ದೇಶಾದ್ಯಂತ ವೈರಲ್‌ ಆಯಿತು ರಾಝಿ ಟ್ರೇಲರ್‌

ವಿಶಿಷ್ಟ ಪಾತ್ರಗಳ ಮೂಲಕ ಬಾಲಿವುಡ್‌ನ ಬಿಗ್‌ಸ್ಟಾರ್‌ಗಳ ಮಧ್ಯೆ ತನ್ನದೇ ಆದ ಅಭಿಮಾನಿ ವರ್ಗವನ್ನು ಸೃಷ್ಟಿ ಮಾಡಿಕೊಂಡಿರುವ ಆಲಿಯಾ ಭಟ್‌, ರಾಝಿ ಸಿನಿಮಾದಲ್ಲಿ ಭಾರತೀಯ ಸೈನ್ಯದ ಗೂಢಾಚಾರಿ ಪಾತ್ರದಲ್ಲಿ ನಟಿಸಿದ್ದಾರೆ.

ಮೇಘನಾ ಗುಲ್ಜಾರ್‌ ನಿರ್ದೇಶನದ ಈ ಚಿತ್ರದಲ್ಲಿ ಆಲಿಯಾ, ಸೆಹಮತ್‌ ಪಾತ್ರದಲ್ಲಿ ನಿಬ್ಬೆರಗಾಗುವಂತಹ ನಟನೆ ಮಾಡಿದ್ದಾರೆ ಎಂಬುದು ಈಗ ಬಿಡುಗಡೆಯಾಗಿರುವ ಟ್ರೇಲರ್‌ನಿಂದ ತಿಳಿಯುತ್ತದೆ. ಈ ಹಿಂದೆ ಬಿಡುಗಡೆಯಾಗಿದ್ದ ಪ್ರೀ ಟ್ರೇಲರ್‌ನಲ್ಲಿ ಎರಡು ಪೋಸ್ಟರ್‌ ಮತ್ತು ಪಾತ್ರಗಳ ಪರಿಚಯವಷ್ಟೇ ಇತ್ತು. ಆದರೂ ಈ ಪ್ರೀ ಟ್ರೇಲರ್‌ ಸಿನಿಮಾ ಮೇಲೆ ಸಿಕ್ಕಾಪಟ್ಟೆ ನಿರೀಕ್ಷೆ ಮೂಡಿಸಿತ್ತು.

ಈ ಚಿತ್ರದಲ್ಲಿ ಭಾರತೀಯ ಯುವತಿಯೊಬ್ಬಳು, ತನ್ನ ತಂದೆಯ ಕಾರಣಕ್ಕೆ ಪಾಕಿಸ್ತಾನಿ ಸೈನ್ಯಾಧಿಕಾರಿಯೊಬ್ಬರನ್ನು ವಿವಾಹವಾಗುತ್ತಾಳೆ. ವಿಶೇಷ ಎಂದರೆ ಈಕೆ ಪಾಕಿಸ್ತಾನಿ ಸೈನ್ಯಾಧಿಕಾರಿಯನ್ನು ವಿವಾಹವಾದರೂ ಭಾರತದ ಪರವಾಗಿ ಕೆಲಸ ಮಾಡುವ ಗೂಢಾಚಾರಿ ಆಗಿರುತ್ತಾಳೆ. ಆಲಿಯಾ ಒಬ್ಬ ಮಗಳಾಗಿ, ಗಂಡನಿಗೆ ತಕ್ಕ ಹೆಂಡತಿಯಾಗಿ, ಗಟ್ಟಿ ಗುಂಡಿಗೆಯ ಗೂಢಾಚಾರಿಯಾಗಿ ನಟಿಸಿರುವುದ ಟ್ರೇಲರ್‌ನಲ್ಲಿ ಅನಾವರಣಗೊಂಡಿದೆ.

ಸಾಮಾನ್ಯವಾಗಿ ನಮ್ಮ ದೇಶದಲ್ಲಿ ಗೂಢಾಚಾರಿಗಳ ಬಗ್ಗೆ ಯಾರಿಗೂ ಗೊತ್ತಿರುವುದಿಲ್ಲ. ಅವರು ಮಾಡುವ ಕೆಲಸ ಬಹಳ ಕಠಿಣ ಮತ್ತು ಅಪಾಯಕಾರಿಯಾಗಿರುತ್ತದೆ. ಆದರೂ ಅವರ ಸಾಧನೆಗಳ ಬಗ್ಗೆ ಯಾವುದೇ ದಾಖಲೆಗಳಿರುವುದಿಲ್ಲ. ಅವರು ನಮ್ಮ ರಾಷ್ಟ್ರ ಧ್ವಜ ಹೆಮ್ಮೆಯಿಂದ ಹಾರಾಡುವಂತೆ ಮಾಡಿರುತ್ತಾರೆ. ನಮ್ಮ ಮನಸ್ಸಿನಲ್ಲಿ ಆಳವಾಗಿ ಬೇರೂರುವಂತಹ ಒಬ್ಬ ಮಹಿಳಾ ಗೂಢಾಚಾರಿ ಕಥೆಯನ್ನು ಈ ರಾಝಿ ಮೂಲಕ ತೆರೆಗೆ ತರುತ್ತಿದ್ದಾರೆ ಮೇಘನಾ ಗುಲ್ಜಾರ್‌.

ಈ ಚಿತ್ರವನ್ನು ವೀನಿತ್‌ ಜೈನ್‌, ಕರಣ್‌ ಜೋಹರ್‌, ಹಿರೋ ಜೋಹರ್‌ ಮತ್ತು ಅಪೂರ್ವ ಮೆಹ್ತಾ ಧರ್ಮ ಪ್ರೊಡಕ್ಷನ್‌ ಮತ್ತು ಜಂಗ್ಲಿ ಪಿಕ್ಚರ್ಸ್‌ ಬ್ಯಾನರ್‌ನಡಿ ನಿರ್ಮಾಣ ಮಾಡಿದ್ದಾರೆ. ಪ್ರೀತಿ ಸಹಾನಿ ಇದಕ್ಕೆ ಸಹ ನಿರ್ಮಾಪಕರಾಗಿದ್ದಾರೆ.