ಲಂಡನ್‌ನಲ್ಲಿ ಪ್ರಿಯಾಂಕಾ ಚೋಪ್ರ ಮೇಣದ ಪ್ರತಿಮೆ ಅನಾವರಣ

ದೇಸಿ ಗರ್ಲ್‌ ಎಂದೇ ಖ್ಯಾತರಾಗಿರುವ ಪ್ರಿಯಾಂಕಾ ಚೋಪ್ರ ಅವರ ಮೇಣದ ಪ್ರತಿಮೆ ಲಂಡನ್‌ನ ಪ್ರತಿಷ್ಠಿತ ಮೇಡಮ್‌ ಟುಸ್ಸಾಡ್ಸ್‌ ಮ್ಯೂಸಿಯಂನಲ್ಲಿ ಅನಾವರಣಗೊಂಡಿದೆ. ಈ ಕುರಿತ ಫೋಟೋಗಳನ್ನು ಮತ್ತು ಸುದ್ದಿಯನ್ನು ಮ್ಯೂಸಿಯಂನ ತಂಡವು ಸೋಷಿಯಲ್‌ ಮೀಡಿಯಾದಲ್ಲಿ ಶೇರ್‌ ಮಾಡಿಕೊಂಡು, ಇಂಗ್ಲೆಂಡ್‌ಗೆ ವರ್ಲ್ಡ್‌ಕಪ್‌ ಜೊತೆಗೆ ಪ್ರಿಯಾಂಕಾ ಚೋಪ್ರ ಅವರ ಮೇಣದ ಪ್ರತಿಮೆಯನ್ನು ಮೇಡಮ್‌ ಟುಸ್ಸಾಡ್ಸ್‌ನಲ್ಲಿ ಅನಾವರಣಗೊಳಿಸುವ ಅವಕಾಶ ಸಿಕ್ಕಿದ್ದು ಖುಷಿ ತಂದಿದೆ ಎಂದು ಬರೆದುಕೊಂಡಿದೆ.

ಕಳೆದ ವರ್ಷ ನ್ಯೂಯಾರ್ಕ್‌ನಲ್ಲಿರುವ ಪ್ರಿಯಾಂಕಾ ಚೋಪ್ರ ಅವರ ಅಪಾರ್ಟ್‌ಮೆಂಟ್‌ಗೆ ಭೇಟಿ ನೀಡಿದ್ದ ಮೇಡಮ್‌ ಟುಸ್ಸಾಡ್ಸ್‌ ಟೀಮ್‌ ಮೇಣದ ಪ್ರತಿಮೆ ವಿನ್ಯಾಸಕ್ಕೆ ತಯಾರಿ ನಡೆಸಿತ್ತು. ಇದೀಗ ಆ ಪ್ರತಿಮೆಯನ್ನು ಅನಾವರಣಗೊಳಿಸಲಾಗಿದೆ. ಆದರೆ ಈ ಸಂದರ್ಭದಲ್ಲಿ ಪ್ರಿಯಾಂಕಾ ಉಪಸ್ಥಿತರಿರಲಿಲ್ಲ. 2017ರಲ್ಲಿ ನಡೆದ ಗೋಲ್ಡನ್‌ ಗ್ಲೋಬ್‌ ಸಮಾರಂಭದಲ್ಲಿ ಪಿಗ್ಗಿ ಕಾಣಿಸಿಕೊಂಡ ಐಕಾನಿಕ್‌ ಲುಕ್‌ನಲ್ಲಿ ಈ ಪ್ರತಿಮೆಯನ್ನು ನಿರ್ಮಿಸಲಾಗಿದೆ. ಇದನ್ನು ಮ್ಯೂಸಿಯಂನ ಪಾರ್ಟಿ ಹಾಲ್‌ನಲ್ಲಿ ಇರಿಸಲಾಗಿದೆ. ಈ ಪ್ರತಿಮೆ ಜೊತೆಗೆ ಹಾಲಿವುಡ್‌ನ ಎ ಲಿಸ್ಟರ್‌ ತಾರೆಯರ ಪ್ರತಿಮೆಗಳೂ ಇವೆ. ನ್ಯೂಯಾರ್ಕ್‌ನಲ್ಲಿರುವ ಮೇಡಮ್‌ ಟುಸ್ಸಾಡ್ಸ್‌ ಮ್ಯೂಸಿಯಂನಲ್ಲೂ ಪ್ರಿಯಾಂಕಾರ ಮೇಣದ ಪ್ರತಿಮೆ ಇದೆ.