ಕರ್ನಾಟಕದ ಜೀವನದಿ ಕಾವೇರಿ ನದಿ ಉಳಿಸಿ ಅಭಿಯಾನಕ್ಕೆ ಬಾಲಿವುಡ್‌ ನಟ ಸಲ್ಮಾನ್‌ ಖಾನ್‌ ಕೂಡಾ ಸಾಥ್‌ ನೀಡಿದ್ದಾರೆ. ತಮ್ಮ ಟ್ವಿಟ್ಟರ್‌ ಖಾತೆಯಲ್ಲಿ ಈ ಕುರಿತಾದ ಸಣ್ಣ ವಿಡಿಯೊ ದೃಶ್ಯಾವಳಿಯನ್ನು ಹಾಕಿರುವ ಅವರು, ಕಾವೇರಿ, ಗಂಗಾ, ಕೃಷ್ಣಾ, ನರ್ಮದಾ ಮುಂತಾದ ನಮ್ಮ ದೇಶದ ನದಿಗಳು ಸಾವಿರಾರು ವರ್ಷಗಳಿಂದ ನಮ್ಮನ್ನು ಉತ್ತಮವಾಗಿ ನೋಡಿಕೊಳ್ಳುತ್ತಿವೆ.
ಆದರೆ ಇತ್ತೀಚೆಗೆ ಅವು ಮಾನವ ಸಂಬಂಧಿ ಚಟುವಟಿಕೆಗಳಿಂದಾಗಿ ಬತ್ತಿ ಹೋಗುತ್ತಿವೆ. ಈ ನದಿಗಳೇ ನಮ್ಮ ದೇಶದ ಜೀವನಾಡಿಗಳು. ನದಿಗಳು ಇಲ್ಲದಿದ್ದರೆ ನಾವು ಇರುವುದಿಲ್ಲ. ಆದ್ದರಿಂದ ನಮಗಾಗಿ ನಮ್ಮ ನದಿಗಳನ್ನು ಉಳಿಸಿ ಎಂದು ಮನವಿ ಮಾಡಿದ್ದಾರೆ. ಈ ಕುರಿತ ರಾರ‍ಯಲಿಯಲ್ಲಿಯೂ ಪಾಲ್ಗೊಂಡಿರುವ ಅವರು ತಮ್ಮ ಅಭಿಮಾನಿಗಳಿಗೆ ಮತ್ತು ಫಾಲೋವರ್‌ಗಳಿಗೆ, ನಮ್ಮ ದೇಶದ ನದಿಗಳನ್ನು ಮುಂದಿನ ಪೀಳಿಗೆಗೆ ಉಳಿಸುವಂತೆ ಕರೆ ನೀಡಿದ್ದಾರೆ.
ಈ ನದಿ ಉಳಿಸಿ ಅಭಿಯಾನವನ್ನು ಮೊದಲ ಬಾರಿ ಆರಂಭಿಸಿದ್ದು ಅಧ್ಯಾತ್ಮಿಕ ಗುರುಗಳಾದ ಜಗ್ಗಿ ವಾಸುದೇವ ಅವರು. ರಾರ‍ಯಲಿ ಫಾರ್‌ ರಿವರ್ಸ್‌ ಎಂಬ ಹೆಸರಿನ ಅಭಿಯಾನ ಕನ್ಯಾಕುಮಾರಿಯಿಂದ ಹಿಡಿದು ಹಿಮಾಲಯದವರೆಗಿನ ನದಿಗಳನ್ನು ಉಳಿಸುವ ಗುರಿ ಹೊಂದಿದೆ. ಈ ಅಭಿಯಾನಕ್ಕೆ ನಟರಾದ ರಿಷಿ ಕಪೂರ್‌, ಅನುಪಮ್‌ ಖೇರ್‌, ಅರ್ಬಾಜ್‌ ಖಾನ್‌ ಮುಂತಾದವರೂ ಬೆಂಬಲ ನೀಡಿದ್ದಾರೆ.
'ನಮ್ಮ ದೇಶದ ನದಿಗಳು ಬತ್ತಿ ಹೋಗುತ್ತಿರುವುದನ್ನು ನೋಡಿದರೆ ಖೇದವೆನಿಸುತ್ತದೆ. ಇವುಗಳನ್ನು ಉಳಿಸುವುದು ನಮ್ಮ ಕರ್ತವ್ಯ. ನದಿ ಉಳಿಸಿ ಅಭಿಯಾನದಲ್ಲಿ ನೀವೂ ಪಾಲ್ಗೊಳ್ಳಿ.'