​ಪ್ರಭಾಸ್‌ ಕೈಹಿಡಿಯುವ ಆ ಲಕ್ಕಿ ಗರ್ಲ್‌ ಯಾರು?

ಕಟ್ಟಪ್ಪ ಬಾಹುಬಲಿಯನ್ನೇಕೆ ಕೊಂದ ಎಂಬ ಪ್ರಶ್ನೆಗೆ 'ಬಾಹುಬಲಿ 2' ಚಿತ್ರದಿಂದ ಉತ್ತರ ಸಿಕ್ಕಿದೆ. ಆದರೆ ಈಗ ಟಾಲಿವುಡ್‌ ರೆಬೆಲ್‌ ಸ್ಟಾರ್‌ ಪ್ರಭಾಸ್‌ ಮದುವೆ ಯಾವಾಗ ಮತ್ತು ಯಾರ ಜತೆ ಎಂಬ ಪ್ರಶ್ನೆ ಬಹುತೇಕರನ್ನು ಕಾಡುತ್ತಿದೆ. ಇದೀಗ ಈ ಪ್ರಶ್ನೆಗೂ ಉತ್ತರ ಸಿಗುವ ಕಾಲ ಸನಿಹವಾಗಿದೆ.

ಹೌದು, 'ಬಾಹುಬಲಿ' ಸ್ಟಾರ್‌ ಮದುವೆಗೆ ಹಸಿರು ನಿಶಾನೆ ತೋರಿಸಿದ್ದಾರಂತೆ. ಮನೆಯವರು ನೋಡಿದ ಹುಡುಗಿಯ ಜತೆ ದಾಂಪತ್ಯ ಜೀವನಕ್ಕೆ ಕಾಲಿಡಲು ರೆಡಿಯಾಗಿದ್ದಾರಂತೆ ಪ್ರಭಾಸ್‌.

ಕೆಲ ಮೂಲಗಳ ಪ್ರಕಾರ ರಾಶಿ ಸಿಮೆಂಟ್ಸ್‌ ಮಾಲೀಕ ಭೂಪತಿ ರಾಜ ಅವರ ಮೊಮ್ಮಗಳ ಜತೆ ಪ್ರಭಾಸ್‌ ಸಪ್ತಪದಿ ತುಳಿಯಲಿದ್ದಾರಂತೆ. ಆದರೆ ಈ ಬಗ್ಗೆ ಫ್ರಭಾಸ್‌ ಆಗಲಿ ಅವರ ಮನೆಯವರಾಗಲಿ ಅಧಿಕೃತ ಹೇಳಿಕೆ ನೀಡಿಲ್ಲ. ಈ ಹಿಂದೆ ಟಾಲಿವುಡ್‌ ಅಂಗಳದಲ್ಲಿ ಪ್ರಭಾಸ್‌-ಅನುಷ್ಕಾ ಶೆಟ್ಟಿ ಮದುವೆ ಕುರಿತಾದ ಗಾಳಿ ಸುದ್ದಿ ಹರಿದಾಡಿತ್ತು.

ಹಾಗಾಗಿ ಉದ್ಯಮಿ ಮೊಮ್ಮಗಳ ಜತೆಗಿನ ವಿವಾಹದ ಸುದ್ದಿ ಅದೆಷ್ಟರ ಮಟ್ಟಿಗೆ ನಿಜ ಎನ್ನುವುದನ್ನು ಕಾದುನೋಡಬೇಕು. ಈಗಾಗಲೇ ಪ್ರಭಾಸ್‌ಗೆ 37 ವರ್ಷ ವಯಸ್ಸಾಗಿದೆ. ಅಕಸ್ಮಾತ್‌ ಪ್ರಭಾಸ್‌ ಇನ್ನು ಒಂದೆರಡು ವರ್ಷ ಮದುವೆ ಮುಂದೂಡಿದ್ದೇ ಆದರೆ ಮತ್ತೊಬ್ಬ ಸಲ್ಮಾನ್‌ ಖಾನ್‌ ಆಗುವುದರಲ್ಲಿ ಸಂಶಯವಿಲ್ಲ. 'ಬಾಹುಬಲಿ' ಚಿತ್ರದ ಅದ್ಭುತ ಯಶಸ್ಸಿನಿಂದಾಗಿ ನಟ ಪ್ರಭಾಸ್‌ ಈಗ ದಕ್ಷಿಣ ಭಾರತದ ನಟನಾಗಷ್ಟೇ ಉಳಿದಿಲ್ಲ. ಭಾರತವಷ್ಟೇ ಅಲ್ಲದೆ ವಿದೇಶಗಳಲ್ಲೂ ತಮ್ಮ ಛಾಯೆ ಮೂಡಿಸಿ, ಯುನಿವರ್ಸಲ್‌ ಸ್ಟಾರ್‌ ಆಗಿ ಹೊರಹೊಮ್ಮಿದ್ದಾರೆ ಪ್ರಭಾಸ್‌.

ಪ್ರಭಾಸ್‌ 'ಬಾಹುಬಲಿ' ಚಿತ್ರದಲ್ಲಿ ಅದೆಷ್ಟರ ಮಟ್ಟಿಗೆ ತೊಡಗಿಸಿಕೊಂಡಿದ್ದರು ಎಂದರೆ ಸಾಲು ಸಾಲಾಗಿ ಬಂದ 6000 ಮದುವೆ ಪ್ರಪೋಸಲ್‌ಗಳನ್ನು ತಿರಸ್ಕರಿಸಿದ್ದರಂತೆ.