ಕಂಗನಾಗೆ ರೇಷ್ಮೆ ಸೀರೆ ನೀಡಿದ ರೇಖಾ

ಅತ್ಯುತ್ತಮ ನಟನೆ, ಸೌಂದರ್ಯ ಮಾತ್ರವಲ್ಲದೆ, ಭರ್ಜರಿ ರೇಷ್ಮೆ ಸೀರೆ ಲುಕ್‌ಗೂ ಹೆಸರಾಗಿರುವ ಹಿರಿಯ ನಟಿ ರೇಖಾ ಇತ್ತೀಚೆಗೆ ಕಂಗನಾ ರನಾವತ್‌ ಅವರಿಗೆ ಸುಂದರವಾದ ರೇಷ್ಮೆ ಸೀರೆಯೊಂದನ್ನು ಉಡುಗೊರೆ ನೀಡಿ ಗಮನ ಸೆಳೆದಿದ್ದಾರೆ. ಗೋಲ್ಡ್‌ ಮತ್ತು ಕಪ್ಪು ಬಣ್ಣದ ಈ ರೇಷ್ಮೆ ಸೀರೆಯನ್ನು ಕಂಗನಾ ಇತ್ತೀಚೆಗೆ ಸಮಾರಂಭವೊಂದಕ್ಕೆ ಧರಿಸಿದ್ದರು.

ರೇಖಾ ಕೂಡ ಪಾಲ್ಗೊಂಡಿದ್ದ ಈ ಕಾರ್ಯಕ್ರಮದಲ್ಲಿ ಕಂಗನಾರ ಮಿಂಚುವ ರೇಷ್ಮೆ ಸೀರೆಯೇ ಇಡೀ ಸಮಾರಂಭದ ಕೇಂದ್ರಬಿಂದುವಾಗಿತ್ತಂತೆ. ತಮ್ಮ ಗುಂಗುರು ಕೂದಲನ್ನು ಬನ್‌ ಸ್ಟೈಲ್‌ ಮಾಡಿಕೊಂಡು ಮಲ್ಲಿಗೆ ದಂಡೆ ಮುಡಿದಿದ್ದ ಅವರು, ಸೀರೆಗೆ ಒಪ್ಪುವಂತಹ ಹರಳಿನ ನೆಕ್ಲೇಸ್‌ ಧರಿಸಿದ್ದರು. ಸಮಾರಂಭದಲ್ಲಿ ಅಕ್ಕಪಕ್ಕವೇ ಕುಳಿತಿದ್ದ ಕಂಗನಾ ಮತ್ತು ರೇಖಾ ಸುಂದರ ದೇವತೆಗಳಂತೆ ಕಂಗೊಳಿಸುತ್ತಿದ್ದರು ಎಂದು ಹೇಳಲಾಗುತ್ತಿದೆ. ಈ ಸಂದರ್ಭದಲ್ಲಿ ಮಾತನಾಡಿದ ರೇಖಾ, ನನಗೆ ಕಂಗನಾಳಂಥ ಮಗಳಿರಬೇಕಿತ್ತು ಎಂದು ಎಂದಿದ್ದಾರೆ. ರೇಷ್ಮೆ ಸೀರೆ ಪ್ರಿಯರಾದ ರೇಖಾ, ಈ ಮೊದಲು ದೀಪಿಕಾ ಪಡುಕೋಣೆಯವರಿಗೂ ರೇಷ್ಮೆ ಸೀರೆ ಉಡುಗೊರೆ ನೀಡಿದ್ದರು.