ಕೊನೆಗೂ ಮದುವೆ ಬಗ್ಗೆ ಬಾಯ್ಬಿಟ್ಟ ಬಾಹುಬಲಿ!

'ಬಾಹುಬಲಿ' ಖ್ಯಾತಿಯ ಪ್ರಭಾಸ್‌ ಮದುವೆ ಕುರಿತು ಸಾಕಷ್ಟು ಸುದ್ದಿಗಳು ಹರಿದಾಡುತ್ತಲೇ ಇದ್ದವು. ಇದೀಗ ಸ್ವತಃ ಪ್ರಭಾಸ್‌ ಅವರೇ ತಮ್ಮ ಮದುವೆ ವಿಚಾರವಾಗಿ ಮಾತನಾಡಿದ್ದಾರೆ.

ಎಸ್‌ಎಸ್‌ ರಾಜಮೌಳಿ ನಿರ್ದೇಶನದ 'ಬಾಹುಬಲಿ' ಚಿತ್ರ ಭಾರತೀಯ ಚಿತ್ರರಂಗದ ಇತಿಹಾಸದಲ್ಲೇ ಒಂದು ಮೈಲಿಗಲ್ಲಾಗಿರುವುದು ಗೊತ್ತಿರುವ ಸಂಗತಿಯೇ. ಇನ್ನು ಈ ಚಿತ್ರದಿಂದ ಟಾಲಿವುಡ್‌ನ ರೆಬೆಲ್‌ ಸ್ಟಾರ್‌ ಪ್ರಭಾಸ್‌ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಗುರುತಿಸಿಕೊಂಡುಬಿಟ್ಟರು. ಇದರ ಬೆನ್ನಲ್ಲೇ ಪ್ರಭಾಸ್‌ ಮದುವೆ ಕುರಿತು ಸಾಕಷ್ಟು ಗಾಳಿಮಾತುಗಳು ಹರಿದಾಡಲು ಆರಂಭಿಸಿದವು.

ಸಹನಟಿ ಅನುಷ್ಕಾ ಶೆಟ್ಟಿ ಜತೆ ಹಸೆಮಣೆ ಏರಲಿದ್ದಾರೆ ಎಂಬ ವದಂತಿ ಹಬ್ಬಿತು. ಇಂಥ ಸುದ್ದಿಗೆ ಅನುಷ್ಕಾ ಶೆಟ್ಟಿ ತಕ್ಕ ಉತ್ತರ ನೀಡಿ ಎಲ್ಲರ ಬಾಯಿ ಮುಚ್ಚಿಸಿದರು. ಇದಾದ ನಂತರ ಖ್ಯಾತ ಉದ್ಯಮಿಯ ಮೊಮ್ಮಗಳನ್ನು ಪ್ರಭಾಸ್‌ ವರಿಸಲಿದ್ದಾರೆ ಎಂಬ ಸುದ್ದಿ ಕೇಳಿಬಂದಿತು. ಅದಕ್ಕೆ ಪ್ರಭಾಸ್‌ ಕೂಡ ಹಸಿರು ನಿಶಾನೆ ತೋರಿಸಿದ್ದಾರೆ ಎಂದು ಮೂಲಗಳು ವರದಿ ಮಾಡಿದ್ದವು.

ಇದೀಗ ತಮ್ಮ ಮದುವೆ ವಿಚಾರವಾಗಿ ಬಾಯ್ಬಿಟ್ಟಿರುವ ಪ್ರಭಾಸ್‌, ಎಲ್ಲ ಅಂತೆ ಕಂತೆಗಳಿಗೆ ತೆರೆ ಎಳೆದಿದ್ದಾರೆ. ಸದ್ಯಕ್ಕೆ ಮದುವೆ ಕುರಿತು ಯಾವುದೇ ಪ್ರಯತ್ನ ನಡೆಯುತ್ತಿಲ್ಲ. ಮದುವೆ ಬಗ್ಗೆ ಯೋಚನೆಯನ್ನೂ ಮಾಡಿಲ್ಲ ಎಂದು ಹೇಳಿದ್ದಾರೆ.

ಇನ್ನು ಅನುಷ್ಕಾ ಶೆಟ್ಟಿ ಹಾಗೂ ತಮ್ಮ ನಡುವೆ ಕೇಳಿ ಬಂದಿದ್ದ ಗಾಸಿಪ್‌ ಕುರಿತು ಪ್ರತಿಕ್ರಿಯಿಸಿರುವ ಪ್ರಭಾಸ್‌, 'ಒಬ್ಬ ನಟ ಎರಡಕ್ಕಿಂತ ಹೆಚ್ಚು ಸಿನಿಮಾಗಳಲ್ಲಿ ಒಂದೇ ನಟಿ ಜತೆ ಕಾಣಿಸಿಕೊಂಡರೆ, ಇಂತಹ ರೂಮರ್ಸ್‌ಗಳು ಕೇಳಿ ಬರುವುದು ಸಹಜ. ಈ ಸುದ್ದಿಗಳ ಬಗ್ಗೆ ಹೆಚ್ಚು ತಲೆ ಕೆಡಿಸಿಕೊಳ್ಳಬಾರದು' ಎಂದಿದ್ದಾರೆ ಬಾಹುಬಲಿ ಸ್ಟಾರ್‌.