ನಟ ವಿಶಾಲ್ ಮನೆ ಮೇಲೆ ಜಿಎಸ್‍ಟಿ ದಾಳಿ

ನಟ ಹಾಗೂ ತಮಿಳುನಾಡು ಚಲನಚಿತ್ರ ನಿರ್ಮಾಪಕರ ಸಮಿತಿಯ ಅಧ್ಯಕ್ಷ ವಿಶಾಲ್ ಕಚೇರಿ ’ವಿಶಾಲ್ ಫಿಲಂ ಫ್ಯಾಕ್ಟರಿ’ ಮೇಲೆ ಜಿಎಸ್‍ಟಿ ಗುಪ್ತಚರ ಸಂಸ್ಥೆ ಸೋಮವಾರ (ಅ.23) ದಾಳಿ ನಡೆಸಿದೆ. ಇಂದು ಮಧ್ಯಾಹ್ನ ಚೆನ್ನೈನ ವಡಪಳನಿ ಪ್ರದೇಶದ ಕಚೇರಿ ಮೇಲೆ ದಾಳಿ ನಡೆದಿದೆ.

ಸರಕು ಮತ್ತು ಸೇವಾ ತೆರಿಗೆ ಸಲ್ಲಿಸದ ಆರೋಪದ ಹಿನ್ನೆಲೆಯಲ್ಲಿ ಈ ದಾಳಿ ನಡೆದಿದೆ. ಇದಕ್ಕೆ ಸಂಬಂಧಪಟ್ಟ ದಾಖಲೆಗಳನ್ನು ಐಟಿ ಅಧಿಕಾರಿಗಳಿಗೆ ವಿಶಾಲ್ ನೀಡಿದ್ದಾರೆ ಎಂದು ತಮಿಳು ಟಿವಿ ವಾಹಿನಿಗಳು ತಿಳಿಸಿವೆ. ಈ ದಾಳಿಗೂ ತಮಿಳುನಾಡಿನಲ್ಲಿ ವಿವಾದ ಎಬ್ಬಿಸಿರುವ ವಿಜಯ್ ಅಭಿನಯದ 'ಮೆರ್ಸಲ್' ಚಿತ್ರಕ್ಕೂ ಸಂಬಂಧ ಕಲ್ಪಿಸಲಾಗಿದೆ.

ಇತ್ತೀಚೆಗೆ ಬಿಡುಗಡೆಯಾದ 'ಮೆರ್ಸೆಲ್' ಚಿತ್ರದಲ್ಲಿ ಜಿಎಸ್‌ಟಿ ಹಾಗೂ ಡಿಜಿಟಲ್ ಇಂಡಿಯಾ ಬಗ್ಗೆ ಪ್ರಸ್ತಾಪವಿದ್ದು ಚಿತ್ರ ವಿವಾದಕ್ಕೆ ಗುರಿಯಾಗಿದೆ. ಈ ಚಿತ್ರಕ್ಕೆ ವಿಶಾಲ್ ಬೆಂಬಲ ವ್ಯಕ್ತಪಡಿಸಿದ್ದರು.

ವಿಜಯ್ ಮುಖ್ಯಭೂಮಿಕೆಯಲ್ಲಿರುವ ಚಿತ್ರದಲ್ಲಿ ಎಲ್ಲೂ ನೇರವಾಗಿ ರಾಜಕೀಯ ಪ್ರಸ್ತಾಪ ಇಲ್ಲದಿದ್ದರೂ ಜಿಎಸ್‌ಟಿ ಹಾಗೂ ಡಿಜಿಟಲ್ ಇಂಡಿಯಾ ಪ್ರಸ್ತಾಪ ಮಾಡಿರುವ ಬಗ್ಗೆ ಬಿಜೆಪಿ ಆಕ್ಷೇಪ ವ್ಯಕ್ತಪಡಿಸಿತ್ತು. ವಿವಾದಾತ್ಮಕ ಸಂದೇಶಕ್ಕೆ ಕತ್ತರಿ ಹಾಕಬೇಕೆಂದು ಆಗ್ರಹಿಸಿತ್ತು. ಒಂದು ವೇಳೆ ಆ ಸಂಭಾಷಣೆಗೆ ಕತ್ತರಿ ಹಾಕದಿದ್ದರೆ ಕಾನೂನು ಕ್ರಮ ಕೈಗೊಳ್ಳುವುದಾಗಿ ಬಿಜೆಪಿ ಎಚ್ಚರಿಕೆ ನೀಡಿತ್ತು.

ಈ ಸಿನಿಮಾದಲ್ಲಿ ಉತ್ತಮ ಸಾಮಾಜಿಕ ಸಂದೇಶ ಇದೆ. ಭಾರತದಂತಹ ಪ್ರಜಾಪ್ರಭುತ್ವ ದೇಶದಲ್ಲಿ ಅವರವರ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಲು ಪ್ರತಿಯೊಬ್ಬರಿಗೂ ಅಭಿವ್ಯಕ್ತಿ ಸ್ವಾತಂತ್ರ್ಯ ಇದೆ ಎಂದು ವಿಶಾಲ್ ಬೆಂಬಲ ಸೂಚಿಸಿದ್ದರು. ಈಗ ಅವರ ಕಚೇರಿ ಮೇಲೆ ದಾಳಿ ನಡೆದಿರುವುದು ಗಮನಾರ್ಹ. ಈ ನಿರ್ಮಾಣ ಸಂಸ್ಥೆಯಡಿ ವಿಶಾಲ್ ಆರು ಚಿತ್ರಗಳನ್ನು ನಿರ್ಮಿಸಿದ್ದಾರೆ. ಈ ಎಲ್ಲಾ ಚಿತ್ರಗಳಲ್ಲೂ ವಿಶಾಲ್ ಅವರೇ ಹೀರೋ ಎಂಬುದು ವಿಶೇಷ.

ತಮಿಳು ರಾಕರ್ಸ್ ಎಂಬ ವೆಬ್‍ಸೈಟ್ ಹೊಸದಾಗಿ ಬಿಡುಗಡೆಯಾದ ಚಿತ್ರಗಳನ್ನು ಆನ್‍ಲೈನ್‌ನಲ್ಲಿ ಬಿಡುಗಡೆ ಮಾಡುತ್ತಿದ್ದು, ಈ ವೆಬ್‌ಸೈಟಿನ ಅಡ್ಮಿನ್‍ಗಳ ಬಗ್ಗೆ ಸುಳಿವು ಕೊಟ್ಟವರಿಗೆ ಬಹುಮಾನ ನೀಡುವುದಾಗಿ ವಿಶಾಲ್ ಇತ್ತೀಚೆಗೆ ಘೋಷಿಸಿದ್ದರು. ’ಮೆರ್ಸಲ್’ ಚಿತ್ರದ ಕೆಲವು ಸನ್ನಿವೇಶಗಳು ಆನ್‍ಲೈನ್‌ನಲ್ಲಿ ಬಿಡುಗಡೆಯಾಗಿದ್ದವು. ಆ ಚಿತ್ರದ ತುಣುಕುಗಳನ್ನು ಆನ್‍ಲೈನ್‌ನಲ್ಲಿ ವೀಕ್ಷಿಸಿದ್ದಾಗಿ ತಮಿಳುನಾಡು ಬಿಜೆಪಿ ಮುಖಂಡ ಎಚ್ ರಾಜಾ ಹೇಳಿದ್ದರು. ಇದನ್ನೂ ವಿಶಾಲ್ ಖಂಡಿಸಿದ್ದರು.

ಹಲವಾರು ಹಾಲಿವುಡ್ ಚಿತ್ರಗಳಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ವಿರುದ್ಧ ವಿಡಂಬನಾತ್ಮಕ ದೃಶ್ಯಗಳಿರುತ್ತವೆ. ಆದರೆ ಅಮೆರಿಕದಲ್ಲಿ ಮಾತ್ರ ಯಾವುದೇ ವಿವಾದ ಉಂಟಾಗಲ್ಲ. ಇಲ್ಲಿ ಆ ರೀತಿಯ ಸನ್ನಿವೇಶಗಳಿದ್ದರೆ ಅದನ್ನು ಡಿಲೀಟ್ ಮಾಡಲು ಒತ್ತಡ ಹೇರುತ್ತಾರೆ. ಇದೂ ಒಂದು ರೀತಿ ಬೆದರಿಕೆ ಇದ್ದಂತೆ ಎಂದಿದ್ದಾರೆ ವಿಶಾಲ್.

ಕೃಪೆ: ತಮಿಳು ಸಮಯಂ

Raid at actor vishal Vadapalani office by GST Intelligence Agency

A team of the GST Intelligence Agency conducted raids at the office of Vishal Film Factory, the production house owned by actor and President of Tamil Nadu Film Producers Council Vishal.