ಒಂದೇ ವಾರದಲ್ಲಿ ಐವತ್ತೈದು ಕೋಟಿ ರೂ. ದಾಟಿದ ’ರಾಝಿ’

ಜಂಗ್ಲಿ ಪಿಕ್ಚರ್ಸ್ ಮತ್ತು ಧರ್ಮಾ ಪ್ರೊಡಕ್ಷನ್ಸ್ ನಿರ್ಮಾಣದ ಸ್ಪೈ ಥ್ರಿಲ್ಲರ್ ’ರಾಝಿ’ ಬಾಕ್ಸ್ ಆಫೀಸಲ್ಲಿ ಮುನ್ನುಗ್ಗುತ್ತಿದೆ. ಆಲಿಯಾ ಭಟ್ ಮತ್ತು ವಿಕ್ಕಿ ಕೌಶಾಲ್ ಅಭಿನಯದ ಈ ಚಿತ್ರಕ್ಕೆ ಮೇಘನಾ ಗುಲ್ಜಾರ್ ಆ್ಯಕ್ಷನ್ ಕಟ್ ಹೇಳಿದ್ದಾರೆ. ಗುರುವಾರ 5.35 ಕೋಟಿ ಗಳಿಸಿದ್ದು ಒಟ್ಟಾರೆ ಮೊದಲ ವಾರದ ಗಳಿಕೆ 56.59 ಕೋಟಿಗಳಷ್ಟಾಗಿದೆ.

ಆಲಿಯಾ ಭಟ್‌ ಮುಖ್ಯ ಪಾತ್ರದಲ್ಲಿ ನಟಿಸಿರುವ ರಾಝಿ ಚಿತ್ರ ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ಪಡೆದುಕೊಂಡಿದ್ದು, ಬಾಕ್ಸ್‌ ಆಫೀಸ್‌ನಲ್ಲಿ ಉತ್ತಮ ಗಳಿಕೆ ಮಾಡುತ್ತಿದೆ. 70 ರ ದಶಕದ ಬ್ಯಾಕ್‌ಡ್ರಾಪ್‌ನಲ್ಲಿ ಚಿತ್ರ ತಯಾರಾಗಿದೆ. ಇದೇ ಸಮಯದಲ್ಲಿ ಭಾರತ ಪಾಕಿಸ್ತಾನ ಯುದ್ಧ ಸಹ ನಡೆದಿತ್ತು, ಆ ಸಮಯದಲ್ಲಿ ಭಾರತೀಯ ಯುವತಿಯೊಬ್ಬಳು ಪಾಕಿಸ್ತಾನಕ್ಕೆ ಗೂಢಚಾರಿಯಾಗಿ ಹೋಗುವ ಕಥೆ ಸಿನಿಮಾದಲ್ಲಿ ಇದೆ.

'ಈ ಸಿನಿಮಾದಲ್ಲಿರುವ ದೇಶ ಭಕ್ತಿ, ಮತ್ತು ಈಗ ಪ್ರಸ್ತುತ ದೇಶದಲ್ಲಿರುವ ದೇಶಭಕ್ತಿಗೂ ಬಹಳಷ್ಟು ವ್ಯತ್ಯಾಸವಿದೆ. ಈ ಸಿನಿಮಾ ನೋಡುವ ಪ್ರತಿಯೊಬ್ಬರೂ ನಮ್ಮ ದೇಶದ ಬಗ್ಗೆ ಹೆಮ್ಮೆ ಪಟ್ಟುಕೊಳ್ಳುವಂತಹ ವಿಷಯ ಈ ಸಿನಿಮಾದಲ್ಲಿದೆ' ಅಂತಾರೆ ನಿರ್ದೇಶಕ ಮೇಘನಾ

ಇನ್ನು ಸಿನಿಮಾ ಹಿಟ್‌ ಆಗಲು ಕಾರಣವಾದ ಇಡೀ ತಂಡಕ್ಕೆ ಮೇಘನಾ ಧನ್ಯವಾದ ಹೇಳಿದ್ದಾರೆ. ರಾಝಿಯಲ್ಲಿ ಆಲಿಯಾ ಭಟ್‌ ಗೆ ವಿಕ್ಕಿ ಕೌಶಲ್‌ ಜೋಡಿಯಾಗಿದ್ದಾರೆ. ಜಂಗ್ಲಿ ಪಿಕ್ಚರ್ಸ್‌ ಮತ್ತು ಧರ್ಮ ಪ್ರೊಡಕ್ಷನ್‌ ಬ್ಯಾನರ್‌ನಡಿ ವಿನೀತ್‌ ಜೈನ್‌, ಕರಣ್‌ ಜೋಹರ್‌ ಇನ್ನಿತರರು ಸಿನಿಮಾವನ್ನು ನಿರ್ಮಾಣ ಮಾಡಿದ್ದಾರೆ.