾದಕವಾಗಿ ಕುಣಿಯುವ ನಟಿಯರ ದೃಶ್ಯವಿರುವ ಐಟಂ ಸಾಂಗ್ಗಳಲ್ಲಿ ಮಹಿಳೆಯರನ್ನು ಆಕ್ಷೇಪಾರ್ಹ ರೀತಿಯಲ್ಲಿ ತೋರಿಸಲಾಗುತ್ತಿದೆ ಎಂಬೊಂದು ಚರ್ಚೆ ಬಾಲಿವುಡ್ನಲ್ಲಿ ಆರಂಭವಾಗಿರುವ ಹಿನ್ನೆಲೆಯಲ್ಲಿ ಕರಣ್ ಜೋಹರ್ ಈ ಮಾತು ಹೇಳಿದ್ದಾರೆ.
ತಮ್ಮ ಹಲವಾರು ಸಿನಿಮಾಗಳಲ್ಲಿ ಜನಪ್ರಿಯ ಐಟಂ ಸಾಂಗ್ಗಳನ್ನು ನೀಡಿರುವ ಜೋಹರ್, ಈ ಹಾಡುಗಳಲ್ಲಿ ತಾವು ಮಹಿಳೆಯರನ್ನು ಆಕ್ಷೇಪಾರ್ಹ ರೀತಿಯಲ್ಲಿ ತೋರಿಸಿದ್ದು ನಾನು ಮಾಡಿದ ತಪ್ಪು ಎಂದು ಒಪ್ಪಿಕೊಂಡಿದ್ದಾರೆ. ಮಹಿಳೆಯನ್ನು ವೇದಿಕೆಯ ಕೇಂದ್ರ ಭಾಗದಲ್ಲಿ ನಿಲ್ಲಿಸಿ ಆಕೆಯ ಸುತ್ತ ಆಸೆಗಣ್ಣಿನಿಂದ ನೋಡುತ್ತಿರುವ ಸಾವಿರಾರು ಪುರುಷರು ಇರುವ ದೃಶ್ಯ ತಪ್ಪು ಸಂದೇಶ ರವಾನಿಸುತ್ತದೆ. ಓರ್ವ ಸಿನಿಮಾ ನಿರ್ಮಾಪಕನಾಗಿ ನಾನೂ ಆ ತಪ್ಪನ್ನು ಮಾಡಿದ್ದೇನೆ. ಇನ್ನು ಮುಂದೆ ಅಂಥ ತಪ್ಪು ಮಾಡುವುದಿಲ್ಲ ಎಂದು ಅವರು ಪ್ರಾಮಿಸ್ ಮಾಡಿದ್ದಾರೆ.