ನವೆಂಬರ್‌ನಲ್ಲಿ ’ದೀಪ್‍ವೀರ್’ ಜೋಡಿಗೆ ಗಟ್ಟಿಮೇಳ?

ಬಾಲಿವುಡ್ ತಾರಾ ಜೋಡಿ ದೀಪಿಕಾ ಪಡುಕೋಣೆ ಮತ್ತು ರಣವೀರ್ ಸಿಂಗ್ ತಮ್ಮ ಮದುವೆ ಮತ್ತು ಸಂಬಂಧದ ಬಗ್ಗೆ ಇದುವರೆಗೆ ಎಲ್ಲೂ ಬಾಯ್ಬಿಟ್ಟಿಲ್ಲ. ಆದರೆ ಇವರಿಬ್ಬರ ಮದುವೆ ಬಗ್ಗೆ ಮಾತ್ರ ಬಾಲಿವುಡ್ ವಲಯದಲ್ಲಿ ಸಾಕಷ್ಟು ಚರ್ಚೆ ನಡೆಯುತ್ತಿದೆ.

ತಮ್ಮಿಬ್ಬರ ಮದುವೆ ಬಗ್ಗೆ ಅಧಿಕೃತವಾಗಿ ಇನ್ನೂ ಪ್ರಕಟಿಸದಿದ್ದರೂ ಇವರೀರ್ವರ ಕುಟುಂಬಿಕರು ಭೇಟಿಯಾಗಿದ್ದು ಸಾಕಷ್ಟು ವದಂತಿಗಳಿಗೆ ಕಾರಣವಾಗಿದೆ. ಇನ್ನೇನು ಮದುವೆ ನಡೆದೇ ಹೋಯಿತು ಎಂಬಷ್ಟು ಸುದ್ದಿ ಹರಿದಾಡಿತು. ಇದೀಗ ಎರಡೂ ಕುಟುಂಬಿಕರ ನಡುವೆ ಮಾತುಕತೆಯಾಗಿದ್ದು ನವೆಂಬರ್‌ನಲ್ಲಿ ದೀಪ್‌ವೀರ್ ಮದುವೆ ಎನ್ನಲಾಗಿದೆ.
’ನವೆಂಬರ್‌ನಲ್ಲಿ ಯಾರೂ ರಜೆ ಹಾಕುವಂತಿಲ್ಲ’ ಎಂದು ಮೇಕಪ್ ಆರ್ಟಿಸ್ಟ್‌ನಿಂದ ಹಿಡಿದು ಮ್ಯಾನೇಜರ್ ತನಕ ಫರ್ಮಾನು ಹೊರಡಿಸಿದ್ದಾರಂತೆ ದೀಪಿಕಾ. ಹಾಗಾಗಿ ನವೆಂಬರ್‌ನಲ್ಲೇ ದೀಪ್‌ವೀರ್ ಮದುವೆ ಎಂಬ ಸುದ್ದಿ ಇದೆ. ವಿರಾಟ್ ಕೋಹ್ಲಿ ಮತ್ತು ಅನುಷ್ಕಾ ಶರ್ಮಾರಂತೆ ಇವರೂ ಡೆಸ್ಟಿನೇಷನ್ ಮದುವೆಗೆ ಆದ್ಯತೆ ನೀಡಲಿದ್ದಾರ.

ತಮ್ಮ ಮದುವೆಯನ್ನು ಸಾಧ್ಯವಾದಷ್ಟು ಸಿಂಪಲ್ ಆಗಿ, ಖಾಸಗಿಯಾಗಿ ಮಾಡಿಕೊಳ್ಳಲು ಈ ಜೋಡಿ ನಿರ್ಧರಿಸಿದೆ. ಮಾಧ್ಯಮಗಳ ಪ್ರಚಾರದಿಂದ ಆದಷ್ಟು ದೂರ ಉಳಿಯಲು ನಿರ್ಧರಿಸಿದ್ದಾರೆ. ಮದುವೆ ಬಳಿಕ ಭಾರತದಲ್ಲಿ ಎರಡು ಆರತಕ್ಷತೆ ಕಾರ್ಯಕ್ರಮಗಳನ್ನು ಹಮ್ಮಿಕೊಂಡಿದ್ದಾರೆ. ಒಂದು ಮುಂಬೈನಲ್ಲಿ ನಡೆಯಲಿದೆ.