ದೀಪ್‌ವೀರ್ ಮದುವೆ ಬಗ್ಗೆ ರಾಖಿ ಸಾವಂತ್ ಫನ್ನಿ ಕಾಮೆಂಟ್

ಸದಾ ಒಂದಿಲ್ಲೊಂದು ವಿವಾದದ ಮೂಲಕ ಸುದ್ದಿಯಲ್ಲಿರುವ ಐಟಮ್ ಬಾಂಬ್ ರಾಖಿ ಸಾವಂತ್ ಇದೀಗ ರಣವೀರ್ ಮತ್ತು ದೀಪಿಕಾ ಪಡುಕೋಣೆ ಮದುವೆ ಬಗ್ಗೆ ಹೊಸ ರಾಗ ಎಳೆದಿದ್ದಾರೆ. ಇವರಿಬ್ಬರಿಗೂ ನಿಜವಾಗಿಯೂ ಮದುವೆಯಾಗಿದೆಯೇ ಎಂದು ಅಚ್ಚರಿ ವ್ಯಕ್ತಪಡಿಸಿದ್ದಾರೆ.

ಇವರಿಬ್ಬರಿಗೆ ಮದುವೆ ಆಗಿದೆ ಎಂದರೆ ನಂಬಲಿಕ್ಕೇ ಆಗುತ್ತಿಲ್ಲ. ಬಹುಶಃ ಅದು ಮದುವೆ ಅಲ್ಲದಿರಬಹುದು. ಫೋಟೋಶೂಟ್ ಆಗಿರಬಹುದು ಎಂದು ದೀಪ್‌ವೀರ್ ಮದುವೆ ಬಗ್ಗೆ ಕಾಮೆಂಟ್ ಮಾಡಿದ್ದಾರೆ. ಈ ಬಗ್ಗೆ ರಣವೀರ್ ಸ್ಪಷ್ಟೀಕರಣ ನೀಡಬೇಕೆಂದು ತನ್ನ ಇನ್‌ಸ್ಟಾಗ್ರಾಮ್‌ನಲ್ಲಿ ತಮಾಷೆಯ ವೀಡಿಯೋವನ್ನು ಪೋಸ್ಟ್ ಮಾಡಿದ್ದಾರೆ.

ಇತ್ತೀಚೆಗೆ ಮಹಿಳಾ ಕುಸ್ತಿಪಟು ಜೊತೆ ಸೆಣೆಸಲು ಹೋಗಿ ಸೊಂಟ ಮುರಿದುಕೊಂಡು ಆಸ್ಪತ್ರೆ ಪಾಲಾಗಿದ್ದರು ರಾಖಿ. ಬಾಲಿವುಡ್ ನಟಿ ತನುಶ್ರೀ ದತ್ತಾ ತನ್ನ ಮೇಲೆ ಕುಸ್ತಿಪಟುಗಳಿಂದ ಹಲ್ಲೆ ನಡೆಸಿದ್ದಾರೆ ಎಂದು ಆರೋಪಿಸಿದ್ದರು. ಇದೀಗ ದೀಪ್‌ವೀರ್ ಮದುವೆ ಬಗ್ಗೆಯೂ ರಾಖಿ ಸಾವಂತ್ ಹೊಸ ವರಸೆ ತೆಗೆದೆದಿದ್ದಾರೆ.


"ರಣವೀರ್ ನಿಜವಾಗಿಯೂ ನಿನಗೆ ಮದುವೆಯಾಗಿದೆಯೇ? ಅಥವಾ ಸವ್ಯಸಾಚಿ ಕ್ಯಾಟ್‌ಲಾಗ್ ಅಲ್ಲ ತಾನೆ ಇದು? ಎಂದಾದರೂ ಒಂದು ದಿನ ನನಗೆ ಮದುವೆಯಾಗಿಲ್ಲ ಎಂದು ಹೇಳಿ ಶಾಕ್ ಕೊಡ್ತೀಯಾ? ಇದು ತಮಾಷೆಗೆ ತೆಗೆದ ಫೋಟೋಶೂಟ್ ತಾನೆ? ಏನೇ ಆಗಲಿ ನಿಮ್ಮಿಬ್ಬರದ್ದೂ ತುಂಬಾ ಒಳ್ಳೆಯ ಜೋಡಿ" ಎಂದು ಇನ್‍ಸ್ಟಾಗ್ರಾಮ್‌ನಲ್ಲಿ ಫನ್ನಿ ವೀಡಿಯೋ ಪೋಸ್ಟ್ ಮಾಡಿದ್ದಾರೆ.

ಈ ಬಗ್ಗೆ ರಾಖಿ ಅಭಿಮಾನಿಗಳು ಸಹ ಅಷ್ಟೇ ತಮಾಷೆಯಾಗಿ ಪ್ರತಿಕ್ರಿಯಿಸುತ್ತಿದ್ದಾರೆ. "ನಿನಗೆ ಮದುವೆಯಾದರೆ ನಾವು ಸಹ ಇದೇ ರೀತಿ ಪ್ರತಿಕ್ರಿಯಿಸುತ್ತೇವೆ. ರಾಖಿ ನೀನು ನಿಜವಾಗಿಯೂ ಮದುವೆಯಾಗಿದ್ದೀಯಾ? ಇಲ್ಲಾ ತಮಾಷೆ ಮಾಡುತ್ತಿದ್ದೀಯಾ? ಎಂದು ಕೇಳುತ್ತೇವೆ" ಎಂದು ಕಾಮೆಂಟ್‌ಗಳು ಬರುತ್ತಿವೆ.