ಇಂದು ಪ್ರಿಯಾಂಕಾ - ನಿಕ್‌ ನಿಶ್ಚಿತಾರ್ಥ ಪಾರ್ಟಿ

ಮುಂಬಯಿ: ಬಾಲಿವುಡ್‌ ನಟಿ ಪ್ರಿಯಾಂಕಾ ಚೋಪ್ರಾ ಅವರ ಭಾವಿ ಪತಿ, ಹಾಲಿವುಡ್‌ ಗಾಯಕ ನಿಕ್‌ ಜೋನಸ್‌ ಹಾಗೂ ಆತನ ಪೋಷಕರು ಶುಕ್ರವಾರ ಪ್ರಿಯಾಂಕಾ ಪೋಷಕರನ್ನು ಭೇಟಿಯಾಗಿದ್ದಾರೆ.

ಮುಂಬಯಿಗೆ ಬಂದಿರುವ ನಿಕ್‌ ತಂದೆ ತಂದೆ ಪೌಲ್‌ ಕೇವಿನ್‌ ಜೋನಸ್‌ ಮತ್ತು ತಾಯಿ ಡೆನಿಸ್‌ ಮಿಲ್ಲರ್‌ ಅವರನ್ನು ಪ್ರಿಯಾಂಕಾ ಕುಟುಂಬ ಆತ್ಮೀಯವಾಗಿ ಬರ ಮಾಡಿಕೊಂಡಿತು. ಈಗಾಗಲೇ ನಿಕ್‌ ಹಾಗೂ ಪಿಗ್ಗಿ ನಡುವೆ ನಿಶ್ಚಿತಾರ್ಥ ನಡೆದಿದ್ದರೂ ಅದನ್ನು ಗೌಪ್ಯವಾಗಿರಿಸಲಾಗಿತ್ತು. ಈಗ ಭಾರತದಲ್ಲಿ ಸಿನಿ ಲೋಕದ ಸ್ನೇಹಿತರಿಗೆ ಹಾಗೂ ಕುಟುಂಬದ ಆಪ್ತರಿಗೆ ಶನಿವಾರ ಔತಣಕೂಟ ಏರ್ಪಡಿಸುವ ಮೂಲಕ ನಿಶ್ಚಿತಾರ್ಥವನ್ನು ಅಧಿಕೃತವಾಗಿ ಘೋಷಿಸಲಿದ್ದಾರೆ ಎನ್ನಲಾಗಿದೆ. ಎರಡೂ ಕುಟುಂಬಗಳು ಒಟ್ಟಿಗೆ ಎಂಗೇಜ್‌ಮೆಂಟ್‌ ಪಾರ್ಟಿ ಆಯೋಜಿಸಿವೆ.

ಪ್ರಿಯಾಂಕಾ ಚೋಪ್ರಾ ತಮ್ಮ ಮದುವೆ ಸರಳ ಹಾಗೂ ಸಾಂಪ್ರದಾಯಕವಾಗಿ ನಡೆಯಬೇಕೆಂದು ಬಯಸುತ್ತಿದ್ದು, ಭಾರತೀಯ ಶೈಲಿಯಲ್ಲಿ ವಿವಾಹವಾಗಲಿದ್ದಾರೆ ಎಂದು ತಿಳಿದುಬಂದಿದೆ. ಇದಕ್ಕೂ ಮುನ್ನ ಪ್ರಿಯಾಂಕಾ ಎರಡು ಸಮಾರಂಭಗಳಲ್ಲಿ ತಮ್ಮ ಎಂಗೇಜ್‌ಮೆಂಟ್‌ ಉಂಗುರವನ್ನು ಕ್ಯಾಮರಾ ಕಣ್ಣುಗಳಿಂದ ಮುಚ್ಚಿಡಲು ಬಯಸಿದ್ದರು. ಆದರೆ ಬಾಲಿವುಡ್‌ ನಿರ್ದೇಶಕ ಅಲಿ ಅಬ್ಬಾಸ್‌ ಜಫರ್‌ ಅವರು ಪ್ರಿಯಾಂಕಾ ತಮ್ಮ ಚಿತ್ರ 'ಭಾರತ್‌'ನಿಂದ ಹೊರಹೋಗಿದ್ದು ಅವರಿಗೆ ಇದು ವಿಶೇಷವಾದ 'ನಿಖಾ' ಸಮಯ ಎಂದು ಟ್ವೀಟ್‌ ಮಾಡುವ ಮೂಲಕ ಇವರಿಬ್ಬರ ನಿಶ್ಚಿತಾರ್ಥದ ಬಗ್ಗೆ ಸುಳಿವು ನೀಡಿದ್ದರು.