ರಜನಿಕಾಂತ್ '2.0' ಹಾಡುಗಳ ಹಂಗಾಮ ಶುರು

ತಮಿಳು ಸೂಪರ್ ಸ್ಟಾರ್ ರಜನಿಕಾಂತ್ ಮುಖ್ಯಭೂಮಿಕೆಯಲ್ಲಿರುವ ಸುಮಾರು ರೂ.450 ಕೋಟಿ ಬಜೆಟ್‍ನ 2.0 ಚಿತ್ರದ ಹಾಡುಗಳು ಮಾರುಕಟ್ಟೆಗೆ ದಾಂಗುಡಿ ಇಟ್ಟಿವೆ. ಶಂಕರ್ ನಿರ್ದೇಶನದ ಈ ಚಿತ್ರದ ನಾಯಕಿ ಎಮಿ ಜಾಕ್ಸನ್.

ಲೈಕಾ ಪ್ರೊಡಕ್ಷನ್ಸ್ ನಿರ್ಮಿಸಿರುವ ಈ ಚಿತ್ರಕ್ಕೆ ಎ ಆರ್ ರೆಹಮಾನ್ ಸಂಗೀತ ಸಂಯೋಜಿಸಿದ್ದಾರೆ. ಶುಕ್ರವಾರ ರಾತ್ರಿ ದುಬೈನ ಬುರ್ಜ್ ಅಲ್ ಅರಬ್‍ನಲ್ಲಿ ನಡೆದ ಭರ್ಜರಿ ಕಾರ್ಯಕ್ರಮದಲ್ಲಿ ಹಾಡುಗಳನ್ನು ಬಿಡುಗಡೆ ಮಾಡಲಾಯಿತು.

ಭಾರಿ ಹಂಗಾಮದ ನಡುವೆ ನಡೆದ ಈ ಕಾರ್ಯಕ್ರಮದಲ್ಲಿ ರೆಹಮಾನ್ ಸಂಗೀತ ಕಚೇರಿ, ನೃತ್ಯ ಪ್ರದರ್ಶನ ಪ್ರಮುಖ ಆಕರ್ಷಣೆಯಾಗಿತ್ತು. 2.0 ಹಾಡುಗಳ ಬಿಡುಗಡೆ ಸಂದರ್ಭದಲ್ಲಿ ದುಬೈ ನಗರದಲ್ಲಿ ಎತ್ತ ನೋಡಿದರೂ ಆ ಸಿನಿಮಾ ಪೋಸ್ಟರ್‌ಗಳೇ ದರ್ಶನ ನೀಡುತ್ತಿದ್ದವು.

ಸ್ಕೈ ಡೈವ್ ಮಾಡುತ್ತಾ ಪೋಸ್ಟರನ್ನು ಪ್ರದರ್ಶಿಸಿದ್ದು ಎಲ್ಲರನ್ನೂ ಆಕರ್ಷಿಸಿತು. ಟಾಲಿವುಡ್ ನಟ ರಾಣಾ, ಬಾಲಿವುಡ್ ನಟರಾದ ಕರಣ್ ಜೋಹರ್, ತಮಿಳು ನಟ ಆರ್ ಜೆ ಬಾಲಾಜಿ ಕಾರ್ಯಕ್ರಮವನ್ನು ನಡೆಸಿಕೊಟ್ಟರು. ರಜನಿಕಾಂತ್ ಕುಟುಂಬ ಸದಸ್ಯರ ಜತೆಗೆ ಸೂರ್ಯ, ಜ್ಯೋತಿಕಾ, ಕಾರ್ತಿ ಮುಂತಾದವರು ಪಾಲ್ಗೊಂಡಿದ್ದರು.

ಅಂದಹಾಗೆ ಇದು ರೋಬೋ ಸಿನಿಮಾದ ಮುಂದುವರಿದ ಭಾಗವಲ್ಲ. ಇದು ಸಂಪೂರ್ಣ ಭಿನ್ನವಾದ ಕಥೆ ಎಂದಿದ್ದಾರೆ ಚಿತ್ರದ ನಿರ್ದೇಶಕ ಶಂಕರ್. ಇನ್ನು ಈ ಚಿತ್ರದಲ್ಲಿ ಇರುವುದು ಕೇವಲ 3 ಹಾಡುಗಳು ಮಾತ್ರ ಎಂದು ಹೇಳಿದ್ದಾರೆ ರೆಹಮಾನ್.