ಕತ್ರಿನಾ ಕೈಫ್ ನನ್ನ ಸೊಸೆಯಾಗಲಿ: ಸಲ್ಮಾನ್ ಖಾನ್ ತಾಯಿ ಸಲ್ಮಾ!

ಬಾಲಿವುಡ್‌ನ ಸ್ಟಾರ್ ನಟ ಸಲ್ಮಾನ್ ಖಾನ್ ಮದುವೆ ಆಗುತ್ತಾರಾ? ಅದು ಅವರಿಗೇ ಗೊತ್ತು. ಆದರೆ ಅವರ ಮದುವೆ ಸುದ್ದಿಗಳು ಮಾತ್ರ ಹರಿದಾಡುತ್ತಲೇ ಇರುತ್ತವೆ. ಅವರಿಗೆ ಈಗ ವಯಸ್ಸು 55. ಆದರೆ, ಅವರಿನ್ನೂ ಮದುವೆಯಾಗಿಲ್ಲ ಎನ್ನವುದು ಅವರೊಬ್ಬರನ್ನು ಬಿಟ್ಟು ಬೇರೆ ಎಲ್ಲರಿಗೀ ಭಾರೀ ತಲೆನೋವಿನ ಸಂಗತಿ. ಸದ್ಯ ಮತ್ತೆ ಸಲ್ಮಾನ್ ಖಾನ್ ಮದುವೆ ಸಂಗತಿ ನಟಿ ಕತ್ರಿನಾ ಕೈಫ್ ಹೆಸರಿನ ಜೊತೆ ಸುತ್ತಿಕೊಂಡು ಗಾಳಿಪಟದಂತೆ ಬಾಲಿವುಡ್ ಅಂಗಳದಲ್ಲಿ ಹಾರಾಡತೊಡಗಿದೆ.

ಮದುವೆಯ ವಯಸ್ಸು ಮೀರಿದ್ದರೂ ಸಲ್ಮಾನ್ ಖಾನ್ ತಮ್ಮ ಗೆಳತಿಯರನ್ನು ಬದಲಾಯಿಸುತ್ತ ಒಂದರ ಮೇಲೊಂದರಂತೆ ಸಿನಿಮಾ ಮಾಡುವುದರಲ್ಲಿ ಬ್ಯುಸಿಯಾಗಿದ್ದಾರೆ. ಅವರು ಯಾವತ್ತು ಸಹ ತಮ್ಮ ಮದುವೆ ಬಗ್ಗೆ ತಲೆ ಕೆಡಿಸಿಕೊಳ್ಳಲಿಕ್ಕಿಲ್ಲ. ಆದರೆ, ಇದನ್ನು ಚೆನ್ನಾಗಿಯೇ ಅರಿತಿರುವ ಸಲ್ಲೂ ತಾಯಿ ಸಲ್ಮಾ, 'ಕತ್ರೀನಾ ಕೈಫ್ ನನ್ನ ಸೊಸೆಯಾಗಿ ಬರಬೇಕು' ಎಂದು ಹೇಳಿದ್ದಾರೆ. ಇದನ್ನು ಸ್ವತಃ ಕತ್ರೀನಾ ಕೈಫ್ ಕೂಡಾ ದೃಢೀಕರಿಸಿದ್ದ, "ಹೌದು ಸಲ್ಮಾನ್ ಅವರ ತಾಯಿ ನನ್ನನ್ನು ಸೊಸೆಯ ರೂಪದಲ್ಲಿ ನೋಡಲು ಬಯಸುತ್ತಿದ್ದಾರೆ" ಎಂದು ನಟಿ ಕತ್ರಿನಾ ಕೈಫ್ ಸಂದರ್ಶನವೊಂದರಲ್ಲಿ ದೃಢ ಪಡಿಸಿದ್ದಾರೆ.

ಅಷ್ಟೇ ಅಲ್ಲ, ಇತ್ತೀಚೆಗೆ ಸಲ್ಮಾನ್ ತಾಯಿ ಸಲ್ಮಾ ಮತ್ತು ಕತ್ರೀನಾ ಪರಸ್ಪರ ಅಪ್ಪಿಕೊಂಡಿರುವ ಚಿತ್ರವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್ ವೈರಲ್ ಆಗಿ ಹರಿದಾಡುತ್ತಿದೆ. ಈ ನಡುವೆ 'ಭಾರತ್' ಸಿನಿಮಾ ಪ್ರಚಾರಕ್ಕಾಗಿ ಸಲ್ಮಾನ್ ಖಾನ್ 'ಕಾಮಿಡಿ ವಿತ್ ಕಪಿಲ್ ಷೋ'ನಲ್ಲಿ ಭಾಗವಹಿಸಿದ್ದಾಗ, 'ಸಲ್ಲೂ ಮದುವೆ ಯಾವಾಗ?' ಅಂತ ಕಪಿಲ್ ಕಾಲೆಳೆದಿದ್ದಾರೆ. ಅದಕ್ಕೆ ನಟ ಸಲ್ಮಾನ್ ಖಾನ್ "ನೋಡಿ ಭಾರತ್ ಸಿನಿಮಾದ ನಾಯಕ ತನ್ನ 72ನೇ ವಯಸ್ಸಿನ ತನಕ ಮದುವೆಯಾಗಲ್ಲ ಅನ್ನುವ ಸಿದ್ಧಾಂತದವನು. ನಾನೂ ಕೂಡಾ ಅದನ್ನೇ ಅನುಸರಿಸಬೇಕೆಂದಿದ್ದೇನೆ" ಎಂದು ಸಲ್ಮಾನ್ ಖಾನ್ ನಗುತ್ತಲೇ ಉತ್ತರಿಸಿದ್ದಾರೆ.

ಆರು ವರ್ಷಗಳಿಂದ ಡೇಟಿಂಗ್‌ನಲ್ಲಿದ್ದ ಕತ್ರೀನಾ-ರಣಬೀರ್ ಸದ್ದಿಲ್ಲದೇ ಪರಸ್ಪರರಿಂದ ದೂರವಾಗಿದ್ದು ಈಗ ಇತಿಹಾಸ. ನಟಿ ಕತ್ರೀನಾ ತಮ್ಮ ಪಾಡಿಗೆ ತಾವು ಸಿನಿಮಾಗಳಲ್ಲಿ ಬ್ಯುಸಿಯಾಗಿದ್ದರೆ, ಅತ್ತ ರಣಬೀರ್ ಕಪೂರ್, ಹೊಸ ಗೆಳತಿ ಆಲಿಯಾ ಭಟ್ ಜೊತೆಗೆ ವಿದೇಶಗಳಲ್ಲಿ ಸುತ್ತಾಡುತ್ತಾ, ಸಿನಿಮಾ ಸಮಾರಂಭಗಳಲ್ಲಿ ಜೋಡಿಯಾಗಿ ಭಾಗಿಯಾಗುತ್ತಿರುವುದು ಈಗ ರಹಸ್ಯವೇನಲ್ಲ.

ಇನ್ನು, ಈಚೆಗೆ ಸಂದರ್ಶನವೊಂದರಲ್ಲಿ ಕತ್ರೀನಾಗೆ ರಣಬೀರ್ ಜತೆಗಿನ ಸಂಬಂಧ ಬ್ರೇಕಪ್ ಆಗಲು ಕಾರಣವೇನೆಂದು ಪ್ರಶ್ನಿಸಿದಾಗ "ಪರಿಸ್ಥಿತಿ ನನ್ನ ನಿಯಂತ್ರಣ ಮೀರಿ ಹೋಗಿತ್ತು. ಒಡೆದು ಹೋದ ಹಾಲಿಗಾಗಿ ಅತ್ತು ಪ್ರಯೋಜನವಿಲ್ಲ. ಅದರ ಬದಲು ಇರುವ ಜೀವನವನ್ನು ಹೇಗೆ ವೃತ್ತಿಪರವಾಗಿ ರೂಪಿಸಿಕೊಳ್ಳಬೇಕು ಎಂದು ಯೋಚಿಸಬೇಕು. ಆಗಿದ್ದೆಲ್ಲವೂ ಒಳಿತೇ ಆಯಿತು" ಎಂದು ಕತ್ರೀನಾ ಬೋಲ್ಡ್ ಆಗಿಯೇ ಹೇಳಿಕೊಂಡಿದ್ದಾರೆ.

ಒಟ್ಟಿನಲ್ಲಿ, ಸಲ್ಮಾನ್ ಖಾನ್ ಮದುವೆಯಾಗಬೇಕೆಂದು ಜಗತ್ತು ಬಯಸುತ್ತಿದೆ. ಸಲ್ಮಾನ್ ಖಾನ್ ಅಮ್ಮ ಸಲ್ಮಾ ಕತ್ರಿನಾ ತಮ್ಮ ಸೊಸೆಯಾಗಬೇಕೆಂದು ಬಯಸುತ್ತಿದ್ದಾರೆ. ಆದರೆ, ಸಲ್ಮಾನ್ ಖಾನ್ ಮಾತ್ರ ತಾವಾಯಿತು ತಮ್ಮ ಸಿನಿಮಾ ಜಗತ್ತಾಯಿತು ಎಂಬಂತೆ ಇದ್ದುಬಿಟ್ಟಿದ್ದಾರೆ. ಮುಂದಿನ ಸಂಗತಿ ಯಾರೆಗೆ ಗೊತ್ತು!