ಪ್ರಿಯಾಂಕಾ ಚೋಪ್ರಾ ಹ್ಯಾಂಡ್‍ಬ್ಯಾಗ್ ಬೆಲೆ ಅಷ್ಟು ದುಬಾರಿಯೇ?

ಸೆಲೆಬ್ರಿಟಿಗಳ ಜೀವನಶೈಲಿಯೇ ಭಿನ್ನ. ಇನ್ನು ಸಿನಿಮಾ ತಾರೆಯರ ಬಗ್ಗೆ ವಿಶೇಷವಾಗಿ ಹೇಳುವ ಅಗತ್ಯವಿಲ್ಲ. ಯಾವುದೇ ಕಾರ್ಯಕ್ರಮ, ಸಭೆ ಸಮಾರಂಭಕ್ಕೆ ಹೋದರೂ ವಿಶೇಷ ಮುತುವರ್ಜಿ ವಹಿಸುತ್ತಾರೆ. ಇತ್ತೀಚೆಗೆ ಗ್ಲೋಬಲ್ ಸ್ಟಾರ್ ಪ್ರಿಯಾಂಕಾ ಚೋಪ್ರಾ ಬಳಸಿರುವ ಹ್ಯಾಂಡ್‌ಬ್ಯಾಗ್ ಸಾಮಾಜಿಕ ಮಾಧ್ಯಮದಲ್ಲಿ ಹಾಟ್ ಟಾಪಿಕ್ ಆಗಿ ಬದಲಾಗಿದೆ.

ಪ್ರಿಯಾಂಕಾ ಚೋಪ್ರಾ ಮತ್ತು ಹಾಲಿವುಡ್ ನಟ, ಗಾಯಕ ನಿಕ್ ಜೋನಾಸ್ ಜತೆಗೆ ನ್ಯೂಜರ್ಸಿಯಲ್ಲಿನ ತನ್ನ ಸಹೋದರಿ ಮದುವೆ ಸಮಾರಂಭಕ್ಕೆ ಹಾಜರಾಗಿದ್ದರು. ಈ ಕಾರ್ಯಕ್ರಮದಲ್ಲಿ ಪ್ರಿಯಾಂಕಾ ಅವರಷ್ಟೇ ಆಕರ್ಷಿಸಿದ್ದು ಅವರ ಹ್ಯಾಂಡ್‍ಬ್ಯಾಗ್. ಯಾಕೆಂದರೆ ಅದು ಅಷ್ಟೊಂದು ದುಬಾರಿ.

ವಿಶೇಷ ಎಂದರೆ ಅವರ ಕೈಯಲ್ಲಿದ್ದ ಹ್ಯಾಂಡ್‍ಬ್ಯಾಗ್ ಬೆಲೆ 6,820 ಡಾಲರ್ ಅಂತೆ. ಭಾರತೀಯ ಕರೆನ್ಸಿಯಲ್ಲಿ ಸುಮಾರು 4.6 ಲಕ್ಷ ರೂ.ಗಳು. ಈ ಹಣದಲ್ಲಿ ಟಾಟಾ ಟಿಯಾಗೋ, ರೆನೊ ಕ್ವಿಡ್‍ನಂತಹ ಕಾರುಗಳನ್ನು ಖರೀಸಬಹುದು. ಮಾರುಕಟ್ಟೆಯಲ್ಲಿ ಟಿಯಾಗೋ ಕಾರಿನ ಬೆಲೆ 3.56 ಲಕ್ಷ, ರೆನೊ ಕ್ವಿಡ್ ಬೆಲೆ 3.9 ಲಕ್ಷ.

ಇದೀಗ ಪ್ರಿಯಾಂಕಾ ಹಾಲಿವುಡ್‌ನಲ್ಲೂ ಹೆಸರು ಮಾಡಿದ್ದಾರೆ. ಅಮೆರಿಕದ ಟೆಲಿವಿಷನ್ ಸೀರೀಸ್ ಕ್ವಾಂಟಿಕೋದಲ್ಲೂ ಅವರಿಗೆ ತಾರಾ ಪಟ್ಟ ಸಿಕ್ಕಿದೆ. ಹಾಗಾಗಿ ಪ್ರಿಯಾಂಕಾಗೆ ಕೇಳಿದಷ್ಟು ಸಂಭಾವನೆ ಕೊಟ್ಟು ಸಿನಿಮಾಗಳಲ್ಲಿ ಅವಕಾಶ ನೀಡಲು ನಿರ್ಮಾಪಕರು ಮುಂದೆ ಬರುತ್ತಿದ್ದಾರೆ. ಅಷ್ಟೆಲ್ಲಾ ಹಣ ಸಂಪಾದಿಸುವಾಗ ಇಂತಹ ಬ್ಯಾಗ್ ಖರೀದಿಸುವುದೇನು ಕಷ್ಟವಲ್ಲ ಬಿಡಿ ಎನ್ನುವವರೂ ಇದ್ದಾರೆ.

ಬಾಲಿವುಡ್‌ನಲ್ಲಿ ಸಲ್ಮಾನ್ ಖಾನ್ ಜತೆಗೆ ’ಭರತ್’ ಎಂಬ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಇನ್ನೊಂದು ಕಡೆ ನಿಕ್ ಜೋನಾಸ್ ಜತೆಗೆ ಸುತ್ತಾಡುತ್ತಿದ್ದು ಮದುವೆಗೆ ಸಿದ್ಧವಾಗುತ್ತಿದ್ದಾರೆ ಎಂಬ ಸುದ್ದಿ ಇದೆ. ಈ ಬಗ್ಗೆ ಇಬ್ಬರೂ ಯಾವುದೇ ಪ್ರತಿಕ್ರಿಯೆ ನೀಡದೆ ಇರುವುದು ಇನ್ನಷ್ಟು ಅನುಮಾನಕ್ಕೆ ಕಾರಣವಾಗಿದೆ. ಇದೆಲ್ಲಾ ನೋಡಿದರೆ ದೇಸಿಗರ್ಲ್ ಶೀಘ್ರದಲ್ಲೇ ಹಸೆಮಣೆ ಏರುವ ಸಾಧ್ಯತೆಗಳಿವೆ.