ಲಾಸ್‌ ಏಂಜಲೀಸ್‌ನಲ್ಲಿ ಪ್ರಿಯಾಂಕಾ ಚೋಪ್ರ ರಿಸೆಪ್ಷನ್‌

ಮದುವೆಯಾಗಿ ಬರೋಬ್ಬರಿ ಒಂದು ತಿಂಗಳಾಗಿದ್ದರೂ ಪ್ರಿಯಾಂಕಾ ಚೋಪ್ರ ಮತ್ತು ನಿಕ್‌ ಜೊನಾಸ್‌ ದಂಪತಿಯ ಮದುವೆ ಸಂಭ್ರಮ ಮುಗಿದಿಲ್ಲ. ಮದುವೆಯ ನಂತರ ಭಾರತದಲ್ಲಿ ಮೂರು ರಿಸೆಪ್ಷನ್‌ ಆಯೋಜಿಸಿದ್ದ ಈ ಜೋಡಿ ಈ ತಿಂಗಳ ಕೊನೆಗೆ ಲಾಸ್‌ ಏಂಜಲೀಸ್‌ನಲ್ಲಿ ಮತ್ತೊಂದು ಅದ್ಧೂರಿ ಮದುವೆ ರಿಸೆಪ್ಷನ್‌ ಆಯೋಜಿಸಿದೆ.

ಈ ರಿಸೆಪ್ಷನ್‌ಗೆ ಹಾಲಿವುಡ್‌ ಸಿಲೆಬ್ರಿಟಿಗಳಾದ ಕೆರ್ರಿ ವಾಷಿಂಗ್ಟನ್‌, ಡಾಯ್ನೆ ಜಾನ್ಸನ್‌, ಎಲೆನ್‌ ಡಿಜೆನೆರಸ್‌ ಮುಂತಾದವರು ಮತ್ತು ಪ್ರಿಯಾಂಕ ಚೋಪ್ರಾರ ಆತ್ಮೀಯ ಗೆಳತಿಯೂ ಆಗಿರುವ ಬ್ರಿಟನ್‌ ರಾಜಮನೆತನದ ಕಿರಿಯ ರಾಜಕುಮಾರ ಪ್ರಿನ್ಸ್‌ ಹ್ಯಾರಿಯ ಪತ್ನಿ ಮೇಗನ್‌ ಮಾರ್ಕೆಲ್‌ ಪಾಲ್ಗೊಳ್ಳಲಿದ್ದಾರೆ. ನಿಕ್‌ ಜೊನಾಸ್‌ ಜನಪ್ರಿಯ ಗಾಯಕರಾಗಿರುವುದರಿಂದ ಸಂಗೀತ ಲೋಕದ ಗಣ್ಯರನ್ನು ರಿಸೆಪ್ಷನ್‌ಗೆ ಆಹ್ವಾನಿಸಲಾಗಿದೆ. ಪ್ರಿಯಾಂಕ ಕಡೆಯಿಂದ ಅವರ ಕಸಿನ್‌ ಪರಿಣೀತಿ ಚೋಪ್ರಾ ಈ ರಿಸೆಪ್ಷನ್‌ನಲ್ಲಿ ಪಾಲ್ಗೊಳ್ಳಲಿದ್ದಾರೆ.