ಪ್ರಿಯಾಂಕಾ ಚೋಪ್ರಾ ಬ್ಲೌಸ್‌ಲೆಸ್‌ ಸೀರೆಗೆ ಟ್ರೋಲಿಂಗ್‌ ಸುರಿಮಳೆ

ಹಾಲಿವುಡ್‌ನಲ್ಲಿ ಬಿಝಿಯಾಗಿರುವ ಬಾಲಿವುಡ್‌ ನಟಿ ಪ್ರಿಯಾಂಕಾ ಚೋಪ್ರಾ ಇತ್ತೀಚೆಗೆ ಮಾಡಿಸಿಕೊಂಡ ಫೋಟೋಶೂಟೊಂದು ಸಿಕ್ಕಾಪಟ್ಟೆ ಟ್ರೋಲ್‌ ಆಗುತ್ತಿದೆ. ಈ ಫೋಟೋಗಳನ್ನು ಅವರು ಇನ್‌ಸ್ಟಾಗ್ರಾಮ್‌ನಲ್ಲಿ ಶೇರ್‌ ಮಾಡಿದ್ದು, ಅದರಲ್ಲಿ ಅವರು ಹೊಳೆಯುವ ಗೋಲ್ಡನ್‌ ಬಣ್ಣದ ಸೀರೆಯನ್ನು ಧರಿಸಿದ್ದಾರೆ. ಆದರೆ ಅದಕ್ಕೆ ಬ್ಲೌಸ್‌ ಧರಿಸಿಲ್ಲ. ಅಂತಾರಾಷ್ಟ್ರೀಯ ಮಟ್ಟದ ಸ್ಟೈಲ್‌ ಮ್ಯಾಗಜಿನ್‌ವೊಂದರ ಮುಖಪುಟಕ್ಕೆ ತಮ್ಮ ಸುಂದರವಾದ ತೆರೆದ ಬೆನ್ನು ತೋರಿಸಿ ಪೋಸ್‌ ನೀಡಿರುವ ಅವರ ವಿರುದ್ಧ ನೆಟ್ಟಿಗರು ಕಿಡಿ ಕಾರಿದ್ದಾರೆ.

ಬಾಲಿವುಡ್‌ ಸಿನಿಮಾಗಳಲ್ಲಿ ನಟಿಸಿ ದೇಸಿ ಗರ್ಲ್‌ ಇಮೇಜ್‌ ಪಡೆದುಕೊಂಡಿರುವ ಪ್ರಿಯಾಂಕಾ ನಿಜ ಜೀವನದಲ್ಲಿ ಇಂಥ ಫೋಟೋಶೂಟ್‌ ಮಾಡಿಸಿಕೊಂಡು ನಾಚಿಕೆಯಿಲ್ಲದವರಂತೆ ವರ್ತಿಸುತ್ತಿದ್ದಾರೆ ಎಂದು ಕೆಲವರು ಸೋಷಿಯಲ್‌ ಮೀಡಿಯಾದಲ್ಲಿ ಕಾಮೆಂಟ್‌ ಹಾಕಿದ್ದರೆ, ಇನ್ನು ಕೆಲವರು ಆಕೆ ಹಾಲಿವುಡ್‌ ನಟಿಯರಂತೆ ಆಗಲು ಹೋಗಿ ಹೇಗೇಗೊ ಡ್ರೆಸ್‌ ಮಾಡಿಕೊಳ್ಳುತ್ತಿದ್ದಾರೆ, ಭಾರತೀಯರ ಮಹಿಳೆಯರ ಮಾನ ಕಳೆಯುತ್ತಿದ್ದಾರೆ ಎಂದೆಲ್ಲಾ ಪ್ರತಿಕ್ರಿಯಿಸುತ್ತಿದ್ದಾರೆ.