* ಶುಭಾ ವಿಕಾಸ್‌
ಬಾಲಿವುಡ್‌ನ ಸ್ಟೈಲಿಶ್‌ ನಟಿ ಸೋನಂ ಕಪೂರ್‌ ಹೆಜ್ಜೆ ಇಟ್ಟಲೆಲ್ಲ ಹೊಸ ಫ್ಯಾಷನ್‌ ಹವಾ ಸೃಷ್ಟಿಸುತ್ತಾರೆ. ಅದರಲ್ಲೂ ಸೋನಂಗೂ ಸೀರೆಗೆ ಅಂಥದ್ದೇನು ನಂಟು ಇದೆಯೋ ಗೊತ್ತಿಲ್ಲ. ಇತ್ತೀಚೆಗೆ ಕೇನ್‌ ಫಿಲ್ಮ್‌ ಫೆಸ್ಟಿವಲ್‌ನಲ್ಲಿ ಸೋನಂ ಧರಿಸಿದ್ದ ನದಿ ಹರಿಯುವಂಥ ಭಾವ ಮೂಡಿಸಿದ್ದ ಸೀರೆ ಇದೀಗ ವೈರಲ್‌ ಆಗಿದೆ.
ಆಕಾಶ ಹಾಗೂ ಸಾಗರ ಒಂದುಗೂಡಿಸುವಂತೆ ಕಂಡಿದ್ದ ಸೋನಂ ಕಪೂರ್‌ ಅವರ ಮೆಟಾಲಿಕ್‌ ಬ್ಲೂ ಪಲ್ಲು ಒಳಗೊಂಡಿರುವ ಸೀರೆ ಪೈನ್‌ಸ್ಟಾಕಿಂಗ್ಲೀ ಸ್ವಾನ್‌ ಹೆಸರಿನಲ್ಲಿ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಫೇಮಸ್‌ ಆಗಿತ್ತು. ಕೇನ್‌ ಮುಗಿದು ಅನೇಕ ದಿನಗಳೇ ಕಳೆದರೂ ಈ ಸೀರೆ ಬಗ್ಗೆ ನೀರೆಯರ ಮಾತು ನಿಂತಿಲ್ಲ. ಸಾಮಾಜಿಕ ತಾಣಗಳಲ್ಲಿ ಇಂತಹದ್ದೊಂದು ಸೀರೆ ಸುತ್ತ ಚರ್ಚೆ ನಡೆದಿದೆ.
ನದಿಯಂಥ ನೀಲವರ್ಣದ ಸೀರೆಗೆ ಮರುಳಾದ ತರುಣಿಯರು ಇದೀಗ ಅವರ ಸೀರೆ ಹಿಂದೆಬಿದ್ದಿದ್ದಾರೆ. ಯೂಟ್ಯೂಬ್‌, ಇನ್‌ಸ್ಟಗ್ರಾಂ, ಪಿಂಟರೆಸ್ಟ್‌ನಲ್ಲಿ ಸೋನಂ ಸೀರೆ ಗಮನ ಸೆಳೆಯುತ್ತಿದೆ. ಇದೊಂದು ಇಂಡೋ ವೆಸ್ಟರ್ನ್‌ ಫ್ಯೂಷನ್‌ ಎಂದೆನಿಸಿದ್ದು, ಅಮೆರಿಕ, ಇಂಗ್ಲೆಂಡ್‌ನಲ್ಲೆಲ್ಲ ಇದಕ್ಕೆ ಅಪಾರ ಬೇಡಿಕೆ ಸೃಷ್ಟಿಯಾಗಿದೆಯಂತೆ. ಮೊದಲು ಈ ಸೀರೆ ಅಮೆಜಾನ್‌ ಇಂಡಿಯಾ ಫ್ಯಾಷನ್‌ನಲ್ಲಿ ಪ್ರದರ್ಶನಗೊಂಡಿತು. ಅಂದಹಾಗೆ ಈ ಸೀರೆಯನ್ನು ವಿನ್ಯಾಸ ಮಾಡಿದ್ದು ರಿಮ್‌ಜಿಮ್‌ ಡಾಡು. ಸೀರೆಯ ಪಲ್ಲುವಿನಲ್ಲಿ ಇಲ್ಯೂಷನ್‌ ಕ್ರಿಯೇಟ್‌ ಮಾಡಿದ್ದೇ ಇಷ್ಟೆಲ್ಲ ಪ್ರಚಾರಕ್ಕೆ ಕಾರಣವಿರಬಹುದು. ಕಡು ನೀಲಿ ಹಾಗೂ ಕಪ್ಪು ಬಣ್ಣದ ಆಯಿಲ್‌ ಪೇಂಟಿಂಗ್‌, ಲೋಹದ ತಂತಿಗಳನ್ನು ಕೂಡ ಇಲ್ಲಿ ಬಳಸಲಾಗಿದೆ. ಆದ್ರೆ ಈ ಸೀರೆ ಮಾರುಕಟ್ಟೆಯಲ್ಲಂತೂ ಇಲ್ಲ. ನಿಗದಿತ ಸಂದರ್ಭಕ್ಕೆ ಸೀಮಿತವಾದ ಈ ಸೀರೆಯ ಉದ್ದಕ್ಕೂ ಕ್ರಿಯಾಶೀಲತೆ ಇದೆ.
ಸೀರೆ ಅದೇ, ವಿಧಾನ ಬದಲು:
ಸೋನಂ ಸೀರೆ ಉಡುವುದೇನೂ ಹೊಸತಲ್ಲ. ಆದರೆ ಸೀರೆಯನ್ನು ಹೇಗೆಲ್ಲ ಉಡಬಹುದು ಎಂಬುದನ್ನು ಈ ಸುಂದರಿಯನ್ನೇ ನೋಡಿ ಕಲಿಯಬೇಕು. ಇಂಡೋ ವೆಸ್ಟರ್ನ್‌ ಫ್ಯೂಷನ್‌ ಮಾಡುವ ಅವರು ಈ ಹಿಂದೆಯೂ ಸೀರೆಯನ್ನು ವಿಭಿನ್ನವಾಗಿ ಉಡಬಹುದು ಎಂಬುದನ್ನು ಅಂತಾರಾಷ್ಟ್ರೀಯ ವೇದಿಕೆಯಲ್ಲಿ ಗಮನ ಸೆಳೆದಿದ್ದರು. 2014ರ ಕೇನ್‌ ಫೆಸ್ಟಿವಲ್‌ನಲ್ಲಿ ಧೋತಿ ಡ್ರೇಪ್‌ ಸೀರೆ ಧರಿಸಿದ್ದರು. ಡಬ್ಬಲ್‌ ಪಲ್ಲು ಸೀರೆ, ಜಾಕೆಟ್‌ ಸೀರೆ ಅಂತೆಲ್ಲ ಭಾರತೀಯ ಸ್ಟೈಲ್‌ ಇಟ್ಟುಕೊಂಡು ವಿದೇಶಿ ಶೈಲಿಗೂ ಇಷ್ಟವಾಗುವಂತೆ ಸೀರೆಯ ಮೇಲೆ ಮೋಹ ಬೆಳೆಸಿದವರು ಸೋನಂ.
ಅನ್ವೇಷಣೆ:
ಸೀರೆಯ ಸುತ್ತ ಒಂದಿಷ್ಟು ಹೊಸ ಹೊಸ ಅನ್ವೇಷಣೆಗಳಾಗುತ್ತಿವೆ. ಡೆನಿಮ್‌ ಸಾರಿ, ಬೆಲ್ಟೆಡ್‌ ಸಾರಿ, ಸಾರಿ ವಿಥ್‌ ಪ್ಯಾಂಟ್‌, ಡಬ್ಬಲ್‌ ಪಲ್ಲು ಮತ್ತಿತರ ಶೈಲಿಯಲ್ಲಿ ಸೀರೆಗಳು ಹೆಚ್ಚು ಫೇಮಸ್‌ ಆಗಿವೆ.
ಸೀರೆಯ ಮೇಲೆ ಕಮಾರ್‌ ಬಂದ್‌ ಧರಿಸುವುದು ಇದೀಗ ಔಟ್‌ ಆಫ್‌ ಫ್ಯಾಷನ್‌. ಸೀರೆಯ ಮೇಲೆ ಬೆಲ್ಟ್‌ ಧರಿಸಿ ಶ್ರುತಿ ಹಾಸನ್‌, ಜೆನಿಲಿಯಾ ಡಿಸೋಜಾ, ಶಿಲ್ಪಾ ಶೆಟ್ಟಿ ಮತ್ತಿತರರು ಗಮನ ಸೆಳೆದಿದ್ದರು. ಪ್ಯಾಂಟ್‌ ಮೇಲೊಂದು ಸೀರೆ ಸುತ್ತಿಕೊಂಡು ಅದೇ ಸ್ಟೈಲ್‌ ಎಂದವರು ಹಲವರು. ಧೋತಿ ಸೀರೆಯನ್ನು ಕೂಡ ಫೇಮಸ್‌ ಮಾಡಿದ್ದು ಇದೇ ಸೋನಂ ಕಪೂರ್‌. ಪೆಟಿಕೋಟ್‌ ಬದಲು ಪ್ಯಾಂಟ್‌ ಬಳಸಿ ಸೀರೆ ಉಡುವುದು ಹೊಸತಲ್ಲ. ಆದರೆ ಇಲ್ಲಿ ಅರ್ಧ ಸೀರೆ ಇನ್ನರ್ಧ ಪ್ಯಾಂಟ್‌ ಧರಿಸಿದಂತೆ ತೋರುವ ಇದಕ್ಕೆ ಇಂಡೋ ವೆಸ್ಟರ್ನ್‌ ಟ್ವಿಸ್ಟ್‌ ಸಿಕ್ಕಿದೆ. ಪೆಪ್ಲಮ್‌ ಸೀರೆ ಡ್ರಾಮೆಟಿಕ್‌ ಟಚ್‌ ನೀಡುತ್ತದೆ. ಮಂದಿರಾ ಬೇಡಿ ಸರೋಂಗ್‌ ಸೀರೆ ಮೂಲಕ ಗಮನ ಸೆಳೆದಿದ್ದರು. ಒಟ್ಟಿನಲ್ಲಿ ಸೀರೆ ಉಡುವ ವಿಧಾನ ಬದಲಾಗಿರಬಹುದು. ಆದ್ರೆ ಸೀರೆಯ ಖದರ್‌ ಬದಲಾಗಿಲ್ಲ.
-----
ಇಂಡೋ ವೆಸ್ಟರ್ನ್‌ ಫ್ಯೂಷನ್‌ ಇತ್ತೀಚೆಗೆ ಹೆಚ್ಚುತ್ತಿದೆ. ಅದನ್ನು ಕ್ರಿಯಾಶೀಲವಾಗಿ ನೋಡಬಹುದು. ಆದರೆ ಅದಕ್ಕೊಂದು ಮಾರುಕಟ್ಟೆ ಸೃಷ್ಟಿಸುವುದು ಸುಲಭವಲ್ಲ. ಅಂತಹ ಸೀರೆಗಳ ಮೂಲಕ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಗಮನ ಸೆಳೆಯಬಹುದು. ಸ್ಥಳೀಯವಾಗಿ ಮಾರುಕಟ್ಟೆ ಸೃಷ್ಟಿಸುವುದು ಕಷ್ಟವಾದರೂ ಇಂತಹ ಪ್ರಯೋಗಳು ಹೆಚ್ಚೆಚ್ಚು ನಡೆಯಬೇಕು.
- ಕೌಶಲ್‌, ವಸ್ತ್ರ ವಿನ್ಯಾಸಕ