ಹೃದಯ ಛಿದ್ರವಾದ ಟೀ ಶರ್ಟ್ ಧರಿಸಿದ ಮಲೈಕಾ ಫೋಟೋ ವೈರಲ್

ಬಾಲಿವುಡ್‌ ಜೋಡಿ ಹಕ್ಕಿಗಳಾದ ಮಲೈಕಾ ಅರೋರಾ ಮತ್ತು ಅರ್ಜುನ್ ಕಪೂರ್ ಇತ್ತೀಚೆಗೆ ಜತೆಯಾಗಿ ಎಲ್ಲೂ ಕಾಣಿಸಿಕೊಳ್ಳುತ್ತಿಲ್ಲ. ಇವರು ಇನ್ನೇನು ಮದುವೆಯಾಗುತ್ತಾರೆ ಎಂಬ ಸುದ್ದಿ ಹಬ್ಬಿತ್ತು. ಆದರೆ ಈಗ ಇವರಿಬ್ಬರೂ ನಾನೊಂದು ತೀರ ನೀನೊಂದು ತೀರ ಎಂಬಂತಾಗಿದ್ದಾರೆ.

ಈ ಬಗ್ಗೆ ಇತ್ತೀಚೆಗೆ ಪ್ರತಿಕ್ರಿಯಿಸಿದ್ದ ಅರ್ಜುನ್ ಕಪೂರ್, "ನನಗಿನ್ನೂ 33 ವರ್ಷ. ಈಗಲೇ ಮದುವೆಯಾಗಬೇಕು ಎಂಬ ಉಮೇದು ನನಗಿಲ್ಲ" ಎಂದಿದ್ದರು. "ಸಾಮಾನ್ಯವಾಗಿ ಮದುವೆ ಬಳಿಕ ಪುರುಷರಿಗೆ ಬಕ್ಕತಲೆ ಬರುತ್ತದೆ ಎನ್ನುತ್ತಾರೆ. ಆದರೆ ನನಗೆ ಮೊದಲೇ ಬಕ್ಕತಲೆ ಬಂದಿದೆ (ತನ್ನ ಮುಂದಿನ ಸಿನಿಮಾದಲ್ಲಿನ ಗೆಟಪ್ ಕುರಿತು ಹೇಳುತ್ತಾ). ವಿಷಯ ಹೀಗಿರಬೇಕಾದರೆ ಇನ್ನು ಮದುವೆ ಯಾಕೆ ಎಂದಿದ್ದರು.

ಈಗಲೇ ನನಗೆ ಮದುವೆಯಾಗುವ ಉದ್ದೇಶ ಇಲ್ಲ. ನನ್ನ ವೈಯಕ್ತಿಕ ಬದುಕಿಗೆ ಗೌರವ ನೀಡಿ. ಸದ್ಯಕ್ಕೆ ನಾನು ಪ್ರೀತಿಯಲ್ಲಿ ತುಂಬಾ ಸಂತೋಷವಾಗಿದ್ದೇನೆ. ವೃತ್ತಿಪರವಾಗಿ, ವೈಯಕ್ತಿಕವಾಗಿ ನೆಮ್ಮದಿಯಾಗಿದ್ದೇನೆ. ಕಣ್ತುಂಬ ನಿದ್ದೆ ಮಾಡುತ್ತಿದ್ದೇನೆ. ಜೀವನದಲ್ಲಿ ನನಗೆ ಇದಕ್ಕಿಂತಲೂ ಇನ್ನೇನು ಬೇಕು? ಎಂದಿದ್ದರು.

ಇದೀಗ ಇದಕ್ಕೆ ಉತ್ತರ ಎಂಬಂತೆ ಮಲೈಕಾ ಅರೋರಾ ಹೃದಯ ಛಿದ್ರವಾಗಿರುವ ಟೀಶರ್ಟ್ ತೊಟ್ಟು ಓಡಾಡುತ್ತಿರುವ ಫೋಟೋಗಳು ವೈರಲ್ ಆಗಿವೆ. ಅರ್ಜುನ್ ಕಪೂರ್ ಮಾತಿಗೆ ಹೃದಯಗಳು ಛಿದ್ರವಾದವೇ? ಎಂಬ ಚರ್ಚೆ ಬಾಲಿವುಡ್‌ನಲ್ಲಿ ನಡೆದಿದೆ. 2016ರಲ್ಲಿ ಅರ್ಬಾಜ್ ಖಾನ್ ಅವರೊಂದಿಗೆ ವಿಚ್ಛೇದನ ಪಡೆದ ಬಳಿಕ ಅರ್ಜುನ್ ಕಪೂರ್ ಜತೆಗೆ ಹೆಚ್ಚಾಗಿ ಕಾಣಿಸಿಕೊಂಡಿದ್ದರು. ಇಬರಿಬ್ಬರೂ ಜತೆಯಾಗಿ ಓಡಾಡುತ್ತಾ ಗಾಸಿಪ್‍ಗೆ ಕಾರಣವಾಗಿದ್ದರು.