ಪತ್ತೆದಾರರಾಗಿ ಮೆರೆಯಲು ಸಜ್ಜಾದ ಸಲ್ಮಾನ್ ಖಾನ್!

ಬಾಲಿವುಡ್ ಬಾಕ್ಸ್ ಆಫೀಸ್ ಸುಲ್ತಾನ್ ಸಲ್ಮಾನ್ ಖಾನ್ ಸದ್ಯದಲ್ಲೇ ಡಿಟೆಕ್ಟಿವ್ ಆಗಲಿದ್ದಾರೆ. ಅಂದರೆ ಅವರು ಸೌತ್ ಕೋರಿಯನ್ ರೀಮೇಕ್ ಬಾಲಿವುಡ್ ಚಿತ್ರದಲ್ಲಿ ಡಿಟೆಕ್ಟಿವ್ ಪಾತ್ರವನ್ನು ಮಾಡಲಿದ್ದಾರೆ. ಸೌತ್ ಕೋರಿಯಾದಲ್ಲಿ ಸೂಪರ್ ಹಿಟ್ ದಾಖಲಿಸಿರುವ ಸಸ್ಪೆನ್ಸ್ ಥ್ರಿಲ್ಲರ್ 'ವೆಟೇರನ್' ಚಿತ್ರವು ಹಿಂದಿ ಭಾಷೆಯಲ್ಲಿ ರೀಮೇಕ್ ಆಗಲಿದ್ದು ಚಿತ್ರದ ನಾಯಕರಾಗಿ ಸಲ್ಮಾನ್ ಖಾನ್ ಅವರನ್ನು ಅಪ್ರೋಚ್ ಮಾಡಲಾಗಿದೆ. ಇನ್ನು ಸಲ್ಮಾನ್ ಖಾನ್ ಈ ಆಫರ್ ಒಪ್ಪುವುದಷ್ಟೇ ಬಾಕಿ.

ಬಾಲಿವುಡ್ ಬಾಕ್ಸ್ ಆಫೀಸ್ ಕಿಂಗ್ ಎಂದೇ ಬಿಂಬಿತವಾಗಿರುವ ಸಲ್ಮಾನ್, ಜಗತ್ತಿನಾದ್ಯಂತ ಭಾರೀ ಸಂಖ್ಯೆಯ ಅಭಿಮಾನಿಗಳನ್ನು ಹೊಂದಿದ್ದಾರೆ. ಸಲ್ಮಾನ್ ಚಿತ್ರಗಳೆಂದರೆ ಅವು ಕಾಸು ಬಾಚುವ ಚಿತ್ರವೇ ಆಗಿರುತ್ತದೆ ಎಂದು ಬಾಲಿವುಡ್ ಅಂಗಳ ನಂಬಿದೆ. ಹೀಗಾಗಿ ಸಿಜೆ ಎಂಟರ್‌ಟೈನ್‌ಮಂಟ್ ಬ್ಯಾನರ್ ಅಡಿಯಲ್ಲಿ ನಿರ್ಮಿಸಲಾಗಿರುವ ಈ ಕೋರಿಯನ್ ವೆಟೇರನ್ ಚಿತ್ರದ ರೀಮೇಕ್ ಹಕ್ಕನ್ನು ಬಾಲಿವುಡ್‌ನ ರಿಯಲ್ ಲೈಫ್ ಪ್ರೊಡಕ್ಷನ್ ಖರೀದಿಸಿದೆ ಎನ್ನಲಾಗಿದೆ. ರ್ಯೂ ಸೇಂಗ್ ಕೋರಿಯನ್ ಚಿತ್ರ ವೆಟೇರನ್ ನಿರ್ದೇಶಕರಾಗಿದ್ದು ಹ್ವಾಂಗ್ ಜುಂಗ್ ಮಿನ್ ಈ ಚಿತ್ರದ ನಾಯಕರಾಗಿದ್ದಾರೆ.

ಸದ್ಯಕ್ಕೆ ಸಲ್ಮಾನ್ ಖಾನ್ ಭಾರತ್ ಚಿತ್ರದ ಶೂಟಿಂಗ್‌ನಲ್ಲಿ ನಿರತರಾಗಿದ್ದಾರೆ. ಸಲ್ಮಾನ್ ಖಾತ್ ಜೋಡಿಯಾಗಿ ಕತ್ರಿನಾ ಕೈಫ್ ಹಾಗೂ ದಿಶಾ ಪಠಾನಿ ನಟಿಸಿದ್ದು ಚಿತ್ರದಲ್ಲಿ ಜಾಕಿ ಶ್ರಾಫ್, ಟಬು, ಸುನಿಲ್ ಗ್ರೋವರ್ ಮುಂತಾದವರು ತಾರಾಗಣದಲ್ಲಿದ್ದಾರೆ. ಭಾರತ್ ಚಿತ್ರವು ಈ ವರ್ಷ 2019ರ ಕೊನೆಯಲ್ಲಿ ಬಿಡಿಗಡೆಯಾಗಲಿದೆ.