ಮತ್ತೊಮ್ಮೆ 'ಹುಚ್ಚ'ನಾಗಲಿರುವ ಸಲ್ಮಾನ್ ಖಾನ್!

ಸಲ್ಮಾನ್‌ ಖಾನ್‌ ಮತ್ತು ಭೂಮಿಕಾ ಚಾವ್ಲಾ ನಟನೆಯ ಸೂಪರ್‌ ಹಿಟ್‌ 'ತೇರೆ ನಾಮ್‌' ಸಿನಿಮಾದ ಸಿಕ್ವೆಲ್‌ ಶೀಘ್ರದಲ್ಲೇ ಸೆಟ್ಟೇರಲಿದೆ. ನಿರ್ಮಾಪಕ ಸತೀಶ್‌ ಕೌಶಿಕ್‌ ಈ ವಿಷಯವನ್ನು ಖಚಿತಪಡಿಸಿದ್ದು, ನಾನೇ ಈ ಸಿನಿಮಾ ನಿರ್ಮಿಸಲಿದ್ದು, ಇದರಲ್ಲಿಯೂ ಲವ್‌ ಸ್ಟೋರಿ ಇರಲಿದೆ ಎಂದಿದ್ದಾರೆ.

ಕನ್ನಡದಲ್ಲಿ ಸುದೀಪ್‌ ನಟಿಸಿದ್ದ ಹುಚ್ಚ ಸಿನಿಮಾದ ರಿಮೇಕ್‌ ಆಗಿರುವ ತೇರೆ ನಾಮ್‌ ಸಿನಿಮಾ ಭಾವನಾತ್ಮಕ ಪ್ರೇಮ ಕಥೆ, ರಾಧೆ ಭಯ್ಯಾ ಪಾತ್ರದಲ್ಲಿ ಸಲ್ಲುರ ಅದ್ಭುತ ಅಭಿನಯ ಮತ್ತು ಅವರ ವಿಶಿಷ್ಟ ಹೇರ್‌ ಸ್ಟೈಲ್‌, ಮಧುರ ಹಾಡುಗಳು ಮುಂತಾದ ಕಾರಣಗಳಿಗಾಗಿ ಜನರಿಗೆ ಇಷ್ಟವಾಗಿತ್ತು.

ಈ ಸಿನಿಮಾದ ಸಿಕ್ವೆಲ್‌ನಲ್ಲೂ ಸಲ್ಮಾನ್‌ ಖಾನ್‌ ಇರಲಿದ್ದಾರೆಯೇ ಅಥವಾ ಬೇರೆ ತಾರಾಗಣ ಇರಲಿದೆಯೇ ಎಂದು ತಿಳಿದುಬಂದಿಲ್ಲ. ಕೆಲವು ಮೂಲಗಳ ಪ್ರಕಾರ, ಸಲ್ಮಾನ್‌ ಇದರಲ್ಲಿ ರಾಧೆ ಭಯ್ಯಾ ಪಾತ್ರ ಕ್ಯಾಮಿಯೊ ಮಾಡಲಿದ್ದಾರೆ ಎಂದು ತಿಳಿದುಬಂದಿದೆ. ಉತ್ತರ ಭಾರತದಲ್ಲಿ ನಡೆಯಲಿರುವ ಈ ಸಿನಿಮಾದ ಕಥೆಯೂ ಗ್ಯಾಂಗ್‌ಸ್ಟರ್‌ ಸುತ್ತ ಇರಲಿದೆಯಂತೆ.